سەرۆكی ویلایەتە یەكگرتووەكانی ئەمریكا داوا دەكات جیهان سزای چین بدات بەهۆی ئەوەی هۆكاربووە بۆ بلاوكردنەوەی ڤایرۆسی كۆرۆنا.

دۆناڵد ترەمپ سەرۆكی ویلایەتە یەكگرتووەكانی ئەمریكا لەمیانی وتەیەكی بەرامبەر كۆمەڵەی گشتی نەتەوەیەكگرتووەكان رایگەیاند : " لەسەرمان پێویستە سزای چین بدەین لەسەر كارەكانی و لەسەر بەرپرسیاریەتی لەبڵاوبوونەوەی ڤایرۆسی كۆرۆنا لە جیهاندا".

وتیشی : " لەسەرەتای بڵاوبوونەوەی ڤایرۆسی كۆرۆنا ، چین تەواوی گەشتەكانی بۆ ناوەوە داخست ، بەڵام رێگەی بە چوونە دەرەوەی گەشتیاراندا بۆ ئەوەی گەشتی دەرەوەی چین بكەن ئەمەش لەپێناو بلاوبوونەوەی ئەم پەتایە".

دەشڵێت : " حكومەتی چین و رێكخراوی تەندروستی جیهانی كە لەلایەن چینەوە كۆنترۆڵ كراوە ، زانیارییەكی هەڵەیان بڵاوكردەوە گوایە ئەم ڤایرۆسە لەرێگای كەسێكەوە بۆ كەسێكی دیكە ناگوازرێتەوە، بەهۆی ئەمەوە پێویستە سزابدرێن".

سەرۆكی ئەمریكا ئەوەیشی راگەیاند : " ئەو كەسانەی هێرش دەكەنە سەر تۆماری ژینگەیی ئەمریكا ، چین لەیاد دەكەن".

لەكۆتاییدا لەبارەی ڤاكسینی كۆرۆنا ، ترەمپ وتی : " ڤایرۆسەكە تێكدەشكێنین ، ڤاكسینەكە ئامادە دەبێت و دابەشی دەكەین ، سنورێك بۆ ئەو پەتایە دادەنێین".