بزاڤ بۆ ژێكجوداكرنا گلێشێ ته‌ڕ و هشك ل دهۆكێ و سێمێلێ دهێنه كرن
کوردیو-دھوک
به‌رپرسێ پشكا ژینگه‌هێ ل رێڤه‌به‌ریا گشتیا باژێرڤانیان ل پارێزگه‌ها دهۆكێ و نوونه‌رێ رێكخراوا VNG یا هۆله‌ندی دیار كر، ل 15/6/2020 پرۆژه‌یێ ژێكجوداكرنا گلێشێ ته‌ڕ و هشك ل سنوورێ قه‌زا دهۆك و سێمێلێ ب هاریكاریا رێكخراوا هۆله‌ندی ده‌ستپێكریه و دێ بۆ ماوێ دوو مه‌هان یێ به‌رده‌وام بیت و ل 15/8/2020 دێ پرۆژه ب داوی هێت و لێنێرین ل ئه‌نجامێن پرۆژه‌ی هێته كرن.
ئه‌ندازیار دیار سادق، به‌رپرسێ پشكا ژینگه‌هێ ل رێڤه‌به‌ریا گشتیا باژێرڤانیان ل پارێزگه‌ها دهۆكێ و نوونه‌رێ رێكخراوا VNG یا هۆله‌ندی دیار كر، رێڤه‌به‌ریا گشتیا باژێرڤانیان ل پارێزگه‌ها دهۆكێ ب هه‌ڤكاری و پشته‌ڤانیا رێكخراوا VNG یا هۆله‌ندی ل گۆره‌ی پرۆگرامێ مه‌سار بۆ پشته‌ڤانیا حكوماتێن ناڤخۆیی، بۆ جارا ئێكێ دێ چالاكی و ڤه‌كۆلینێن خوه ل دۆر ژێكجوداكرنا گلێشێ ته‌ڕ و هشك ل ناڤ مالان دا بجهئینیت و ئێدی دێ بزاڤ هێنه كرن هه‌ر خێزانه‌ك دوو حاویێن گلێشی ل مالا خوه بدانیت، بۆ هندێ زێده‌تر مفا ژ گلێشی ل كارگه‌ها كواشێ یا ژێكڤاڤارتنا گلێشی بهێته وه‌رگرتن.
ئاشكرا ژی كر، هه‌موو هه‌ول دێ هێنه دان گلێشێ ته‌ڕ و هشك ل ناڤا مالان دا ژێك بهێته جوداكرن و نها ب تنێ ڤه‌كۆلین تێدا دهێته كرن كا دێ چه‌ند یێ سه‌ركه‌فتی بیت و بۆ ڤێ چه‌ندێ ژی 384 سامپل ل دهۆك و سێمێلێ هاتینه دابه‌شكرن و بزاڤ هاتینه كرن هه‌ر ماله‌ك دوو حاویێن گلێشی بدانن و ل ناڤ مالێن خوه دا گلێشی ژێك جودا بكه‌ن.
ئه‌ندازیار دیار سادق، به‌رپرسێ پشكا ژینگه‌هێ ئاماژه ب هندێ ژی دا كو ژێكجوداكرنا گلێشی ل كارگه‌ها ژێكڤاڤارتنێ گه‌له‌ك یا ب زه‌حمه‌ته و ئه‌گه‌ر ئه‌ڤ كاره ل ناڤا مالان دا بهێته كرن دێ كارێ مه ب ئاسانتر لێ هێت و زێده‌تر مفای بۆ حكوومه‌تێ ڤه‌گه‌رینیت.
