كاپتنە كوردەكە تا كۆتایی ئەمساڵ لەئالسڤێنسكانی سویدی بەردەوام دەبێت

پێنج شەممە, 19 تەمموز 2018 06:38

 

دواجار كاپتنە كوردەكەی یانەی هاماربی سویدی بڕیاریدا بەدرێژایی ئەم وەرزە لەگەڵ یانەكەیدا لەخولی نایابی تۆپی پێی یانەكانی سوید (ئالسڤێنسكان) بەردەوام بێت.
پاش ئەوەی لەبازاڕی هاوینەی كڕین و فرۆشتن و هاتن و چوونی نێوان یاریزانان (میركاتۆ)، چەندین یانەی دەرەكی لەوانە یانەكانی بۆندس لیگای ئەڵمانی و ئایك ئەسینای یۆنانی و لۆس ئەنجلس گالاكسی ئەمریكی و تاد.. لەسەر هێڵ و لەپەیوەندی دابوون بۆ گواستنەوەی ژیلوان حەمەد-ی یاریزانی نێودەوڵەتی كورد و كاپتنی یانەی هاماربی، وەك خۆشی ئاشكرای كردبوو دەرچوونی لەیانەكەی پەنجا بەپەنجایە، بەڵام لەكۆتاییدا بڕیاری مانەوەی و پابەندبوونی بەوادەی بۆندەكەی دا كە تا كۆتایی ئەمساڵە و دواتر دەتوانێت وەك یاریزانێكی ئازاد رووبكاتە هەر یانەیەك كە خۆی مەبەستێتی.
سەرەڕای ئەوەی یانەی هاماربی لەبەرامبەر رۆیشتن و دەستبەرداربوون لەكاپتنە كوردەكەی بۆ 6 مانگ داوای 6 ملیۆن كڕۆنی سویدی دەكرد، بەڵام لەهەمان كاتدا مەرجەكەی بۆ رێگری بوو لەڕۆیشتنی و سوود وەرگرتنی زیاتر بوو لەئەزموونی یاریزانەكەی هێڵی ناوەندی تا بتوانێت بەنازناوی خولی نایاب (ئالسڤێنسكان)ی 2018 شادبێت.
نیازی یانە سویدییەكەی كاپتن ژیلوان روونە و پلانی هەیە و دەیەوێت پاش كۆتایی هاتنی ماوەی بۆندەكەشی ژیلوان لەڕیزەكانیدا بیهێڵێتەوە و وەك لەبەرنامەی دایە بۆ چەند ساڵێكی تریش بۆندی لەگەڵدا واژووبكات.
وەك میدیاكانی سویدی باسی لێوە دەكەن ئەگەر هات و ژیلوان حەمەد-ی تەمەن 27 ساڵ ئۆكەی مانەوە و بەردەوام بوون لەگەڵ یانەكەیدا بدات، ئەوا یانەكەش ئامادەیی تێدایە بڕی بۆند و مووچەكەی بەرزبكاتەوە كە مووچەكەی ئێستای 100 هەزار كڕۆنی سویدییە.
شایەنی باسە كاپتن ژیوان محەمەد حەمەد ئەڵڵاوێردی (ژیلوان حەمەد)، خەڵكی شاری رانیەی دەروازەی راپەڕینە و تائێستا لە 13 یاری قۆناغی یەكەمی خولی نایابی یانەكانی سوید (ئالسڤێنسكان)ی 2018دا، 1031 خولەك یاری كردووە و توانیویەتی 6 گۆڵ تۆمار و 5 گۆڵی تریش سازبكات.


 

سەنگەر زرار