سەرۆکوەزیرێ کەنەدا، دەست ژ کارێ سەرۆکوەزیریێ و سەرۆکایەتییا پارتییا لیبرال کێشا و دیار کر: ئەز نەشێم بۆ هەلبژارتنێن بهێت یێن کەنەدا بژاردەیەکا باش بم.

جەستن ترۆدۆ، سەرۆکوەزیرێ کەنەدا د کۆنفرانسەکێ رۆژنامەڤانی دا، دەستژکارکێشانا خۆ راگەهاند و گۆت: دێ دەستان ژ کاری بەردەم پشتی کو پارتییا مە سەرۆکەکێ دی هەلدبژێریت.

ترۆدۆ زێدەتر دبێژیت: ئەز جەنگاوەرم، هەمی هەستییێن لەشێ من بەردەوام ئەز هاندایمە کو شەڕی بکەم، چونکی گەلەک گرنگیێ ب کەنەدییان ددەم و من هەردەم شەڕ بۆ وان کریە و هەر سپێدەهییەکا ژ خەو رابوویم من ئیلهام ژ ئیرادەیا بهێز یا کەنەدیان وەرگرتییە.

هەروەسا گۆت: پەرلەمانێ کەنەدایێ پەککەفتییە و ئەم پێدڤی ب دەستپێکەکا نویینە بۆ پەرلەمانی و من ئەڤ چەندە بۆ بەرژەوەندییا وەلاتێ خۆ کر.

ترۆدۆ ژ نیسانا سالا 2013ێ وەرە سەرۆکێ پارتییا لیبرال بوویە و ژ چریا دویێ یا سالا 2015ێ سەرۆکایەتییا کەنەدایێ کریە و ل ڤان دویماهییان و ب تایبەتی ژی پشتی فشارێن ترەمپی بۆ زێدەکرنا باجا گومرکی تویشی نەرازیبوونا ناڤخۆیی ببوو و 24 پەرلەمانتارێن پارتییا لیبرال داخواز ژێ کربوو کو دەست ژ کار بکێشیت و ئەڤرۆ دەستژکارکێشانا خۆ راگەهاند.