هێرشێن ئۆپوزسیۆنا سۆرى و فاکتەرێن سەرکەفتنێ..

د ماوێ چەند رۆژەکێن کێمدا د نێزیکى (100) دەمژمێراندا ڕژێما دکتاتۆرا سۆرى و هەفپەیمانێن ویێن ئیرانى و لوبنانیێن شیعى ل دەور و بەرێن (20%) ژ ئاخا سۆریا ژ دەستدان، و ئەو ڕێژەیە کەفتە ل ژێر دەستێن شۆڕەشڤانێن وى وەڵاتی، پشتى هێزێن چەکدارێن ئۆپوزسیۆنێ هێرشەکا ژ نشکەکێڤە ژبۆ سەر گۆند و باژێرکێن دەور و بەرى ئەدەلبێ و باژێرێ ستراتیژیکێ حەلبى کرین، و بۆیە سپڕایەزەکا لەشکەرییا ئێکجار مەزن، هەتا د خەوناندا ژى نە چاڤەڕێکری بوو، چ ژ بۆ هێزێن سوپایێ سۆرى بت هەتا ژ بۆ ئۆپۆزسیۆنێ ب خوەژى تشتەکێ زۆر سەیر بوو!
هێزێن ئۆپوزسیۆنێ ب پشکدارییا (هیئة تحریر الشام)، (أحرار الشام)، (الجبهة الوطنية للتحرير)، (الجیش الوطني السوري)، (جيش العزة) ئۆپەڕاسیۆنەکا سەربازى ب ناڤێ (رد العدوان- ڤەگەڕاندنا دژمنکاریێ) دانەڕێ، و سەرکەفتن ل دویڤ سەرکەفتنێ ئینان.
جارێ ژ بلی بەرهەڤی و پلان و تەرتیباتێن ژ بۆ ناڤچێ و ڕۆژهەلاتا ناڤینا مەزن ئەوێن دهێنە نیگاركێشان و سۆریا ناڤۆك و سەنتڕاڵە ژبۆ وێ لەیزتنا مەزنا ب ئاخ و ئینسانێن ڤی ڕەخێ جیهانێ كەرەكە نێزیك دێ دەست پێ هێتە كرن، جارێ دا وێ بدینە ڕەخەكێ، بلا بێژین: گەلۆ ئەگەرێن ڤان بۆیەر و هێڕشێن د چەند ڕۆژێن بووریدا ڕویدایین ل گەل فاکتەرێن سەرکەفتنێن مەزن چنە؟
بخواندنەكا شڕۆڤەكاری ژ بۆ ديمەنێ سیاسیێ سۆری ژ مەڕە خوەیا دبت، ئەڤێن ل خوارێ گرنگترین فاكتەر و ئەگەرن:
1.هەر ژ ناڤێ ئۆپەڕاسیۆنێ (رد العدوان- ڤەگەڕاندنا دژمنکاریێ) دیارە و پاشان ژ لێدوانێن هندەک سەرکردەیێن لەشەکەرى یێن ئۆپوزسیۆنێ ژى دۆپاتبوو کو ئارمانج ل دەستپێکێ بەرسڤدانا تەعداکرنا سوپایی ڕژێما سۆرى بوو، کو چەندین هێرشێن ئەسمانى بۆ سەر هندەک باژێرێن ل ژێر کونتڕۆڵا ئوپۆزسیۆنێ ئەنجام ددان و بەردەوام بوون، تێدا چەندین وەڵاتیێن سڤیل ببوون قوربانى، لێ هەلوەریانا هێزێن سوپایێ ڕژێما سۆرى و شکەستنا وى یا دڕاماتیکى یا بلەز "وێرى" دایە ئۆپوزسیۆنێ هێڕشێن خوە توند و بەرفرەفرەهـ و درێژ بکن، هەتا دووەمین باژێڕێ مەزنێ سۆرى (حەلەب) و هەمى (ئەدلب) و دەور و بەرێن وێ و تا چووینە د ناڤا باژێرێ (حەماه)ـدا ژى ، و چار فڕۆکخانەیێن مەزن کەفتنە ل ژێر دەستێن شۆڕەشڤانان، ژ بلى چەندین جهێن دیترین ستراتیژى و چەندین فرۆکەیێن شەڕى ژى کەفتنە د دەستێن واندا.
