تیپی كچانی ئەكاد ، بۆندی لەگەڵ راهێنەرێكی نوێ واژۆ كرد

دوو شەممە, 18 حوزەیران 2018 07:27

 

دوای ئەوەی لە شاری بەغداد نازناوی پاڵەوانیەتی باسكەی كچانی یانەكانی عێڕاقی لە بەرژەوەندی كچانی هەڵەبجەی شەهید لە دەستدا، تیپی باسكەی كچانی ئەكاد بە بەرگێكی تازەوە خۆی دروست دەكاتەوە و راهێنەرێكی نوێی بۆ بەهێزكردنی تیپەكە هێناوە هاوكات چەند یاریزانێكی نوێ بانگهێشی یانەكە كراون.
تیپی باسكەی كچانی یانەی ئەكاد كە پێشووتر هەڵگری نازناوی پاڵەوانیەتی باسكەی عێڕاق بوو بەر لەوەی كچانی هەڵەبجه نازناوەكەیان لە چنگ دەربهێنن، دەیەوێت بە شێوازێكی نوێوە بگەڕێتەوە گۆڕەپانی ركابەرییەكان و سەرەڕای ئەوەی وادەی هیچ جۆرە پاڵەوانیەتیەكی كوردستانی و عێڕاقی دیاری نەكراوە، مەشقە ئامادەكارییەكانی دەسپێكردووە.
لە چوارچێوەی بەهێزكردنی تیپەكەش رۆژی ١٦ ـی حوزەیران كارگێری یانەكە گرێبەستی لەگەڵ راهێنەرێكی نوێ ئیمزاكرد دوای ئەوەی بۆ ماوەی دوو مانگ تیپەكە هەڵوەشێنرایەوە و ئێستا سەر لە نوێ دروستكرایەوە.
گرێبەستەكەی راهێنەرە نوێیەكە بە ئامادەبوونی ئەندامانی دەستەی كارگێڕی یانەی ئەكاد و سەرپەرشتیاری تیپی تۆپی باسكەی یانەكە ( موئەیەد سلێوا ) ئیمزاكرا كە راهێنەرەكە بە رەگەز سورییە و ماوەی ٤ ساڵە بەهۆی رووداوەكانی ئەم وڵاتە، پەناهەندەی هەرێمی كوردستان بووە.
( سائیب محەمەد) ئەم راهێنەرە سوریەیە كە لە ماوەی داهاتوو دەبێتە راهێنەری تیپی كچانی باسكەی ئەكاد و كارگێڕی یانەكە مەبەستییەتی تیپەكە بە ناسناوی خولی كوردستان و عێڕاق شادبكاتەوە.
لە لێدوانێكی تایبەتدا بۆ دوارۆژ موئەیەد سڵێوا سەرپەرشتیاری تیپی تۆپی باسكەی یانەی ئەكاد رایگەیاند كە ماوەی ٢ مانگ بوو تیپی باسكەی كچان هەڵوەشێنرایەوە و دوای ئەم ماوەیە ئێستا سەرلەنوێ تیپەكەمان دروستكردۆتەوە بۆ ئەوەی بەهێزەوە بگەڕێینەوە نێو ركابەرییەكان و تیپێكی بەهێز بین.
سڵێوا وتی لە دواهەمین پاڵەوانیەتی كە لە شاری بەغداد بە بەشداری ٨ یانە بەڕێوەچوو، بۆ ئێمە جێگەی سەرسوڕمان بوو كە نازناوەكەمان لە بەرژەوەندی یانەی هەڵەبجەی شەهید لە دەستدا بۆیە دەمانەوێت خاڵە لاوازەكانمان چاك بكەینەوە و یاریزانی بە توانا بۆ ریزەكانی تیپەكە بانگهێشبكەین لە ماوەی داهاتووش كەمپێكی مەشقی ١٠ رۆژی بۆ كچە یاریزانەكان ئەنجامدەدەین.
لە كۆتایی لێدوانەكەیدا سەرپەرشتیاری تیپی باسكەی یانەی ئەكاد وتیشی لە ماوەی رابردوو كچە یاریزانەكان سەرقاڵی تاقیكردنەوەكانی كۆتایی ساڵ بوون بۆیە بە باشمانزانی بە شێوەیەكی كاتی تیپەكە هەڵبوەشێنینەوە و سەرلەنوێ دروستی بكەینەوە.
یانەی وەرزشی ئەكادی سەر بە شارۆچكەی عەینكاوەی كریستیان نشینی شاری هەولێر، گرنگییەكی تایبەت بە تیپی كچان دەدات و لە زۆرێك لە یارییە وەرزشییەكان تیپی كچانیان هەیە و بەوە ناسراوە كە یاریزان پێدەگەیەنێت.
لە دواهەمین پاڵەوانیەتی باسكەی كچانی عێڕاق ، لە كۆی پێنج یاری تەنها یەك یاری دۆڕاند ئەویش لە یاری كۆتایی پاڵەوانیەتیەكە بوو بەرامبەر كچانی هەڵەبجەی شەهید .
كاروانی ئەنجامەكانی تیپی كچانی ئەكاد لە پاڵەوانیەتی باسكەی عێڕاق:
ئەكاد × دەربەندیخان ٦٤-٤٦ خاڵ
ئەكاد × ختوت ٤١ – ٢٠ خاڵ
ئەكاد × دیوانییە ٥٢ – ٣٦ خاڵ
ئەكاد × سناعەت كارەبا ٥٤ – ٣٤
ئەكاد × هەڵەبجەی شەهید ٥٩ – ٦٣


 

ئاری عەبدوڵا