بۆ یەكەمجار لەمێژووی كاراتی كوردستان كونسوڵی ژاپۆن سەردانی رێكخراوی گەشەپێدانی كاراتی كرد

دوو شەممە, 16 تەمموز 2018 06:25

 

بۆ یەكەمجار لەمێژووی كاراتی كوردستان‌و سلێمانی بۆ زیاتر دروستكردنی پەیوەندی لەنێوان كاراتی وڵاتی ژاپۆن و شاری سلێمانی كاتسۆمی موریاسو كونسوڵی وڵاتی ژاپۆن سەردانی رێكخراوی گەشەپێدانی كاراتی لەشاری سلێمانی كرد.
ئامانج لەسەردانەكەی كونسوڵی ژاپۆن لەنزیكەوە ئاگاداربوون‌و دروستكردنی پەیوەندییە لەگەڵ رێكخراوەكە بۆ ئەوەی بۆ داهاتوو لەگەڵ ولاتی ژاپۆن پەیوەندی وەرزشی‌و هونەری‌و زانستی‌و رۆشنبیری دروست بكەن.
دوای گەیشتنی بەرێكخراوەكە لەلایەن راهێنەر‌و یاریزانان‌و ئامادەبووانی هۆڵەكەوە پێشوازی لەكونسوڵی ژاپۆن كرا‌و دواتر لەلایەن كۆمەڵێك لەیاریزانانی كوران‌و كچان‌و بەتەمەنەكان نمایشێكی كاراتیان ئەنجامدا.
كاتسۆمی كوریاسو كونسوڵی وڵاتی ژاپۆن ئەوەی راگەیاند" خۆم بەبەختەوەر دەزانم كە لەم كاتەدا سەردانی ئەم قوتابخانەكەیەم كرد كە كۆمەڵێك یاریزانی مناڵان‌و گەنجان‌و بەتەمەنی لێیە‌و راهێنانیان پێدەكات‌و ئەو نماییشەی پێشكەشیان كرد جێگەی سەرسورمانی من بوو، لەبەرئەوە هەوڵەكانمان دەخەینە گەر بۆ داهاتوو پەیوەندی لەنێوان ئەم رێكخراوە‌و وڵاتی ژاپۆن دروست بكەین لەنێوانان یاریزانان.
وتیشی" پەیوەندیەكانمان تەنها لەبواری وەرزشدا نیە، بەڵكو هەوڵدەدەین لەبوارەكانی كۆمەڵایەتی‌و رۆشنبیری‌و هونەری لەنێوان یاریزانانی هەردوو وڵات دروست بكەین.
لەلای خۆیەوە فواد نوری بەرپرسی رێكخراوی گەشەپێدانی كاراتی سلێمانی ئەوەی بەدوارۆژ راگەیاند" شتێكی زۆر گرنگە بۆ ئێمەی راهێنەران‌و یاریزانان كورد كە كەسایەتیەكی سیاسی‌و دپلۆماسی وڵاتانی جیهان سەردانمان بكەن‌و بەچاوێكی گرنگەوە سەیری ئێمە بكات، دوای ئاگادار كردنەوەمان بەرێزیان سەردانیان كردین بۆ ئەوەی لەنزیكەوە ئاگاداری ئیش‌و كارەكانی رێكخراوەكەمان بێت گەشەپێدانی كاراتی، بۆیە سەردانی ناوبراو گرنگیەكی زۆری دەبێت بۆ دوارۆژی كاراتی كوردستان.
ئەوەشی خستەروو" كونسوڵی ژاپۆن بەڵێنی ئەوەی پێداین كە پەیوەندییەكانمان لەسەر ئاستی وڵاتی ژاپۆن پەرەپێبدەین‌و ئێمە سەردانیان بكەین یاخود ئەوان شارەزای یاریەكەمان بۆ بنێرن، بەهۆی زۆری یاریزانانمان كە نزیكەی 600 یاریزان دەبن لەسەرجەم ئاستەكان دابەشكراون بەسەر چەندین هۆڵی تایبەت بەخۆمان لەپارێزگاكانی سلێمانی‌و هەڵەبجەی شەهید‌و هەولێر، هەر ئەوەش وایكردووە كە كونسوڵی ژاپۆن سەردانمان بكەن، بۆیە ئێمە دەمانەوێت یاری كاراتی بخەینە سەر رێگە زانستیەكەی بەشێوەیەكی تەندروست‌و سود لەهەڵەكانی رابردوومان وەربگرین‌و بەهەموومان یاری كاراتی پێشبخەین.
رێكخراوی گەشەپێدانی كاراتی رێكخراوێكی سەربەخۆیە‌و خاوەنی مۆڵەتن لەلایەن حكومەتی هەرێمەوە‌و تایبەتە بەیاری كاراتی‌و چەندین یاریزان لەكوران‌و كچان‌و بەتەمەن لەم رێكخراوەدان.


 

ئەردەڵان محەمەد