(كورد) عێراق بنیات دەنێتەوە؟!

ئەوەی لە سیانزە ساڵی رابردوو لە عێراقی نوێدا بینیمان و خۆی لە گرژی و ئاڵۆزییەكانی ئەم چەند هەفتەیەدا بینییەوەو، لوتكەی ئاڵۆزییەكانیش هەڵكوتانە سەر تەلاری ئەنجومەنی نوێنەران و مەترسی بۆ سەر بارەگای سەرۆك كۆمار، سەرەڕای مەترسی بۆ سەر ژیانی پەرلەمانتاران و بگرە هەر كوردێكی تر لە بەغدا، خوێندنەوەو شیكاری زۆری بۆ دەكرێت و ئاماژەی زۆرمان بەدەستەوە دەدات، ئەوەی بەندە دەمەوێ لێرەدا تیشكی بخەمە سەر یەكێكە لەو ئاماژانە..
دوو راستی حاشاهەڵنەگر هەیە كە پێویستی بە هەڵوەستە لەسەركردن و هەوڵی گۆڕانكارییە لە گوتاری سیاسی كورددا:
یەكەم/ كورد لەسەرەتای دامەزراندنەوەی عێراقەوە كە بە هێزەوە رووی لە بەغدا كردبوو، ساڵ لەدوای ساڵ و بەتایبەت لەم چوار ساڵەی داهاتووداو، روونتر دوای نەمانی بەڕێز مام جەلال لە بەغدا، پێگەو گوتاری زۆر لاواز بووە، تا ئاستێك دەسەڵاتی بەغدا هەرچی ویستووە كردوویەتی دژ بە بەرژەوەندی كورد و خواستەكانی كورد لە عێراقێكی یەكپارچەدا.
دووەم/ تا ئێستاشی لەگەڵدا بێت كۆمەڵێك بەرژەوەندی كورد بە بەغداوە بەستراوەتەوە لە نمونەی (پشتیوانی هەرێمی و جیهانی بۆ عێراقی یەكپارچە و، موچەو دەرمان و كەلوپەلی خۆراكی كە لە بەغداوە بۆ هەرێم دێت)، ئەمەش رێگر بووە لەوەی هەوڵ بدات بە كردەیی لە بەغدا بكشێتەوە، سەرەڕای دەستووری عێراق كە پابەندی مانەوەی بۆ كورد دروست كردووە..
لەم نێوەندەدا كورد نەیتوانیوە (لە بری راستی یەكەم) خۆی بەهێز نیشان بداتەوەو دەسەڵاتی بەغدا ناچار بە مامەڵەی دروست بكات و فشار بكات بۆ مانەوەی وەك هێزی نەتەوەی دووەم و پێكهاتەی سێیەم و، گرنتی مانەوەی عێراقێكی سەقامگیر و خاوەن ئابورییەكی بەهێز و پێشكەوتوو لەنێو ووڵاتانی ناوچەكەدا..
هەرچی تایبەتیش بێت بە بەرژەوەندییەكان لەبەغدا (لە بری راستی دووەم) نەیتوانیوە وەك بەشدارێكی دەستور و هاوبەشێكی دارایی و ئابوری خۆی بسەلمێنێت و ئەو پشتیوانییە نێودەوڵەتی و ناوچەییە بۆ ملكەچكردنی عێراق بۆ كورد دەستبەر بكات، كەواتە لە بەرامبەردا ئەوەی دەمێنێتەوە پێچەوانەكەیەتی كە خۆ فەرزكردنی بەغدا و لەدەستدانی زۆرینەی دەرفەتەكانە لەلایەن كوردەوە..
لە دەرئەنجامی ئەم دۆخەو ئەو راستییانەی چارەنوسەكەی بەم ئاستە گەیاندووە، ئایا بژاردەی بەردەم كورد چی دەبێت؟ ئەمە پرسیارێكی گرنگی شەقامی كوردییە، بەڵام وەڵامەكەی لای زۆرینەی چاودێرانی سیاسی و دەسەڵاتدارانی كورد روونە كە خۆی لە دوو ئەگەردا دەبێنێتەوە:
1-كورد لەبەر ئەو پێگە لاوازەی و ئەو ناوخۆ شپرزەی هەیەتی نایەوێ بەرەیەكی تری ئاڵۆزی و فشار و ئابڵوقەی ئابوری و تەندروستی و سیاسی دروست بكات و، ئەگەر بەلاوازیش بێت (كە چاوەڕێی بەهێزبوون كەمە) دەچێتەوە بەغداو، دەست لەملان پارسەنگی لاوازییەكانی بەغدا دەكات و ئارامی دەكاتەوە، ئیتر نازانرێت چارەنوسی دوای ئەوە چی دەبێت، ئەمە لە حاڵەتێكدا ئەگەر دۆخێكی گەورەتر و هاوكێشەیەكی ناوخۆیی و نێودەوڵەتی فراوانتر باڵ نەكێشێت بەسەر حاڵەتە سیاسیەكەدا..
2-بارودۆخەكە بەو شێوە شپرزی و ناسەقامگیری ئیداریی و سیاسیە دەمێنێتەوە (تا رادەیەك هاوشێوەی هەرێمی كوردستان)، لەو كاتەشدا هەرێم كاردەكات بۆ بەهێزبوونەوەی لەناوخۆدا و بەدەستهێنانی پشتیوانی نێودەوڵەتی، تا رێخۆشكردن بۆ سازدانی ریفراندۆم و یەكلاكردنەوەی چارەنوسی ناوچە دابڕێنراوەكانی كوردستان، كە ئەمەیان زیاتر لەگەڵ خواستی شەقامی كورددا یەكدەگرێتەوە..
ئەگەری تر و تێڕوانینی تریش دوور نیە، بەڵام تەنها هیوا پاراستنی مافەكانی كورد و دەرچوونە لەو هاوكێشە ئاڵۆزە بە كەمترین زیان و باجدان، ئیتر ئەوەی تر كە دەمێنێتەوە بڕیاری دەسەڵاتدارە سیاسیەكانە كە چارەنوسەكە بەلایەكدا دەخەن، خەونەكان دێننە دی، یان دەگەڕێنەوەو عێراق بنیات دەنێنەوە؟!..