ئەمشەو لەقۆناغی پێشكۆتایی جامی رابیتە ئینگلیزی مان سیتی و بێرتن ئەلبیۆن بەیەك دەگەن

23/01/2019 - 08:30 بڵاوکراوەتەوە لە وەرزش/جیهانی

 

ئەمشەو لەكاتژمێر 10:45 لەسەر یاریگای بیریلی ستادیۆم یاری چوونی پێشكۆتایی جامی رابیتەی یانەكانی ئینگلتەرا لە نێوان هەردوو یانەی بێرتن ئەلبیۆن و مانچستەرسیتی ئەنجام دەدرێت".

بەڕێژەیەكی زۆر مانچستەرسیتی گەیشتنی بەیاری كۆتایی جامەكە مسۆگەر كردووە پاش ئەوەی لەیاری هاتن بە نۆ گۆڵی بێ بەرامبەر بردنەوەی بەدەستهێنا".

مانچستەرسیتی لەم یارییەدا بباتەوەو بەرامبەر بێت یانیش بە جیاوازی هەشت گۆڵیش بدۆرێت دەگاتە یاری كۆتایی ، دۆرانیش بەم جیاوازییە زۆرە كارێكی ئەستەمە".

پێشبینی دەكرێت لەم یارییەدا پیپ گواردیۆلای راهێنەر پشوو بە چەند یاریزانێكی سەرەكی بدات تا بۆ یارییەكانی داهاتووی تیپەكە لەخولی نایابی ئینگلتەرا و خول و پاڵەوانێتیەكانی تر بە توانایەكی جەستەیی باشتر ئامادەی یارییەكان ببن و دووربن لەهەر پێكانێك و سزادانێك".

هەرچی یانەی بیرتن ئەلبیۆنە ئەركێكی زۆر زەحمەت چاوەڕێی دەكات پێشبینی ناكرێت بە ئاسانی لە یاریگا بێتە دەرەوەو ئەنجامێكی باش تۆمار بكات، ئەم تیپە هەموو هەوڵێكی بۆ ئەوەیە لەم یارییەدا بەئەنجامێكی قورس توشی دۆران نەبێتەوەو هەوڵ دەدات بەسەربەرزی ماڵئاوایی لە جامەكە بكات و ئەنجامێكی وا بەدەست بهێنێت ، ئەنجامی یاری هاتن بە چاوەڕوان نەكراو بزانێت".