بەهۆی هێرشەكەی دوێنێ، عێراق ئامادە نییە پێشوازی لە وەزیری بەرگری توركیا بكات
تا دێت پەیوەندییەكانی نێوان عێراق و توركیا خراپتردەبێت ، بەتایبەت هێرشەكەی دوێنێ فرۆكە بێ فرۆكەوانەكەی توركیا كە بەمهۆیەوە دوو ئەفسەری باڵای سوپای عێراق گیانیان لەدەستدا.
وەزارەتی دەرەوەی عێراق رایگەیاند " بەغداد پێی باش نییە لەئێستادا پێشوازی لە وەزیری بەرگری توركیا بكات ، كە بریارە سبەی بەسەردانێك بگاتە پایتەخت و لەگەڵ بەرپرسانی حكومەت كۆببێتەوە".
وەزارەتی دەرەوەی عێراق ئەوەیشی راگەیاند ، جارێكی دیكە باڵیۆزی توركیا لە بەغدا بانگهێشتكراوە بۆ روونكردنەوە لەبارەی ئەو هێرش و خاك بەزاندنەی توركیا لەخاكی عێراق ، ئەمەش جاری سێیەمە بانگهێشتی باڵیۆزی توركیا دەكرێت لەوەتەی مانگی حوزەیرانی ئەمساڵ.
بریاربوو سبەی پێنجشەممە وەزیری بەرگری توركیا بەسەردانێك بگاتە بەغدا ، بەڵام وەزارەتی دەرەوەی عێراق رەتیكردەوە پێشوازی لە وەزیری ناوبراوبكات و سەردانەكەی هەڵوەشاندەوە.
