د كۆمبوونا سه‌ركردايه‌تیا يه‌كگرتوو دا ، ئه‌میندارێ گشتى یێ يه‌كگرتوو راگه‌هاند، دێ په‌یوه‌ندیێن خۆ ئێخیته‌ د خزمه‌تا چاره‌سه‌ركرن و چه‌سپاندنا مافێن گه‌لێ كورد دا ل رۆژئاڤایێ كوردستانێ.

سه‌ركردايه‌تیا يه‌كگرتوویا ئیسلامیا كوردستانێ ئێكه‌م كۆمبوونا خۆ پشتى كۆنگره‌ى ل هه‌ولێرێ كر، د كۆمبوونێ دا ماموستا سه‌لاحه‌دین محه‌مه‌د به‌هائه‌دین، ئه‌میندارێ گشتى یێ يه‌كگرتوو، برێڤه‌چوونا كۆنگره‌یێ 9ێ یێ يه‌كگرتوو ب سه‌ركه‌ڤتیانه‌ بناڤكر.

د كۆمبوونێ دا ئه‌میندارێ گشتى یێ يه‌كگرتوو ئاماژه‌ ب ره‌وشا رۆژئاڤایێ كوردستانێ و پرۆسه‌یا ئاشتیێ ل توركیا و ره‌وشا ده‌ڤه‌رێ ژى كر‌.

لدويڤ به‌يانا دویماهیا كۆمبوونێ، ماموستا سه‌لاحه‌دین محه‌مه‌د به‌هائه‌دین د كۆمبوونێ دا گۆتى یه‌، ئه‌و دێ په‌یوه‌ندیێن خۆ ئێخیته‌ د خزمه‌تا چاره‌سه‌كرن و بده‌ستڤه‌ئینانا مافێن كوردان ل رۆژئاڤایێ كوردستانێ.

ژ ئالیه‌كێ دیڤه‌ ئاماژه‌ ب پێڤاژۆیا ئاشتیێ دناڤبه‌را په‌كه‌كێ و حكومه‌تا توركیا دا كرى یه‌ و راگه‌هاند، ئه‌و دێ لسه‌ر بزاڤێن خۆ بۆ سه‌رئێخستنا پێڤاژۆیا ئاشتیێ ل توركیا به‌رده‌وام بیت.

د ئالیه‌كێ دى یێ كۆمبوونا سه‌ركردايه‌تیا يه‌كگرتوو دا به‌حس ل پرسا مووچه‌ى و كێشه‌یێن دناڤبه‌را هه‌ولێر و به‌غدا دا هاته‌ كرن و رژدى ل چاره‌سه‌كرنا وان كێشه‌یان هاته‌ كرن، ب ره‌نگه‌كى مووچه‌یێ فه‌ر‌مانبه‌رێن هه‌رێمێ هه‌یڤانه‌ و بێ گیرۆبوون بهێنه‌ دان.