بە وێنە ... بۆ گەیشتن بە خولی نایابی كوردستان , یانەی ئاشتی دەستی بە مەشقەكان كردەوە

پێنج شەممە, 28 کانونی یەکەم 2017 06:27

 

DWA- بۆ جاری سێیەم یانەی ئاشتی مەشقەكانی بۆ خولی پلەیەكی كوردستان دەست پێكردەوە‌و سەرۆك‌و راهێنەر‌و یاریزانانی تیپەكەش باس لەوە دەكەن ئامانجی ئەمساڵیان جیاواز لەساڵانی رابردوو سەركەوتنەوەی تیپەكەیە بۆ خولی نایابی کوردستان دوا١٠ ساڵ دووركەوتنەوە.

نەوزاد محەمەد راهێنەری یانەكە بۆ دوارۆژ ئاماژەی بەوەدا" ئاشكرایە بۆ جاری سێیەمە دەستمان كردۆتەوە بەمەشقەكانمان ئەوەش كاریگەری خۆی هەیە بەسەر تیپەكەمانەوە، بەڵام سوپاس بۆ خوا تونیومانە لەماوەی ئەم مانگەدا مەشقەكانمان بەچری دەستپێبكەینەوە‌و پێكهاتەكەشمان بەچەند یاریزانێكی یانەكانی شاری سلێمانی بەهێزتر بكەین‌و لەئێستاشدا تیپەكەمانە لە24یاریزان پێكهاتووە.

نەوزاد وتیشی" دەمانەوێت لەو ماوە كەمەی لەبەردەستمانە لێك تێگەیشتنی زیاتر لەناو یاریزانان دروست بكەین، چونكە ئامانجی ئێمە ئەمساڵ سەركەوتنەوەیە بۆ خولی نایابی كوردستان، هەرچەندە یانەكان دابەشی دوو گروپ كراون سەركەوتنمان تارادەیەك قورسە .

كوردستان سێوەكانی سەرۆكی یانەی ئاشتی ئەوەی خستەروو" گومانی تێدانیە كە قەیرانی دارایی كاریگەری تەواوی كردۆتە سەرجەم بوارەكانی ژیان بەتایبەتی وەرزش كە كاریگەریەكەی زۆرترە، چونكە بواری وەرزش وەك بوارەكانی تری ژیان نیە، لەبەرئەوەی بواری وەرزش تەنها پارەی تێدا سەرف دەكرێت.

كوردستان ئاماژەی بەوەشدا" لەگەڵ یاریزانەكان قسە دەكەین‌و بەشێك لەو پارەیەی كە وەری دەگرن كە تەنها مووچەیە بەقەرز لەلای ئێمە بمێنێتەوە دوای تەوابوونی خولی پلەیەكیش پارەكەیان دەدەینەوە.

لای خۆیەوە یاد كەمال كاپتنی تیپەكە رایگەیاند" سوپاس بۆ خوای گەورە ئەمساڵ بەگور‌و تینێكی زۆرەوە بەشداری كێبركێكانی خولی پلەیەكی كوردستان دەكەین‌و دواكەوتنی خولەكە‌و بەشدارینەكردنی هەندێ‌ لەیانەكان كاریگەری تەواوی كردۆتە سەر یانەكان، بەڵام ئێمە وەك یانەی ئاشتی كە بۆ جاری سێیەمە مەشقەكانمان ئەنجام دەدەین‌و كێبركێكەش هەروا ئاسان نیە، لەبەرئەوەی كۆمەڵێك یانەی تێدایە كێبركێ لەسەر نازناوەكە دەكات لەگەڵ یانەی ئاشتی.

یانەی ئاشتی یەكێكە لەیانە كۆنەكانی كوردستان‌و ماوەی ١٠ساڵ لەخولی نایاب دووركەوتۆتەوە و ئەمساڵیش جیاواز لەساڵانی رابردوو دەیانەوێت خەونەكەیان ببێتە راستی‌و بۆ جارێكیتر سەركەونەوە بۆ خولی نایابی كوردستان.