دادپەوەریا جڤاکى نەبت وەڵات نینە
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

دادپەوەریا جڤاکى نەبت وەڵات نینە

جاسم محمد شرنەخى
دادپەرەوەریا جڤاکى ئاکو سیستەمەکێ ئابۆریێ کومەڵایەتى هەبت ژ ئەنجامێن وێ جوداهى و پلەپلەییا زۆر مەزن دناڤبەرا چین و تەخێن جڤاکى کێم ببن، و ئەو خێروبێرێن وەڵاتى هەین خەلک پشکداربن د مفاوەرگرتن و د خۆشی دیتنا واندا.
کەواتە: وەڵاتەک خوەدى سامان و کانزابت، ئەگەر دادگەریا جڤاکى هەبت قەت نابت هەژارى چاڤێن خوە تێدا زیق بکن ب چ پێڤەرەکێ ژ پیڤەران بت هەتا یێ قەرەقۆشی یانژى حوکمێ سەکسۆنیا بت، و کا چەوان ئاڤ بۆ ژیانێ فەرە وەسا دادپەروەرى گرنگە بۆ هەمى جڤاکێن مرۆڤایەتیێ!
و ژ گرنگیا هەبوونا ڤى جۆرێ دادیا ئەم ل دۆر دپەیڤن ئەوە: هەستا هاوڵاتیبوونێ پەیدادکت، و ئیمناهی و ئاسایشێ بەرقەرار دکت، و ئارامیا دەرۆنى بجهدئینت، و بیێ ڤێ دادپەوەریێ، هەر هاوڵاتیەکێ خوەدى هەست و هۆش بت هەلبەت د چاڤ و دلێ ویدا وەڵات دبت زیندانەکا تارى و نە خۆش، هەرچەندە بلا نەیێ هەژار ژى بت، لێ مادەم ل بەرچاڤێن خوە دبینت جۆرەکێ جۆداکاریێ بەردەوامە، وبەڵاڤکرنا سامانى نەک ل سەر پێڤەرێن درۆستن، و دبینت ب نەحەقى هندەک ژ باڵادەست و هەڤالبەندێن وان بەهرێن مەزن ژ سامانێ دبن زێدەتر ژ وێ یا دگەهتە وان، وى دەمى هیچ گومان نینە ئەوا دگەهتە وى بلا بخوە تشتەکێ باش بتن ژى ب ڕێژەیەکێ ژ ڕێژەیان لێ دەڤ وى وەکى ژەهر و قوزەلقورتێ لێ دهێت، و دیسان هەر کەسێ هەستێ مرۆڤان ل دەڤ هەبت دێ خوەبینت یێ ئێخسیرە د ناڤا مالا خوەدا، ئانکو د وار و وەڵاتێ خوەدا، و ئێدێ گیان و ئیرادەیا بەرگریێ ژى دێ ل دەڤ مرت!
ئەها هۆسا زەڵامەکێ دانەعەمر بەرسڤا پرسیارا خەلکەکێ دا دەمێ گۆتینى: مام چما شۆرەشا زەمانێ هەوە پشتى چەند ساڵێن هەڤپەیڤین و لهەڤاتنێ (هودنێ) شکەستن ئینا؟ ئەوێ ژى هۆ ب ڕۆهنى و بیێ مەللاقى و نیفاق و دووڕویاتى گۆتە وان: مامۆ بڕاستى دەمێ مە بەرێ تڤەنگێن خوە ددانە سینگێن سەربازێن دۆژمنى د ستێرکا واندا تەلارى فلانى مە ددیت و قەسرا بیهڤانى دەردکەڤت، ئێدێ مەژى گۆت: ئەم شەرى بۆ کێ بکین؟!

