بۆ ڕابردومان لاشیرینە و چێژ لە ئێستە نابینین؟

ژیانی ڕابردو تێپەڕی ئیتر ناگەڕێتەوە، تەمەنێك بو بەهەمو جوانی و ناشیرینی و خۆشی و ناخۆشیەكانیەوە بو بەبیرەوەری، خۆ ژیانی ڕابردومان ئەگەر لە ژیانی ئێستەمان ناخۆشتر نەبوبێت خۆشتر نەبووە، نە ژینی ڕابردومان بەهەشت بوە كە هێندە بەحەسرەتەوەین بۆی و نە ئەمڕۆمان دۆزەخە هێندە لێی بێزارین، ئەی بۆچی ڕابرومان لا جوانە و ئاواتی بۆدەخوازین؟ دیارە ئەو ئاوات خواستنە بۆ تەمەنەكەیە نەك سەردەمەكە، ئەو تەمەنە لەدەست دەرچوو كە لەكاتی خؤیدا قەدرمان نەزانی، دەی دیارە نەتەمەن و نەسەردەم كە تێپەڕین ئیتر ناگەڕێنەوە، مەگەر هەر ئاخ و ئۆف و حەسرەتی بۆ هەڵكێشین.
ئەی بۆ چێژ لە ژیانی ئەمڕۆمان نابینین؟ لە كاتێكدا ژیانی ڕاستەقینە ئەوەی ئەمڕۆیە نەك دوێنێ یەكی ڕابردو و سبەینێیەكی نەهاتو، هەڵە تێگەیشتەنەكەی ئێمە بۆ ژیان لە وێدایە، ئەوەنیە ئەمڕۆ دەكەین بە غەم بۆ دوێنێ و هەڵپە بۆ سبەینێ، لە كاتێكدا دوێنێ تێپەڕی و گرەنتیش بۆ سبەینێ نیە، ئیتر بۆ هەوڵنەدەین چێژ لە ئەمڕۆمان وەربگرین، ئەمڕۆ هەلی ژیان بۆ تۆیە هەوڵبدە ئەو هەلە لەدەست نەدەیت، ئاخر سبەینێش گەر هات ئەمڕۆ دەكات بە مێژو و بیرەوەری.
تەنها دەتوانیت ئەزمون لە هەڵە و ڕاستەكانی دوێنێت وەربگریت بۆ ژیانی حەقیقی ئەمڕۆ و بیناكردنی سبەینێیەكی جوان و گەشاوە و دور لەكەموكوڕی.
لەكۆتایدا دەڵێم بۆ ئەوەی لە وەهم و خەیاڵدا نەژیت و لەواقیعدا بژیت، دوێنێ ناگەڕێتەوە، ئەمڕۆ جوان بژی، گەر سبەینێش هات با ژیانت ڕازاوەتربێت.
بەهەمو ناخۆشیەكانیەوە چێژ لە ژیانی ئەمڕۆت ببینە.