راوێژكاری سەرۆك وەزیرانی عێراق بۆ كاروباری هەڵبژاردنەكان ڕایده‌گه‌یه‌نێت، بێ ئاگاین لەو زانیاریانەی كە باس لە ڕێككەوتنێكی سیاسی نێوان لایەنە عێراقیەكان دەكەن بۆ دواخستنی هەڵبژاردنی پێشوەختە.

ئه‌مڕۆ سێ شه‌ممه‌ 20 ی تشرینی یه‌كه‌می 2020 عەبدولحسێن هینداوی راوێژكاری سەرۆك وەزیرانی عێراق بۆ كاروباری هەڵبژاردنەكان لە لێدوانێكی رۆژنامەوانیدا ڕایگه‌یاند،حكومەتەكەی مستەفا كازمی سوورە لەسەر ئەنجامدانی هەڵبژاردنی پێشوەختە لە وادەی دیاریكراوی خۆیدا كە بڕیارە لە 6 ی حوزەیرانی 2021 دا ئەنجام بدرێت و راشیگەیاند حكومەت كار لەسەر تەواوكردنی هەموو رێوشوێنەكانی سەرخستنی ئەو پڕۆسەیە دەكات.

راوێژكاره‌كه‌ی سەرۆك وەزیرانی عێراق ئاماژەی بەوەشكرد، كە هەندێك پرس لە دەرەوەی دەسەڵاتی حكومەتدایە و پێویستی بە ئەنجومەنی نوێنەرانە بۆ ئەوەی بەربەست بۆ هەڵبژاردنەكە دروست نەكرێت ئەویش پەلەكردنە لە تەواوكردنی یاسای هەڵبژاردنەكان و هەمواركردنەوەی یاسای دادگای فیدراڵیە بۆ ئەوەی لەڕێگەی بەدەستهێنانی نیسابی یاساییەوە بڕیاری پێویست بدرێت.

عەبدولحسێن هینداوی ئه‌وه‌شی خسته‌ڕوو، لەڕۆژانی داهاتوودا گفتوگۆكان لەنێوان حكومەت و پەرلەماندا دەست پێدەكرێن بۆ پەلەكردن لە تەواوكردنی هەموو رێوشوێنەكانی تایبەت بە هەڵبژاردنی پێشوەختە و رێگرتن لەهەر هەوڵێك بۆ دواخستنی هەڵبژاردنەكان.