یەكەم پاڵەوانیەتی تیروكەوانی عەرەبی لە سلێمانی دەستی پێكرد

22/09/2019 - 10:26 بڵاوکراوەتەوە لە وەرزش/كوردستانی

ئەردەڵان محەمەد

لەشاری سلێمانی لەیاریگا نێودەوڵەتیەكەی یەكەمین پاڵەوانێتی تیروكەوانی یانەكانی عەرەب بۆ یەكەمجار دەستی پێكرد.

لەپاڵەوانێتیەكەدا 21یانەی 8 وڵاتی عەرەبی ركابەری لەسەر یاریەكانی ركێرڤ‌و كۆمپاوند‌و میكسەر بۆ كوران‌و كچان بۆ دووری دووجار 70م دەكەن.

پاڵەوانێتیەكە لەسەر داوای یانەی سلێمانی بوو كە یەكێتی تیروكەوانی عەرەب بەهاوكاری یەكێتیی تیروكەوانی عێراق رەزامەندییان نیشانداو دەستی بەیاریەكانی كرد.

ئازاد سەفوەت بەرێوبەری گشتی پاڵەوانێتیەكە ئەوەی خستەروو: دوای كۆبوەنەوەی یەكێتی تیروكەوانی وڵاتانی عەرەب لەمانگی سێی ئەمساڵ لەشاری سلێمانی ئێمە وەك یانەی سلێمانی راپۆرتی خۆمان بەرز كردەوە بۆ ئەنجامدانی ئەم پاڵەوانێتیە لەشاری سلێمانی‌و دواتر بەزۆرینەی دەنگی یەكێتیەكە داواكەمان قبوڵ كراو بەمشێوەیە پاڵەوانێتیەكە ئێستا لەشاری سلێمانی ئەنجام دەدرێت.

ئازاد راشیگەیاند:" بەهۆی ئەو ئەزموونەی هەمانبوو لەساڵی 2013 لەپاڵەوانێتیی وڵاتانی عەرەب‌و بوونی پێداویستی یاریەكە لەم پاڵەوانێتیە بەكاری دەهێنینەوە، بەڵام كێشەیەك كە لەم پاڵەوانێتیە بۆمان دروستبووە لەتوانای ئێمەدا نەبوو، چونكە لەعێراقدا نیە بوونی تایمەر بوو بۆ گرتنی كاتی هاویشتنی تیرەكان لەلایەن یاریزانانەوە.

بەرێوبەرەكەی پاڵەوانێتیەكە ئاماژەی بەوەشدا: پێشتر بڕیاربوو 10هەڵبژاردە بەشداری پاڵەوانێتیەكەی بكردایە، بەڵام بەداخەوە دوو هەڵبژاردەیان كشانەوە‌و 21یانەی هەشت وڵات بەشداری پاڵەوانێتیەكەیان كردووە، بەڵام بەداخەوە تەنها سێ یانە لەشاری سلێمانی بەشدارن كە یانەكانی سلێمانی‌و سیروانی نوێ‌‌و پێشمەرگەی سلێمانین.

سەفوەت وتیشی:" هۆكاری كەمی یاریزانان‌و یانەكانی كوردستان بەهۆی نەبوونی یاریزان دەگەرێتەوە بۆ ركابەریەكانی دووری 70م.

شاری سلێمانی بۆ دووەمجارە باوەش بۆ ركابەریەكانی پاڵەوانێتیە نێودەوڵەتیەكانی دەكاتەوە دوای ئەوەی ساڵی 2013 بۆ یەكەمینجار لەسەر ئاستی عێراق پاڵەوانێتیی وڵاتانی عەرەب بەرێوەچوو.