سەرکردەیێن سیاسیێن سوننەیێن عێراقێ، هەڤپەیمانیەکا نوی بناڤێ هەڤپەیمانیا سەرکردایەتیا يه‌كگرتوویا سوننە پێکئینا، وەکی ئەو بخۆ ژی دبێژن، ئەرمانجا وان دەستەبەرکرنا مافێن پێکهاتەیا سوننەیانە ل هەمی عێراقێ.

لدویف راگەهاندنا وان، هەڤپەیمانیا سوننەیا، ژ هەر ئێک ژ مەحمود مەشهەدانی سەرۆکێ پەرلەمانێ عێراقێ، خەمیس خەنجەر سەرۆکێ هەڤپەیمانیا سیادە، موسەننا سامەرائی سەرۆکێ هەڤپەیمانیا عەزەم، ئەحمەد جبووری سەرۆکێ پارتا جەماهیر و زیاد جەنابی سەرۆکێ فراکسیۆنا دەستپێشخەریی پێکدهێن و د داهاتیەکێ نێزیک ژی دا، دێ بەرنامە و کارێ وێ هەڤپەیمانیێ ئەشکرا کەن.

یا کو جهێ حێبەتیێ یە، لایەنێن وێ هەڤپەیمانیێ، بۆ هەیاما نێزیکی سالەکێ لسەر دیارکرنا کەسەکی بۆ پۆستێ سەرۆکێ پەرلەمانی رێک نەدکەڤتن و دابەش بوون بسەر دوو بەرەیان دا، تا ل داویێ ب پشتەڤانیا شیعەیان، مەحمود مەشهەدانی بوویە سەرۆکێ پەرلەمانێ عێراقێ.

ژلایەکێ دی ڤە ژی، ب نێرینا چاڤدێران، ئارمانجەکا دی یا سونەیان ئەو یەکە کو د کڤانێ وێ هەڤپەیمانەتیێ دا پشکداریێ د هەلبژارتنا پەرلەمانێ عێراقێ دا بکەن کو بڕیارە ئەڤسالە برێڤەبچیت.

هەر چەوا بیت، گۆهرانکاریێن بلەزێن دەڤەرێ و عێڕاقێ وەسا ل لایەنان کریە کو ناڤ مالا سوننەیان بهێتە ئێکخستن و کۆ دەنگیەکێ دناڤ سوننەیان دا دروست بکەن و داویێ ب ناکۆکیێن چەند سالێن دەربازبووی بئینن و خۆ بۆ گۆهرانکاریێن داهاتی عێراقێ بەرهەڤ بکەن.