هێزێن ئه‌منی ل دهوكێ ڕێگری ل خۆدانێن شوقه‌یێن ئارام ستی كر دا خرڤه‌بوونه‌كا نه‌ڕازیبوونێ ئه‌نجام نه‌ده‌ن
کوردیو-دھوک
پرۆژه‌یێ ئارام ستی ل دهوكێ ئه‌ڤه بۆ ده‌مێ 10 سالانه هاتیه دروستكرن به‌شه‌ك ژ شوقه‌یێن وێ هاتینه ته‌مامكرن و بێ خزمه‌تگوزاریێن ژ هه‌ژینه و به‌شه‌ك ژی هێشتا بنیڤه‌ڕوو ماینه كار تێدا نه‌هاتیه‌كرن.له‌ورا ئه‌ڤرو خودانێن وان خرڤه‌بوونه‌كا نه‌ڕازیبوونێ ئه‌نجامدا.
كاوه عه‌بدولعه‌زیز ئابووریناس و خودانێ ئێك ژ وان شوقه‌یان بۆ کوردیو راگه‌هاند: پرۆژه‌یێ "ئارام ستی" دهێته هه‌ژمارتن ب هێمایێ گه‌نده‌ڵیێ و شكه‌ستنا ئیدارا پارێزگه‌ها دهوكێ د ڤان 10 سالاندا ، ئه‌ڤ پرۆژه‌یه یێ وان كه‌سێن وه‌كو هه‌ژار و ده‌ستكورت و پاڵه و بێ حال و جوتیارانه كو هێدی هێدی كوژمه‌یه‌كێ پاره‌یی بۆ خۆ لێكدای و ژ ده‌ڤێ زارۆكێن خۆ ڤه‌گرتی و كرینه دده‌ستێ هنده‌ك گه‌نده‌ڵ و سه‌رمایه‌دار و بسنسمه‌ناندا و ئه‌و پاره برییه ل كه‌یف و خێر و خۆشیێن خۆ داینه و پرۆژه ماینه وه‌سا و بێ سه‌روبه‌ر.
هه‌روه‌سا وی ئابووریناسی ئاماژه ب وێ یه‌كێ ژی كر: پرۆژه‌یێ ئارام ستی لدویڤ یاسایا ژماره 4 یا سالا 2006 هاتیه‌دان و ئه‌و عه‌ره ژلایێ حكومه‌تێڤه هاتیه دابینكرن بێ به‌رامبه‌ر و لگوره‌ی وێ یاسایێ نابیت پرۆژه بهێته فرۆتن ،لێ پتر ژ 5 جاران ئه‌ڤ پرۆژه‌یه هاتیه فرۆتن ژ ڤی ده‌ستی بۆ وی ده‌ستێ دیتر بێی كو خه‌لكه‌ك ژێ مفادار بیت ب به‌ڵگه ئه‌م دبیژین 3 جاران دیزاینا وێ هاتیه گهورین د به‌رژوه‌ندیا سه‌رمایه‌داری نه‌كو خه‌لكیدا و هه‌روه‌سا جهێن كه‌سكاتی و باخچه و قوتابخانه و باخچێ زارۆكان و مزگه‌فت دكێمبوون و لێ نه‌هاتینه دروستكرن ئه‌م دشێین بێژین به‌رۆڤاژی ماركێت یێن هاتینه دروستكرن و بی سه‌رۆبه‌رترین كوالێتی و ئه‌وێن نڤیه‌ڕوو ژی هاتینه دروستكرن و خه‌لك تێدا دژین و پشتی 10 جاران سه‌ره‌دانا وه‌به‌رهێنانێ و پارێزگه‌هێ و ده‌سته‌یا بلند یا وه‌ربه‌رهێنانێ لێ چ چاره‌سه‌ری بۆ نه‌بووینه و گه‌له‌ك سوز هاتینه‌دان و هه‌می هاتینه لیڤه‌بوون،ژبه‌ر ڤێ یه‌كێ ئێدی خه‌لكی بڕیارا دای رازی نه‌بن و ده‌ست ب خرڤه‌بوون و نه‌ڕازیبوونا بكه‌ن تا هنده‌ك سۆزێن گرنتی پێ بهێنه‌دان خۆدانێن ڤان شوقه‌یان وه‌كو نه‌رازیبوون دڤیا خرڤه‌بوونه‌كێ بۆ وێ یه‌كێ حكومه‌ت و رێڤه‌به‌ریا وه‌به‌رهێنانێ چاره‌یه‌كێ ببینن ، ئه‌وا ئه‌ڤرو هاتیه‌كرن نه خۆنیشاندان بوو تا موله‌تا یاسایی هه‌بیت بتنێ یێن چووینه به‌ر نڤیسینگه‌ها ڤی پرۆژه‌یی دا نه‌ڕازیبوونا خۆ بگه‌هینێ.
كاوه‌ی گوت ژی:پرۆژه‌یێ "ئارام ستی" 1244 شوقه‌نه و 1240 خێزان یێ ل هیڤیێ كو ئه‌ڤ پرۆژه ب دوماهی بهێت ،هه‌رده‌مێ پرۆژه ب دوماهی هات دێ ئاریشه‌یا سێیه‌كا كرێدارێن باژێرێ دهوكێ چاره‌سه‌ربیت لێ جهێ داخێیه ئه‌ڤ سه‌رمایه‌دارێن شوقا ل دهوكێ چێدكه‌ن یێ یاریان ب چاره‌نڤیسێ خه‌لكی دكه‌ن.
هێزێن ئێمناهیێ ب به‌هانه‌یا نه‌بوونا موله‌تا یاسایی بۆ خرڤه‌بوونێ ڕێك ب وان نه‌دا ده‌نگێ خۆ بگه‌هینن ، هه‌روه‌سا ڕێك ل ده‌زگایێن میدیایی ژی هاته‌گرتن كو رۆمالا خرڤه‌بوونێ بكه‌ن و موبایلا په‌یامنێره‌كێ كه‌ناله‌كی هاته شكاندن.