من نەڤێت ئەز پتر درێژبکم هەچکو ئەڤ هەڤیرە حەزدکت گەلەک ئاڤێ ڤەخۆت، لەوا دێ بکورتى بێژمە وان کەسێن تا ڤێ گاڤێ پەسنا هندەک گهورینێن ئاستنزم دکن ل ڤێرێ و ل وێراهە، و هندەک بەندێن حێفتیارا دبێژن، ئەز دبێژمە وان: ما دەم عەدالەتا جڤاکى نینە ئەڤجا بخودێ حالەکێ وەکى یێ مە خوە مەیمون (ئانکو مەیمینک) ژى پێ قایل نابن و قەبیل ناکن!
و دەربارەى ئاخفتنا ل سەر هەلویستێ مەیمینکان هەمبەر بێ دادیا جڤاکى شاشەیا گەناڵێ نەشیوناڵ جوگرافیک تاقیکرنەک ڤەگوهازت: کو دوو مەیمینک پێشچاڤبوون و هەر یەک ژوان د قەفەسەکێدابوو، و زێرڤانێ باغێ گیانەوران دوو بەرکێت بچویک ئینان و هەر ئێکێ بەرکەک هاڤێتە بەر، و دوێڤڕا و ژوان خواست بەرکێن وى ڤەگەڕینن، و دەمێ فەرمانا وى بجهئانین رابوو پرتەکا خیارى هاڤێتە بەر مەیمینکا ئێکێ، و تەماشەکر کادێ چ کارتێکرن ل سەر ڕەفتارا وێ هەبت، هەمیان دیت ئەڤێ مەیمینکا ژمارە یەک خوە ژ کەیڤاندا هەلاڤیت و ب شەوق پاداشتا خوە خوار، لێ زێرەڤانى پاداشتەکێ جودا دایە مەیمینکا دوویێ کو ویشیەکێ تریێ ڕەشبوو، و دەمێ مەیمینکا ئێکێ ئەڤ تشتە دیتى گەرماتیا وێ بۆ خوارنا خیارێ کێمبوو، لێ زێرەڤانى هەمان کریار دووبارەکر، ودیسان دەمى بەرک بۆ زڤڕاندین پرتەکا خیارى دایە مەیمینکا ئێکێ، بەلێ ڤێ جارێ ئەوێ خیارێ خوە نە خوار و خوە گرت و چاڤەڕێ ما کا دێ هەڤالا وێ چ خەلات وەرگرت، و دەمێ دیتى دیسان زێرەڤانى ویشیەکێ ترى دایە هەڤالا وێ، تۆڕەبوو و خیار ل ناڤچاڤێن زێرەڤانى دا، و جارا سیێ زێرەڤانى هەوڵدا هەمان تاقیکرنێ ئەنجام بدت، لێ ڤێ جارا داویێ مەیمینکا ئێکێ یەک چرکێ ژى خوە نەگرت و نەما ل هیڤیا خەلاتێ خوە، بەلکى هەر کار ژى بۆ زیرەڤانى ئەنجام نەدا و بەرکێ وى وەرگرت و ئێکسەر ل ناڤچافێن وی دا، باشە ئەگەرێ ڤێ تۆڕەیا زێدە یا مەیمینکا ژمارە یەک پشتى کەیفخۆشیەکا کورت چ بوو؟!
بەرسڤ یا دیارە بەلێ دێ هەر بێژین: ئەوە کو دەمێ دیتى هەڤالا وێ ل سەر هەمان کریار پاداشتەکێ مەزنتر ژ یێ وێ وەردگرت، ئەڤجا پاداشتا وێ ل بەر چاڤ و دلێ وێ ڕەشبوو.
ئەوێ تاقیکرنێ سەلماند کو داپەوەریا جڤاکى تشتەکێ خۆرسکیە، و تێکدانا ڤێ دادگەریێ ل کوردستانا مە ئەوا ب شەڤ ڕۆژ ئەڤە دەهان ساڵە بەردەوامە، ئەڤ وەڵاتە ئەگەر ڕەوشا وى هەر هۆبت ئەڤ ستەمە د بتە سەدەما ژناڤچوونێ، ئەرێ گەلۆ چەوان دێ خۆدێ قەبوول کت گەنجێن وەڵاتى زڕبەهربن و ژبۆ خۆشیێن خێروبێرێن خاکا خوە بمرن، و بەرپرس و سوپایێ وان ژ مەللاق و بندیواران پێ بمرن؟!
.

هه‌واڵی گرنگ