هه‌ڕه‌شه‌ی ئه‌نجامدانی گه‌وره‌ترین گردبوونه‌وه‌ ده‌كرێت له‌ هه‌ولێر
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

هه‌ڕه‌شه‌ی ئه‌نجامدانی گه‌وره‌ترین گردبوونه‌وه‌ ده‌كرێت له‌ هه‌ولێر

به‌هۆی نه‌بردنی خزمه‌تگوزاری بۆ ناوچه‌كه‌یان، خاوه‌ن زه‌ویه‌كانی 8 ی حه‌سارۆك له‌ هه‌ولێر هه‌ڕه‌شه‌ی گه‌وره‌ترین گردبوونه‌وه‌ ده‌كه‌ن.

له‌ ڕاگه‌یه‌نراوێكیاندا له‌ لاپه‌ڕه‌یه‌كی فه‌رمی به‌ناوی (هه‌شتی حه‌سارۆك) ئاشكرای ده‌كه‌ن: ئه‌مجاره‌ش هەڵدەستین بە ئەنجامدانی گەورەترین گردبوونەوە لەسەر زەویەکانمان لە هەشتی حەسارۆک، ئه‌وه‌شیان خستۆته‌ڕوو: بەرامبەر بەو ستەمەی کەوا حەڤدە ساڵە لێمان دەکرێت، بڕیارماندا لە ڕۆژی چوار شەممە به‌رواری 23 ی 9 ی 2020 هەستین بە ئەنجامدانی گردبوونەوە له‌سه‌ر زه‌ویه‌كانمان له‌ هه‌شتی حه‌سارۆك.

ئه‌وان داوای به‌ده‌مه‌وه‌ هاتنی لایه‌نه‌ په‌یوه‌ندیداره‌كانی وه‌ك سه‌رۆكی ئه‌نجومه‌نی وه‌زیران و وه‌زیری شاره‌وانی و پارێزگاری هه‌ولێرو فراكسیۆنه‌كانی په‌رله‌مانی كوردستان ده‌كه‌ن، چونكه‌ ماوه‌ی 17 ساڵه‌ له‌رێگه‌ی رێكاری مه‌ده‌نی وه‌ك گردبوونه‌وه‌و یاداشت هه‌وڵی خۆیان داوه‌ به‌ڵام گوێیان بۆ نه‌گیراوه‌.

ده‌قی ڕاگه‌یه‌نراوه‌كه‌:

هەشتی حەسارۆک، گەڕەکە بێ نازەکەی هەولێر
دوای حەڤدە ساڵ لە نەهاتنی خزمەت گوزاری بۆ کەرتی هەشتی حەسارۆک دوای چەندین جار لە هەوڵ و گردبوونەوە و سەردانی کردنی شوێنە حوکومی و ناحکومیەکان بە ئامانجی بە دیهاتنی ئاواتەکەمان کە ئێمەش وەکو هاوڵاتیەکی ئەم کوردستانە مافی خۆمانە ببینە خاوەن خانووی خۆمان لەسەر زەویە تاپۆکانی خۆمان ، بەڵام بە داخەوە هەوڵەکانمان بێ سوود بووە و لایەنی پەیوەندی دار تاکو ئێستا وەڵامێکی دروستیان بۆ ئەم کێشەیە نەداوینەتەوە ، سەرەڕای ئەوەی کە زەویەکانمان ( تاپۆن ) ، لەسەر مافی خۆشمان ڕێگرن لە دروست کردنی خانوو لەسەر زەویەکانمان ، کە لە ڕووی یاساییەوە ئەمە زەوت کردنی مافی هاوڵاتیانە چونکە زەویەکانمان ( تاپۆن ) ...
بۆیە لێرەوە ڕایدەگەیەنین کەوا جارێکی تریش هەڵدەستین بە ئەنجام دانی گەورەترین گردبوونەوە و دەنگی ناڕەزایەتیمان دەردەبڕین لەسەر زەویەکانمان لە هەشتی حەسارۆک بەرامبەر بەم ستەمەی کەوا حەڤدە ساڵە لێمان دەکرێت ، بۆیە لە ڕۆژی چوار شەمە ڕێکەوتی ( ۲۳/۹/۲۰۲۰ ) کاتژمێر ( ٤:٣٠ )ی دوای عەسر هەڵدەستین بە ئەنجامدانی گردبوونەوە ، لێرەوە ڕای دەگەیەنین کە پێویستە لایەنی بەرپرس ئەگەر خۆیان بە خەمخۆری ئەم خەڵکە دەزانن ئەمجارە بە جدی بێن بە دەم کێشەکەمان و لە نزیکەوە گوێبیستی هاوڵاتیانی خۆیان بن کە ژمارەی ئەم خەڵکە بێ بەش و ماف خوراوە نزیکەی ( بیست هەزار ) کەسە، بۆیە بە فەرمی داوا لەو بەڕێزانە دەکەین کەوا لەم ڕۆژە ئامادەبن.
۱- نوێنەری سەرۆک وەزیرانی هەرێمی کوردستان ( ڕێزدار مەسرور بارزانی )
۲- وەزیری شارەوانی ( کاک ساسان عەونی )
٣- پارێزگاری هەولێر ( کاک فرسەت سۆفی )
 هەروەها داوا لە سەرجەم فراکسیۆنەکانی پەرلەمانی کوردستان دەکەین کە ئەوانیش بێن بە دەم کێشەکەمان

هه‌واڵی گرنگ