فەرمی ... ئارارات كشانەوەی خۆی لەخولی نایابی كوردستان راگەیاند

25/08/2019 - 09:49 بڵاوکراوەتەوە لە وەرزش/كوردستانی

 

ئاری عەبدوڵڵا

كارگێڕی یانەی وەرزشی ئارارات بڕیاریدا سەرجەم تیم و چالاكییە وەرزشییەكانیان رابگرن و هاوكات بڕیاریدا بەشداری لە وەرزی نوێی خولی تۆپی پێی نایابی كوردستان نەكەن.

(وەلید ئەنوەر) سكرتێری یانەی وەرزشی ئارارات هۆكاری راگرتنی سەرجەم چالاكییە وەرزشییەكانی یانەكەی بۆ قەیرانی دارایی و نەبوونی پارەی پێویست بۆ مووچەی یاریزانان و تیمەكان گەڕاندەوە.

سكرتێری یانەی ئارارات ئاشكرایدەكات: "قەرزێكی زۆری ساڵانی رابردوو لەسەر یانەكەكان كەڵەكەوبووە و تاكو ئێستا نەمانتوانیوە تەنانەت بەشێك لەم قەرزانەش بدەینەوە، هەر ئەمەش وایكرد سەرجەم چالاكییە وەرزشییەكانمان رابگرین و ئەم بڕیارە تەنها تۆپی پێ نییە وەك ئەوەی لە چەند دەزگایێگی راگەیاندن بەمجۆرە بڵاوكرایەوە".

وەلید ئەنوەر دەڵێت: "یانەكەی ئێمە و سەرجەم یانە وەرزشییەكانی دیكە كێشەی دارایی هەیە و حكومەتی كوردستانیش بە هۆی قەیرانی داراییەوە ئێستا هاوكاریی یانە وەرزشییەكان ناكات، بۆیە ئێمە بەو بارودۆخەوە ناتوانین بەشداریی خولی تۆپی پێی كوردستان بكەین و تەنانەت خەرجی و مووچەی یارییە وەرزشییەكانی دیكەشمان چەند مانگێكە راگرتووە".

ئەم بەرپرسەی یانەكە دەشڵێت: "ئەگەر حكومەت بە هانای یانەكەمان بێت و بودجەمان بۆ دابین بكات ئەوا لەم بڕیارە پاشگەزدەبینەوە و سەرلەنوێ بەشداری چالاكییەكان دەكەین". هاوكات وەلید ئەنوەر رەتیشی كردەوە هۆكاری بەشداری نەكردنییان لە خولی نایابی كوردستان بە هۆی ئەم ستەم و بڕیارانە بێت كە لە وەرزەكانی رابردوو لە یانەكەیان كرابێت.

یانەی وەرزشیی ئارارات لە ساڵی ١٩٩٦ لە شارۆچكەی پیرمام دامەزراوە و جگە لە مۆڵەتی كاركردنی لە هەرێمی كوردستان، مۆڵەتی كاركردنی لە عێراقی فیدڕاڵیش هەیە و جگە لە تیمی تۆپی پێ لە زۆرێك لە وەرزشەكانی دیكە، تیم و یاریزانی ئاست بەرزی هەیە.