كامەران جەبار : شەمەندەفەرەكەمان لەرێگایە و تا نەگەینە ئامانج ناوەستین

پێنج شەممە, 26 نیسان 2018 06:32

 

راهێنەری یانەی وەرزشی ئاسۆ دڵخۆشی خۆی نیشاندا بە بردنەوەی تیپەكەی بەرامبەر یانەی شەقلاوە و نزیكبوونەوە لە گەیشتن بە خولی پلە یەكی كوردستان".

كامەران جەبار راهێنەری یانەی ئاسۆ ، لە لێدوانێكی تایبەت بە پەیجی فەرمی یانەكەی وتی : "سوپاس بۆ خوای گەورە لەدەرەوەی یاریگای خۆمان لەیارییەكی چارەنووسساز و بەهێزدا سەربكەوین بەسەر یانەی شەقڵاوە بە ئەنجامی (2 – 1) گۆڵ".

كامەران وتیشی : " یارییەكە لەئاستێكی زۆر بەرزبوو بەڵام یاریزانانی ئێمە هەر زوو لە گێمی یەكەم دەستی خۆیان وەشاند و دوو گۆڵمان تۆماركرد ، لە گێمی دووەمیش بەهەمان ئاست دەركەوتین ، بەڵام لە كاتەكانی كۆتایی یارییەكەدا ، ناوبژیوان لێدانێكی سزای نا دروستی لەسەر ئێمە هەژماركرد ، چونكە حاڵەتەكە لەدەرەوەی ناوچەی سزابوو".

راهێنەری یانەی ئاسۆ ئەوەیشی وت : " سوپاس بۆ خوای گەورە ئێمە تەنها یەك هەنگاومان ماوە و دەگەینە یاری كۆتایی خولی پلە یەكی كوردستان ، شەمەندەفەرەكەمان لەرێگا و هەموو ئامادەكارییەكمان كردووە بۆ ئەوەی بگەینە ئامانجەكەمان و تا پێی نەگەین ناوەستین".

جێی باسە بەپێی خشتەی یارییەكان هاتووە ، یانەی ئاسۆ رووبەرووی یانەی بروسك دەبێتەوە ، براوەی ئەم یارییە دەگاتە قۆناغی پێشكۆتایی و بەشێوەیەكی فەرمی سەردەكەوێت بۆ خولی پلە یەكی كوردستان ، دۆراویش بەرامبەر براوەی شەقڵاوە و شێخان یاری دەكات".


 

رێكان عزیز