ناوبژیوانێكی كورد یارییەكانی خولی یانە پاڵەوانەكانی ئاسیا بەرێوەدەبات

چوار شەممە, 08 ئاب 2018 07:00

 

لەئێستادا لەولاتی ئەندەنوسیا ركابەریەكانی پاڵەوانێـتی فوتساڵی یانە پاڵەوانەكانی ئاسیا بەبەشداری 16یانە درێژەی هەیە‌و ناوبژیوانێكی نێودەوڵەتی شاری سلێمانیش وەك تاكە ناوبژیوانی كورد بەشداری بەرێوەبردنی یاریەكانی پاڵەوانێتیەكە دەكات.
هاوكار سالار ناوبژیوانی نێودەوڵەتی شاری سلێمانی لەیاری فوتساڵدا لەوڵاتی ئەندەنوسیاوە بەدوارۆژی راگەیاند" دەستنیشانكردنی بەندە وەك ناوبژیوانی پاڵەوانێتیەكە دوای ئەوە هات كە یانەی نەوتی ناوەراست وەك پاڵەوانی عێراق بەشداری پاڵەوانێتیەكەی كردووە، هەروەها دەستنیشانكردنی ناوبژیوانیش لەسەر دوو خاڵە یەكەمیان لەسەر توانای ئاستی ناوبژیوانەكە‌و دووەمیان لەسەر شێوازی بەرێوەچوونی یاریەكانە، سوپاس بۆ خوا توانیومە ئاستێكی باش پیشان بدەم ئەوەش دوای تەواوبوونی ئەو یاریانەی كە ناوبژیوانیم تێدا كردووە لەلایەن یەكێـتی ناوبژیوانانی ئاسیاوە دەست خۆشیم لێكراوە‌و بەپێچەوانەوە هەر تێبینیەكیان هەبوو بێت لەسەرم پێیان راگەیاندووم.
هاوكار ئەوەشی خستەروو" بەردەوامبوونی من پەیوەستە بەیاریەكانی یانەی نەوتی ناوەراستەوە، ئەگەر سەرجەم قۆناغەكان ببرێت‌و بگاتە یاری كۆتای من ناتوانم كاری ناوبژیوانی بكەم، بەڵام بەپێچەوانەوە، ئەگەر ماڵئاوایی بكات دەتوانم من بەردەوام بم لەكاری ناوبژیوانێتی لە خولەكەدا.
ئەوەی جێگەی باسە" ئەو گۆرانكاریانەیە كە بەسەر یاسای یاریەكەدا هاتووە بەئێمە ناگات، لەبەرئەوەی یاسای تۆپی پێ زۆر گەورەیە ئەوەش هۆكارەكەی بۆ یەكێتی تۆپی پێی كوردستان‌و عێراق دەگەرێتەوە كە چالاكی ئەنجام نادەن تائێمەش ئەو گۆرانكاریانە بەناوبژیوانان بڵێینەوە، ئەگەر هەردوو یەكێتیەكە سیستەمێكیان نەبێت بۆ پێشكەوتنی ئاستی ناوبژیوان بەدڵنیاییەوە ئاستی ناوبژیوان قەت بەرەو پێش ناروات.
لەپاڵەوانێتی خولی پاڵەوانەكانی ئەوروپا هاوكار سالار ناوبژیوانی نێودەوڵەتی یاری فوستاڵ تائێستا چوار یاری بەرێوەبردووە لەدوو یاریدا وەك ناوبژیوانی ناوەراست‌و لەدوو یاریشدا وەك ناوبژیوانی مێز ناوبژیوانێتی كردووە.


 

ئەردەلان محەمەد