هەشتەمین پاڵەوانیەتی نێودەوڵەتی شەتڕەنجی كلاسیك دەستی پێكرد

پێنج شەممە, 14 کانونی یەکەم 2017 06:40

 

یانەی شەترەنجی خانزاد بەردەوامە لە كارو چالاكیەكانی و لە نوێترین چالاكیدا هەشتەمین پاڵەوانیەتی شەتڕەنجی كلاسیكی ئەنجامدا ،كە ئەم پاڵەوانیەتیە هاوشێوەی پێشبڕكێكانی پێشووتر نێودەوڵەتیە و باوەڕپێكراوە و راستەوخۆ لەلایەن یەكێتی شەتڕەنجی نێودەوڵەتی سەرپەرشتی دەكرێت و بە چاودێری یەكێتی شەتڕەنجی عێراق دەبێت.

لەم پاڵەوانیەتیە ٥٠ شەتڕەنجزان بەشدارن كە لەم ژمارەیە ١٠ كچە یاریزانیش بەشدارە ئەوەی زیاتر پاڵەوانیەتیەكەی بە هێز كردووە بەشداریكردنی هەریەك لە حوسێن عەلی و نوح عەلی و زۆزگ محەمەدە كە خاوەنی ریتینگی بەرزی جیهانین و لەسەر ئاستی وڵاتانی عەرەبی و ئاسیا و ئەوروپاش ناسراون ،جگە لە بەشدارییەكی كارای شەتڕەنجزانانی عێڕاق و ئوردن و فەڵەستین و وڵاتانی دیكە.

پاڵەوانیەتی شەتڕەنجی كلاسیكی خانزاد پێنج رۆژ بەردەوام دەبێت و یاریەكانی بە سیستەمی سویسری ٩ جەولە ئەنجامدەدرێن بە كاتی ٧٥ خولەك بۆ هەر جەولەیەك و زیادكردنی ٣٠ چركە بۆ هەر جووڵەیەك لە دەسپێكی پاڵەوانیەتیەكەش شەتڕەنجزانە خاوەن پۆلێنە جیهانیەكان سەركەوتنیان تۆماركرد و ئەنجامی هەر شەتڕەنجزانێكی بەشدار لەم پاڵەوانیەتیە راستەوخۆ كاریگەری دەبێت لەسەر ریتینگی جیهانی.

سەرۆكی یانەی شەتڕەنجی خانزاد بە دوارۆژی راگەیاند تاكە شتێك یانەكەیانی بە وەستاوی هێشتۆتەوە ویستی خۆنەویستانەی كارگێڕی یانەكە و یاریزانانە.

دڵزار حەمە ساڵح سەرۆكی یانەی شەتڕەنجی خانزاد رایگەیاند بڕێك پارە لە بڕی بەشداریكردنی هەر شەتڕەنجزانێك وەردەگیرێت ئەم پارەیەش بەشێكی دەدرێتەوە یەكێتی شەتڕەنجی جیهانی و عێڕاقی كە سەرپەرشتی پاڵەوانیەتیەكە دەكەن و بەشەكەی تر دەكرێتە خەرجی پاڵەوانیەتیەكە و كڕینی مەدالیا و جام بۆ یاریزانە سەركەوتووەكان.

لە كۆتایی لێدوانەكەیدا دڵزار ئەوەی خستەڕوو شەش یاریزانی كوڕ و شەش یاریزانی كچ لە كۆتایی پاڵەوانیەتیەكە خەڵات دەكرێن و رۆژانەش دوو جەولە لە یاریەكان بەڕێوەدەچێت و رۆژی یەكشەممە دوا جەولەی پاڵەوانیەتیەكە ئەنجامدەدرێت.

كارین كەمال كچە شەتڕەنجزانێكی بەشداربووی پاڵەوانیەتیەكەیە لە لێدوانێكی تایبەتدا ئەوەی خستەڕوو كە یاریزان هەرچەند ئاستی بەرز بێت پێویستە لە بەشداریەكان بەردەوام بێت، هەم بۆ ئەوەی ریتینگی جیهانی دانەبەزێت هەمیش بۆ ئەوەی ئاستی بەرەو دواوە نەچێت.
ماوەتەوە بڵێین ئەم شێوازانەی كە یاری شەتڕەنجی پێ ئەنجامدەدرێت ٣ جۆرە، جۆری كلاسیك لە رووی كاتەوە لە جۆرەكانی راپید و خێرا كاتەكەی زۆر زیاترە و بۆ هەر جەولەیەك سەرووی ٥٠ خولەك دانراوە و ئەم كاتە بە پێی جۆری پاڵەوانیەتیەكان بەرەو ژوور زیاددەكات.
هەرچی جۆری راپیدە كاتی هەر جەولەیەك ١٥ خولەكە و شێوازی خێراش كاتەكەی بە پێی خێرایی جووڵەی داشەكان زیادو كەم دەبێت بۆ هەر یاریزانێك.

یانەی شەتڕەنجی خانزاد لە هەر سێ جۆرەكە چەندین پاڵەوانیەتی ناوخۆیی و جیهانی ئەنجامداوە و بەهۆیەوە دەیان یاریزانی كورد بوونەتە خاوەنی پۆلێنی جیهانی كە ئەمەش لە هیچ یاریەكی دیكە لە هەرێمی كوردستان رووی نەداوە.