یاریزانەكەی یانەی ئاشتی , لە پاڵەوانێكی ئێرانی بردەوە

سێ شەممە, 13 ئازار 2018 06:23

 

لەتارانی پایتەختی ولاتی ئێران‌و لەكۆمەڵگەی وەرزشی ئۆڵۆمپیك، پاڵەوانێتیی نێودەوڵەتی (موای تای، تای بۆكسینگ، بەبەشداری 17ولاتی جیهان كە زیاتر لە200 یاریزان لەكێشەكانی 52كم تا +91 تێدا بەشداربوون.

كارزان تەها یاریزانی یانەی ئاشتی دوای دژایەتیكردنیشی لەلایەن سەرپەرشتیارانی پاڵەوانێتیەكەوە توانی بەئاسانی لەپاڵەوانێکی ئێران لەكێشی سەرو قورس بباتەوە‌و مەدالیای ئاڵتون لەمل بكات.

ماكوان سەعید ئەندامی شاندی یانەی ئاشتی لەپاڵەوانێتیەكە لەولاتی ئێرانەوە ئەوەی بەدوارۆژ راگەیاند" كارزان لەپاڵەوانێتیەكەدا لەیەكەم یاری موای تایدا چاوەروان بوو، دواتر رووبەروی یاریزانێكی بەهێزی ئەهوازی بویەوە‌و توانی دوای ركابەریەكی بەهێز ئەو یاریە بباتەوە، هەروەها لەسێیەم یاریدا ركابەرەكەی كارزان بەهۆی پێكانەوە نەیتوانی یاری بكات‌و كشایەوە‌و كارزان بەبراوە دانرا.

ماكوان وتیشی" لەیاری فیناڵدا پاڵەوانەكەی ئاشتی رووبەرووی پاڵەوانێكیتری ئێرانی بویەوە، لەم یاریەشدا كارزان زۆر بەئاسانی‌و بەبێ‌ هیچ ركابەریەك ‌و بەجیاوازی زیاتر لە40خاڵ یاریەكەی بردەوە، بەڵام وەك پیشەی هەمیشەییان ناوبژیوان دەستی یاریزانە ئێرانیەكەیان كە دۆڕابوو بەرز كردەوە، ئەوەش نارەزایی زۆری یاریزان‌و راهێنەرە كوردەكانی لێكەوتەوە تەنانەت ئەو بریارە بووە جێگەی سەرسورمانی هاندەرانی ناو هۆڵەكەش.

ئاماژەی بەوەشدا" دوای رەخنەیەكی زۆر لەناوبژیوان‌و سەرپەرشتیاری پاڵەوانێتیە بەهۆی ئەو غەدرەی لەپاڵەوانەكەی ئاشتی كرا بەهەوڵ‌و ماندووبونی سەرپەرشتیار‌و راهێنەران توانییان نازناوی كێشی سەرو قورس بگەرێننەوە بۆ كارزان، بەوەش مەدالیا‌و بەڵگەی فەرمی فیدراسیۆنی موای تای ولاتی ئێرانی پێدراو بەرەسمی بووە پاڵەوانی پاڵەوانێتیە جیهانییەكە