شێوازی بەڕێوەچوونی خولی پلە یەکی عێڕاق و رکابەرە بەهێزەکانی یانەی هەولێر بۆ سەرکەوتن بناسە

سێ شەممە, 12 حوزەیران 2018 06:56

 

بەشداریكردنی یانەی هەولێر لە خولی پلە یەكی عێڕاق گەرمترین بابەتی وەرزشی شەقامی وەرزشی شاری هەولێرە كە بڕیارە ركابەرییەكانی ئەم خولە دوای كۆتاییهاتنی مانگی رەمەزان دەسپێبكات و ١٨ یانە لەم خولە بەشدارن كە دابەشكراون بۆ ٣ گروپ بە پێی دابەشبوونی جوگرافی دوو گروپ ( ٥ ) یانە لە خۆدەگرن گروپەكەی بەغدادیش (٨) یانە لە خۆدەگرێت .
یانەی وەرزشی هەولێر ئامادەكارییەكانی بۆ ئەم خولە چڕكردۆتەوە بەشێك لە مەشقەكان و یارییە دۆستانەكانیشی بەهۆی بەرزی پلەی گەرما لە رۆژدا و بە رۆژوو بوونی یاریزانان، ئامادەكارییەكان بە شەو ئەنجام دەدات.
تاكو ئێستا هەشت یاریزانی نوێی بۆ ریزەكانی هێناوە چاوەڕوان دەكرێت لە ماوەی چەند رۆژی داهاتوو چەند یاریزانێكی دیكەش پەیوەندی بە ریزەكانی یانەكەی قەڵاومنارەوە بكەن.
چەند زانیارییەك لەسەر خولی یانە پلەیەكەكانی عێراق :
۱ـ ژمارەی یانە بەشداربووەكان (١٨) یانەیە
۲ـ خولەكان بەشێوازی گروپ و یارییەكانیش بە سیستەمی چون و هاتن بەرێوە دەچێت
۳ـ یانەكان بە پێی دابەشبوونی جوگرافی دابەش دەكرێن بە سەر (٣) گروپ دوو گروپ (٥) یانە لە خۆدەگرێت جگە لە گروپەكەی شاری بەغداد كە ( ٨ ) یانە لەخۆدەگرێت.
بەمشێوەیە: گروپی یانەكانی باكور و رۆژئاوا، گروپی یانەكانی بەغداد، گروپی یانەكانی باشور و فوڕاتی ناوەڕاست.
٤ـ یاریەكانی هەر گروپێك بەشێوازی چون و هاتن دەبێت و دوو یانەی سەرەوەی ریزبەندی سەردەكەون بۆ قۆناغی دووەم لە گروپەكەی بەغدادیش ٤ یانە سەردەكەون.
٥ـ كەواتە ژمارەی یانە سەركەوتووەكانی قۆناغی دووەم دەبێتە (۸) یانە ،و دابەش دەكرێن بۆ سەر دوو گروپ.
٦ـ هەر گروپێكی قۆناغی دووەم یاریەكانی بەشێوازی چون و هاتن دەبێت و یەكەمی هەردوو گروپ سەردەكەون بۆ خولی نایابی عێراق.
۷ـ یاریەكانی خولی پلە یەك لەدوای مانگی پیرۆزی رەمەزان دەسپێدەكات.
ئەمڕۆ یەكشەممە رێككەوتی ١٠ ـی حوزەیران بە ئامادەبوونی جێگری دووەمی سەرۆكی یەكێتی تۆپی پێی عێڕاق و سەرۆكی لیژنەی پێشبڕكێكان لەم یەكێتیە لە شاری بەغداد لەگەڵ نوێنەری هەر هەشت یانەكەی بەغداد كۆبوونەوەیەك ئەنجامدرا و بە راسپاردە و رەزامەندی سەرجەم یانەكان بڕیاردرا هەر هەشت یانەكەی شاری بەغداد لە یەك گروپ كۆبكرێنەوە و یارییەكانی بە سیستەمی یەك گروپ بەڕێوەبچێت دوای راكێشانی تیروپشكیش یارییەكانی گەڕی یەكەم بەمشێوەیە بوو كە ئەو یانەی زووتر ناوی هەلبژێردرا یارییەكە لە یاریگەی ئەو ئەنجامدەدرێت :
ختوت × موهەندسین
سڵێخ × شەباب ئەل-عەدل
سناعە × دیفاع مەدەنی
ئیتساڵات × جەیش
بە پێی لێدوانە بەردەوامەكانی بەرپرسانی یانەی هەولێر و ستافی راهێنەران و یاریزانان، ئامانجی یانەی هەولێر لە بەشداریكردن لەم خولە گەڕانەوەیە بۆ خولی نایابی عێڕاق بۆ ئەم مەبەستە و بە پێی ئەنجامی یارییەكانی پاڵاوتنی هەر پارێزگایێك و بە لەبەرچاوگرتنی ئەو یارییە دۆستانانەی ئەنجامیانداوە جگە لە هێنانی یاریزانی ئاست بەرز، پێشبینی دەكرێت هەریەك لە یانەكانی ( ئیتساڵات لە شاری بەغداد مەسافی باشور لە پارێزگای بەسڕا و عەفك لە فوڕاتی ناوەڕاست ) ركابەری سەرسەختی یانەی هەولێر بن بۆ سەركەوتن بۆ ریزی یانە نایابەكانی عێڕاق چونكە ئەم دوو یانە ئاماژەپێكراوە لە یارییە دۆستانەكاندا تەنانەت سەركەوتن بەسەر یانە گەورەكانی عێڕاق لە نمونەی یانەكانی ؛ قوەجەوییە، شوڕتە، تەڵەبە و مینا و نەوتی باشور.
گروپەكەی یانەكانی باشور پێكدێت لە : ناسڕییە، مەسافی باشور، عەفك ، قاسم و كوفە
ئەوەی تایبەتیش بێت بە گروپەكەی باكور و رۆژئاوای عێڕاق جگە لە یانەكانی هەولێر ، موسڵ، ڕومادی تاكو ئێستا ناسنامەی یانەكانی دیكەی بەشدار لەم قۆناغەی خولەكە ناروونە. سەرەڕای ئەوەش یانەی رومادی لە ئێستادا لە كێشەیەكی گەورە و قوڵی داراییە و چەندین یاریزانی بەهۆی پێنەدانی مافە داراییەكانیان ئامادەی مەشقەكان نابن.

ئاری عەبدوڵڵا