2- ئەگەرا دووێ ژ بۆ ڤێ سەرکەفتنا بەرفرەهـ ئەڤەیە:
تێکچوونا هەڤسەنگییا هێزێن مەزن، (ڕۆسیا، تورکیا، ئیران) و هەتا ئەمریکا ژى، لەوا دەرفەت پەیدابوو، هەر زوى هێزێن ئۆپوزسیونێ پێنگاڤێن مەزن پاڤێژن، یا دیارە ڕۆسیا چەند یا ب شەڕێ ل دژى ئۆکڕانییا شەپرزەیە و ئێدێ مینا بەرێ هێزێن ئەسمانى ژ بۆ ئێکلاکرنا شەڕى د بەرژوەندییا بەشار ئەسەدى ل سۆریا ب کارنائینت، ئیڕان ژى نەشێت وەکى بەرى ژ ئەگەرێ کورزێن دژوارێن ئسرائیل ل دژى وێ شەڕى بۆ (ئەسەدى) ل دژى نەیارێت وى ب شارینت.
3. ئەو ڤاڵاهییا میلیشییا (حزب الله) ل باکۆڕێ سۆریا، ل حەلەبێ و ل هندەک جهێن دیتر هێلاى، پشتى ڕویدانێن دەرهاڤێژەیێن شەڕێ ل دژى (غەزە) و ل دژى لوبنانێ و نەمازە ل دژى(حزب الله) بخوە، هەمى بوونە ئەگەر ئێدێ دەستێن ئۆپوزسیۆنى بلەز و بهێز ڕابببن و پارێزەرەک بهێز مینا بەرێ ژ بۆ هێزێن چەکدارێن ڕژێمێ ل بەر چاڤێن خوە نەبینن، لەوا گورز ل سەر سەرێن دژمنێن خوە وەشاندن، و ئەو بیاڤێ مەزن ژ ئاخا سۆریا بۆ خوە کونتڕۆلکرن.
4. خلۆلەیی و لاوازییا خۆیەتى یا هێزێن لەشکەری یێن رژێمێ، ئەگەرەکێ مەزنێ شکەستنا بلەز بوو:
هەر ژ دەستپێکێ ڕژێمێ پشتبەستن ب هێزێن ناوچەیی و یێن نێڤدەولەتى و یێن دیتر کرن: (ئیران، میلیشیاتێن شیعى یین لوبنانى و عیراقى، رۆسیا)، جارەکێ سەرکردەیەکێ مەزنێ ئیرانى گۆت: ئەگەر مە پشتا ئەسەدى نەگرتبا شەش هەیڤ ژبۆ کەفتنا ڕژێما وى بەس بوون!
د ڕاستییا خوەدا ڕژێمێن دکتاتۆر ڕاستە دژوارى و بێ ڕەحمییەکا مەزن ب کاردینن، لێ هێزەکا ڕاستەقینە نینن، نەخاسمە ئەگەر دکتاتۆر ژ پێکهاتەکا کێمینە نەبت، وەکى یا (نوصەیرییا شیعى) یا خێزانا (ئەسەدى) د ناڤا دەریایەکا (سونی)ـدا.
5. مفاوەرگرتنا هێزێن ئۆپوزسیۆنێ ژ پشتەڤانییا تورکیا، هەر ژ بەرى چەندین ساڵا و هەتا ڤان بۆیەرێن داویێ پتر زێدەبوو!
6. خوەبەرهەڤییا مەزن یا هێزێن ئۆپوزسیۆنێ یێن لەشکەرى ژ ڕاهێنانێ بگرە و هەتا چێکرنا هندەک مۆشەک و دڕۆنان و دروست ب کارئینانا وان، ل گەل پلان و بجهئینانا تەکتیکێن جەنکێ یێن کارلێکەر، ژ بیرنەکین لایەنێ ئایدلۆژى ژى وەکۆ بیر و باوەرێن (ئیسلامخوازى) هاندان و پاڵدان و وڕەیەکا مەزن ددت خودانان ئەڤە ژ لایەکێڤە، ژ لایێ دیترڤە ڕەوابوونا پڕس و دۆزا ئازادکرنا سۆریا ژ زولم و ستەما دکتاتۆریێ ژ لایێ دیترڤە، ئەڤ چەندە خوە بخوە هێزەکا مەزنا زەبلاحە.
لێ هەر چەوان بت بەحسێ حەسم و ئێکلاكرنێ و کا دێ سۆریا بەرەڤ چیڤە چتن، ئەو یا ماى ولکل "حادث حديث"، دێ بەحس لێ کین د دەمێ گونجایدا ب ئاناهییا خۆدێ