راپۆرت ... ئەمرۆ كرواتیا و ئینگلتەرا بۆ یاری كۆتایی ئێسكی یەكتر دەشكێنن

چوار شەممە, 11 تەمموز 2018 06:18

 

هەڵبژاردەی ئینگلتەرا لەژێر رۆشنایی خەونێك دەژی ئەویش دووبارەكردنەوەی یاری كۆتایی مۆندیالی ساڵی 1966ـە ئەویش بەمەرجی تێپەراندنی بەربەستی زەحمەتی هەڵبژاردەی كرواتیا".
هەڵبژاردەی ئینگلتەرا بەشێوەیەكی تۆكمە ریزەكانی خۆی رێكخستۆتەوە و بەسەركردایەتی گاریس ساوسگەیت هاتۆتە نێو كێبركێیەكانی مۆندیال و دووری ئەو و یاری كۆتایی تەنها (90) خولەكە".
بریارە ئێوارەی رۆژی چوارشەممە كاتژمێر (9:00)ـی شەو بەكاتی هەولێر لەیارییەكانی قۆناغی پێشكۆتایی مۆندیال هەردوو هەڵبژاردەی ئینگلتەرا و كرواتیا رووبەرووی یەكترببنەوە".
هەڵبژاردەی كرواتیا جگە لە ئەنجامدانی یاری كۆتایی بیر لە هیچ شتێكی دیكە ناكەنەوە ، دەشزانن ئەمەیان بۆ ناچێتە سەر بەتایبەت كاتێك لەیارییەكی بەهێز رووبەرووی ئینگلتەرا دەبنەوە".
هەڵبژاردەی كرواتیا یەكێكە لە باشترین هەڵبژاردەكانی مۆندیالی رووسیا ،لە قۆناغی كۆمەڵەكان توانیان بە ئەنجامی (3 – 0) لە ئەرجەنتین ببەنەوە".
كرواتیا تاكە خالی لاوازی هەبێت ئەنجامدانی زۆرترین خولەكە لە مۆندیال ، چونكە لەدوو یاری لەسەر یەكتری قۆناغی (16) و قۆناغی چارەكی كۆتایی دووجار (نیو) كاتژمێری كاتی زیادكراوی ئەنجامداوە ، هەروەها دووجار رووبەرووی لێدانی یەكلاكەرەوە بۆتەوە".
هەرچی ئینگلتەرا لەیارییەكدا بەرامبەر كۆڵۆمبیا زەحمەتی زۆری بینی و هەمان دەردی كرواتیای چەشت ، بەڵام لەیاری قۆناغی چارەكی كۆتایی بەرامبەر سوید ناخۆشی كەمتر چەشت و لەماوەی (90) خولەك توانی دوو گۆڵ تۆمار بكات و بگاتە قۆناغی پێشكۆتایی".
هەڵبژاردەی كرواتیا بەسەركردایەتی زلاتكۆ دالیچ توانی سیناریۆی ساڵی (1998) دووبارە بكاتەوە كاتێك گەیشتنەوە بە قۆناغی پێشكۆتایی ، بەڵام ئەوان تامی رابردو نازانن و دەیانەوێت لەساڵی (2018) بگەن بە یاری كۆتایی و نزیكیش بن لە بەدەستهێنانی خەونی مۆندیال".
هەڵبژاردەی كرواتیا لەلایەن لوكا مۆدریچی پاڵەوانی ئەوروپا سەركردایەتی دەكرێت ، ئەم یاریزانە لەكاتی گەیشتنی بە یاری كۆتایی ئەگەرێكی زۆر دەبرێت بۆ گەیشتن بە نازناوی باڵۆن دۆر".
ئێستا ئینگلتەراش تەنها یەك دروشمی بەرامبەر ركابەرەكانی بەرزكردۆتەوە ئەویش گەراندنەوەی نازناوی مۆندیالە بۆ ماڵەكەی خۆیان كە توانیان لەساڵی (1966) بەدەستی بهێنن ، بەسیستەمی (ئێچ دیش) دەیانەوێت نیشانی هاندەرانیان بدەن".


 

رێكان عزیز