لەساڵیادی پێغەمبەری خۆشەویستدا درود و سەلامی خوای لەسەر
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

لەساڵیادی پێغەمبەری خۆشەویستدا درود و سەلامی خوای لەسەر

لەم رۆژانەدا جارێكی تر ساڵیادی لەدایكبوونی پێغەمبەری خودا و ڕێبەری مرۆڤایەتی دەكەینەوە، ئەو ڕێبەرە مەزنەی كە دوایین هەڵبژاردەی پەروەردگاری جیهانیانە بۆئەوەی تارۆژی قیامەت وەك خۆری ڕوناك بەردەوام بەتیشكە درەوشاوەكانی ژیانی مەعنەوی سەرجەم مرۆڤایەتی ڕوناك بكاتەوە، چونكە ئەو پەیامەی كە موحه‌مه‌د پێغەمبەر هێناویەتی سەرچاوەی ئیلهام بەخشە بۆهەموو ئەوبەهاو ڕەوشتە جوانانەی كە لەهەموو سەردەمێكدا هەوێن و چارەسەری كێشە و گرفتەكانی سەرجەم مرۆڤایەتیە لەسەر ئاستی تاك بێت یان كۆمەڵ.

گەورەیی پێغەمبەری ئیسلام و پێویستی مرۆڤایەتی بە پەیام و نوری درەوشاوەی شەریعەتەكەی كەلە قورئانی پیرۆزدا پارێزراوە، ڕاستیەكی گەورەیەو دانپێدانراوە و ڕێزلێگیراوە نەك تەنها لای موسوڵمانان و شوێنكەوتوانی ئاینی پیرۆزی ئیسلام، بەڵكو لای پادشا و زانا و بیرمەندانی غەیری موسلمانیش لە كۆن و نوێدا.

ئەوەتا گەورە فەرمانڕەوایەكی بەناوبانگی وەك (هۆلاكۆ) كاتێك لە دەوروبەرەكەی دەپرسێت گەورەترین پادشا كێ یە لە جیهاندا؟ لە وەڵام دا پێی دەڵێن دیارە كە ئێوە خۆتانن، ئەویش دەڵێت نەخێر پادشای گەورە من نیم، بەڵكو گەورەترین پادشا ئەو كەسەیە كە چەند سەدەیەكە لە ژیاندا نەماوە، كە چی ڕۆژانە پێنج جار لە بانگەكاندا لەسەرتاسەری جیهاندا ناوی دەهێنرێت و شەیاتومانی بە ناوەوە دەوترێت.

لەسەر دەمی نوێشدا نوسەرێكی گەورەی ئەمەریكایی وەك(مایكل هارت) كە لە ساڵی(1978) ی سەدەی ڕابردوودا كتێبێك دەنووسێـت سەبارەت بە سەد كەسایەتی گەورەی جیهان كە گەورەترین كاریگەیان لەسەر ژیانی مرۆڤایەتی بەجێهێشتوە لەسەرتاسەری مێژوودا، لەسەر قافلەی ئەو سەد كەسایەتیە، پێغەمبەری ئیسلام وەك یەكەم كەسایەتی گەورەو خاوەنی كاریگەرترین رۆڵ لەسەر تێكڕای مرۆڤایەتی هەژماردەكات، وە لە ریزی(100)كەسایەتیەكەدا ژمارە (یەك)ی بۆ داناوە.

لەلایەكی ترەوە موحه‌مه‌د درودو سەلامی لەسەربێت یەكەمین سەركردەی جیهانییە كە لە هەردوو بواری ئاینی و دنیاییدا گەورەترین سەركەوتنی بەدەست هێناوە، چونكە وەك ئاشكرایە شان بەشانی بەجێهێنانی ئەرك و بەرپرسیارێتیەكەی وەك پەیامبەر و نێردراوی پەروەردگار بۆ ڕێنمایكردنی مرۆڤەكان بۆ ڕێگای خواناسین، هاوكات وەك سەركردەیەكی سیاسی و دەوڵەتمەدارێكی مەزن، گەورەترین سەركەوتنی تۆماركردووە بە دامەزراندنی بنەما سەرەكیەكانی سیستمێكی سیاسی، كە بوویە هەوێن و بەردی بناغەی دەوڵەتێكی ئیمپراتۆری فراوان كە بۆ چەندین سەدە گەورەترین زلهێزی جیهان بوو.

ئێستا دوای تێپەربونی زیاتر لە چواردە سەدە بەسەرهاتنی ئەو پێغەمبەرە مەزنەدا، وێڕای پەرتەوازەیی و دواكەوتنی ژیاریی كەڕوی كردۆتە موسوڵمانان بەگشتی و پیلان و دژایەتیكردنی زلهێزە جیهانیەكانیش دژ بەجیهانی ئیسلامی، هێشتا ئیسلام زیندوترین ئاینی ئاسمانیە كە شوێنكەوتوان و باوەڕپێهێنەرانی بەردەوام روو لەگەشەكردن و زیادبوندان. دیارە كە ئومێدی ئایندەیەكی ڕۆشن و چارەنوسسازیشی لێ چاوەڕوان دەكرێت و چەندین نیشانەو بەڵگەی جیاجیا هەیە كەئاماژە بەئەو ڕاستییەدەكەن، یادكردنەوەی ساڵانەی لەدایكبونی ئەوڕێبەرە مەزنە گرنگ و پێویستە بەمەبەستی زیندو ڕاگرتنی ئەوبەهاباڵاو ڕاستیانەی كەجەوهەر و ئامانجی پەیامەكەیەتی بۆهەتاهەتایە.

هه‌واڵی گرنگ