پێشمەرگەی سلێمانی پلەی سێیەمی كاراتێی ئێرانی بەدەستهێنا

دوو شەممە, 25 کانونی یەکەم 2017 06:27

 

DWA- لەولاتی ئێران‌و لەشاری تاران پاڵەوانێتیی نێودەوڵەتی كاراتی ئێران زەمین كۆتایی هاتوو هەڵبژاردەی ئێران رێكخەری پاڵەوانێتیەكە توانی نازناوەكە بەدەست بێنێت‌و یانەی پێشمەرگەی سلێمانیش توانی پلەی سێیەم بۆ خۆی مسۆگەر بكات.

لەپاڵەوانێتیەكەدا نۆ هەڵبژاردە بەشداربوون و كوران‌و كچانی پێشمەرگەش توانییان مێژوو بۆ خۆیان بنوسنەوە.

لەئاستی پێشكەوتووان‌و بۆ كوران‌و كچان‌و ئاستی تەمەنی خوار 21ساڵ بەشداربوونو، لەیاری كاتادا كچانی پێشمەرگەی سلێمانی توانییان پلەی یەكەمی پاڵەوانێتیەكە بەدەست بێنن.

هەر لەیاری كاتا‌و بۆ كوران بۆ خوار تەمەنی 21ساڵ یاریزانانی پێشمەرگەی سلێمانی توانییان پلەی سێیەم بەدەست بێنن.

لەسەر ئاستی تاك بۆ یاری كاتا‌و لەكێشی 50كگم شارا فایەق توانی مەدالیای برۆنز بەدەست بێنێت.

لەسەر ئاستی تاك بۆ خوار تەمەنی 21ساڵ بۆ كوران بەهمەن فەتاح توانی پلەی سێیەم بەدەست بێنێت.

لەسەر ئاستی پێشكەوتووانیش شڤان عوسمان بۆ كێشی 84+ توانی مەدالیای برۆنز لەمل بكات.

ئەرسەلان مورادی راهێنەری كاراتی یانەی پێشمەرگەی سلێمانی ئەوەی بەدوارۆژ راگەیاند" سوپاس بۆ خوا توانیمان ئاستێكی بەرز نمایش بكەین لەپاڵەوانێتیەكەدا‌و یاریزانەكانمان توانییان ئاستێكی بەهێز لەناو هەڵبژاردە بەشداربووەكاندا پیشان بدەن‌و چەندین مەدالیا بەدەست بێنن.

وتیشی" بەشداریكردنمان لەم پاڵەوانێتیانەدا بۆ یاریزانەكانمان گرنگی تایبەتی خۆی هەیە‌و بۆ بەرزبونەوەی ئاستیان، ئەوەش وادەكات كە لەپاڵەوانێتیەكانی داهاتوو بتوانین ئەنجامی گەورەتر بەدەست بێنین.

لەریزبەندی كۆتایی پاڵەوانێتیەكەشدا هەڵبژاردەی ئێران رێكخەری پاڵەوانێتیەكە توانی پلەی یەكەم بەدەست بێنێت‌و هەڵبژاردەی ئازەربایجانیش پلەی دووەمی بەدەستهێنا‌و پلەی سێیەمیش بۆ یانەی پێشمەرگەی سلێمانی بوو كە نوێنەری هەڵبژاردەی عێراق بوو.