پیاوێك مەزنتر لەوەی ئێمە دەیناسین 

ئەمڕۆ لە ناو ئاپۆڕای جەماوەرێكی زۆر باسی لە كارە خێرخوازییەكانی 31 ساڵی پڕ لە بەرهەم و چالاكی رابیتەی ئیسلامیی كورد دەكرد، ئەو رابیتەیەی وەك خۆی دەڵێت لەناو ئازارو نەهامەتییەكانی رۆژانی ئەنفال و كیمیابارانی كوردستانەوە لەدایك بوو، دوێنێش لەناو زانكۆیەكی پێشەنگی كوردستانەوە بە بەشداری سەدان مامۆستاو پسپۆڕو توێژەر حەوتەمین كۆنفرانسی زانستی زانكۆكەی كردەوە، زانكۆی گەشەپێدانی مرۆیی كە دیاری دەستی ئەوو پرۆژەیەكی مەزنی قازانج نەویستە بۆ خەڵكیكوردستان، چەند مانگێكیش لەمەوبەر ئەو وەك ئەمینداری گشتی گەورەترین رێكخراوی زانایانی جیهانی موسوڵمان هەڵبژێردرایەوە.
پڕۆفیسۆر (د. عەلی قەرەداغی) مامۆستاو زاناو توێژەرو ئابووریناس، پیاوێك لەسەر ئاستی جیهان وەك زانایەكی موسوڵمانی كورد مامەڵەی لە ئاستی سەرۆك و پاشاكانی وڵاتانە.
بۆ ناسینی قەرەداغی و بەرهەم و خزمەتەكانی ئەگەر ئەتوانیت سەردانی گوندو شارو شارۆچكەكانی كوردستان بكەو جێ دەستی لە ئاوەدانكردنەوەی كوردستان بە جوانی ببینە، ئەگەر نا سەردانێكی ماڵە بێ نازو هەتیوبارەكانی ساڵانی نەوەدەكانی شەڕی ناوخۆ بكەو لێیان بپرسە كێ بوو خەندەیەكی دەخستە سەر لێوتان و كەمێك خەمی لەدڵ دەرئەكردن، ئەگەر ئەویشت پێ ناكرێت ئێستا وەرەو لە ناوەندە زانستییەكەی زانكۆی گەشەپێدانی مرۆیی لەو سەدان خوێندكارە كوردانەی رۆژئاوا بپرسە كە چەندین ساڵە كێیە بۆتە هاوكارو پاڵپشتی سەركەوتنەكانتان و غەمخۆری ژیان و گوزەرانتان، بە دڵنیاییەوە هەر ناوی ئەو لەسەر زاریانە.
ئەگەر هیچ لەمانە ناكەیت و ناتوانیت، ئەوا ئەزیەت بكێشەو تەنها لە گوگڵ و لە مۆبایلەكەی خۆتەوە بنووسە (د. علی قرداغی) ئەو كاتە دەبینیت كە ئەو كێیە و لەسەر ئاستی جیهان چی بۆ گەلەكەی پێشكشەش كردووە، ئەگەر كاتیشت هەبوو، یان خوێنەواریت بەش ئەكات ئەوا چاوێكیش بخشێنە بەو سەدان توێژینەوەو كتێبانەی كە بەرهەمی چەند ساڵەی زانستیی ئەون.
ئەمانە هەموو كارو بەرهەم و خەباتی چەند ساڵەی پیاوێكن كە لێوانلێوە لە كوردپەروەری و نیشتیمان پەروەری و راستگۆیی، بەڵام بەداخەوە لە زەمەنی ونبوونی بەهاكاندا لەناو دەستەیەك لەوانەی ئایدۆلۆجیا نابینای كردوون، لەسەر مەبدەئی تەنها من راستم و هەمووان ئەبێت وەك من بیربكەنەوە، هەموو ئەم خزمەتانە نابینن و لەمانای بەجیهانی بوونی كەسەكان تێ ناگەن، ئەوان كە تەنها قسەو بۆڵە بۆڵیان لە هەگبەدایەو تا ئێستا نەیانتوانیوە بەردێك لەسەر بەرد دابنێن لە دیواری ئاوەدانی كوردستاندا، بەڵام بەردەوام موحاسەبەی ئەوانی تر ئەكەن لەسەر شێوازی ژیان و بیركردنەوە! 
ئەرێ ناكرێت رۆژێك بە ئاسایی لەژیان بڕوانن؟ جوانییەكان وەك خۆی ببینن؟ كەی بڕیارە ئێمە هەموو وەك یەك بیربكەینەوە؟ تكایە چاویلكە رەشەكانتان فڕێ بدەن و كەمێك دەوروبەر وەك خۆی ببینن، لە لۆكاڵی بوون دەرچن و جیهان بە فراوانیەكەی بخوێننەوە، ئەگەر خۆتان ئیزافەیەكتان پێ نییەو خزمەتیكتان پێ ناكرێت، لێگەڕێن با ئەوانی تر خزمەتێك بەم نیشتیمانە پڕناسۆرە بكەن.