ئەمیندارێ گشتى یێ یەکگرتوو راگەهاند، ل کابینەیا نویا حکومەتێ پشکدار نابين و وەک ئۆپۆزسیۆن دێ بەردەوام بين و پێدڤیە ب زوویترین دەم دەستەیا سەرۆکايه‌تیا پەرلەمانێ کوردستانێ بهێتە دیارکرن و پەرلەمان بهێتە کاراکرن.

ب سەرۆکايه‌تیا ماموستا سەلاحەدین محەمەد بەهائەدین، یەکگرتوويا ئيسلامييا كوردستانێ ئێکەم کۆمبوونا ئاساییا خۆ ل پشتی کۆنگرەیێ 9ێ ل باژێرێ هەولێرێ ئەنجامدا و ئەمیندارێ گشتی د کۆمبوونێ دا پیرۆزباهی ل هەمی ئەندامێن نویێن مەکتەبا سیاسی کر.

د کۆمبوونێ دا، پرسا مووچە و ئاریشەیێن دناڤبەرا هەرێم و بەغدا دا گوتوبێژکرن و تەکەزی هاتەکرن کو پێدڤیە هەردوو حکومەت لەزێ بکەن ل چارەسەرکرنا ئاریشەیان و دابینکرنا خزمەتگوزاریێن پێدڤی بۆ وەلاتیان و مووچەیێ فەرمانبەرێن هەرێمێ هەیڤانه‌ بێ گیروبوون بهێتە دابەشکرن.

هەروەسا، داخاز هاته‌ كرن ب زوویترین دەم دەستەیا سەرۆکاتیا پەرلەمانێ کوردستانێ بهێتە دیارکرن و پەرلەمان بهێتە کاراکرن و رۆلەکێ گرنگ هەبیت، تەکەز ژی هاته‌ كرن یەکگرتوو د کابینەیا نوی دا پشکدار نابیت و دێ درێژەیێ ب رۆلێ خۆ یێ ئۆپۆزسیۆنی ددەن ل پەرلەمانێ کوردستانێ.