x

X
22/01/2025 - 14:10
ئەمیندارێ یەکگرتوو دەستخۆشی ل هەلویست و ئێک دەنگیا پەرلەمانتارێن کورد ل بەغدا کر

پەرلەمانێ عیراقێ کۆمبوو و ب پڕانییا دەنگان سێ پرۆژەیاسا پەسەندکرن.

پەرلەمانتارەکێ کورد ل پەرلەمانێ عیراقێ راگەهاند: پەرلەمانێ عیراقێ د روینشتنا خۆ دا ب پڕانییا دەنگان پرۆژەیاسایا ڤەگەڕاندنا مولکان بۆ خودانێن وان یێن رەسەن، پرۆژەیاسایا بارێ کەسایەتی و پرۆژەیاسایا لێبۆرینا گشتی پەسەندکرن.

پرۆژەیاسایا ڤەگەڕاندنا مولکان بۆ خودانێن وان یێن رەسەن، ل دویڤ داخوازییا کورد و تورکمانان هاتبوو داڕشتن کو ل گۆرەی وێ یاسایێ هندەک ژ وان ئەردێن رژێما بەعس یا ژناڤچوویی ل کەرکووکێ و نەینەوا ژ کورد و تورکمانان وەرگرتین، دێ بۆ وان هێنە ڤەگەڕاندن.

پرۆژەیاسایا لێبۆرینا گشتی ل دویڤ خواستا سوننەیان بوو و ب پەسەندبوونا وێ گەلەک ژ سوننەیێن بێتاوان هاتینە زیندانکرن، دێ هێنە ئازادکرن.

پرۆژەیاسایا بارێ کەسایەتی ل دویڤ داخوازییا شیعەیان بوو و ب پەسەندبوونا وێ ژییێ پێکئینانا هەڤژینییێ دێ هێتە کێمکرن و گەلەک خالێن دی ژی د وێ یاسایێ دا هەنە کو پێشتر رێکخراوێن مافێن مرۆڤی و وەلاتێن رۆژئاڤا رەخنە ل سەر هەبووینە.

ل دور ڤەگەڕاندنا زەڤی و ملکێن جووتیارێن کورد ل کەرکووک، ماموستا سەلاحەددین محەمەد بەهائەددین ئەمیندارێ گشتی یێ یەکگرتوو دەستخۆشیێ ل هەلویست و ئێک دەنگیا پەرلەمانتارێن کورد ل بەغدا کر.