شیری قوتو و زیانەكانی بۆسەر ژیانی كۆرپەلە
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

شیری قوتو و زیانەكانی بۆسەر ژیانی كۆرپەلە

 

 

توێژینەوەیەكی ئێرلەندی هۆشداری دەداتە دایكان كە ئەو مەمە پلاستیكیانەی شیری منداڵی تێدا ئامادە دەكرێت گەردیلەی پلاستیكی وردی لێوە دەردەچێت كە مەترسی هەیە بۆ سەر ژیانی كۆرپەلە.

توێژەرەكان لە میانی لێكۆڵینەوەكانیان لە تاقیگەكاندا ئەوەیان بۆدەركەوتووە كە قوتوە پلاستیكییەكان لەكاتی ئامادەكردن و تێكەڵكردنی شیری كۆرپەلەدا گەردیلەی پلاستیكی ووردیان لێدەبێتەوەو تێكەڵاوی شیرەكە دەبێت.

بەپێی زانیاریەكانی (USA Today)، دەرچوونی ئەو گەردیلە زیانبەخشانەی كە لە قوتوە پلاستیكیەكان جیا دەبنەوە، دەبنەوە بە هۆی ئەو ئاوە گەرمەیە كە بۆ ئامادە كردنی شیرەكە تێكەڵی دەكرێت.

بەپێی لێكۆڵینەوەكان كۆرپەلە بە نزیكی (1.6) یەكە لە گەردیلەی پلاستیكی وەردەگرێت لە هەر ژەمێكیدا بەهۆی ئەو ئاوە گەرمەی كە تێكەڵ بەو كەلوپەلە پلاستیكیانە دەكرێت كە خواردن و خواردنەوەیان تێدا ئامادە دەكرێت.

وە توێژەران ئاماژەیان بەوەدا كە تا ئێستاش نازانن ئایا زیانی ئەو گەردە پلاستیكیانە تا چ كاتێك بەردەوام دەبێت، هەروەها لە توێژینەوەكاندا ئەوەش ڕوون كراوەتەوە كە زیانی ماددە پلاستیكیەكان تەنها بۆ سەر كۆرپەلە نیە بەڵكو گەورەكانیش لەم زیانە بێبەش نین بەو پێیەی لە ئێستادا زۆرینەی خۆراكەكان لەناو بۆكس و كۆنتەینەری پلاستیكیدا هەڵدەگیرێن.

گەردیلە ...

گەردیلە پلاستیكییەكان بەوە جیا دەكرێنەوە كە زۆر بچووك و لاوازن بە ڕاددەیەك كە تیرەكەیان یەك (مایكرۆن) ە لە كاتێكدا كە تیرەی تاڵە پرچێك دەگاتە (50) مایكرۆن.

لە توێژینەوەكانی پێشوودا ئاماژە بەوە كراوە كە گەردیلە پلاستیكیەكان لە زۆرینەی ئەندامەكانی لەشی مرۆڤدا بوونیان هەیە كە بەرپرسن لە پاڵاوتن.

شوێنەواری گەردیلە پلاستیكیەكان لە سیەكان و جگەرو سپڵ و گورچیلەی بەخشراودا بەدیدەكرێت.

توێژینەوە ئێرلەندیەكە (10) جۆر لە مەمەی شیرپێدانی منداڵانی وەكو نموونە وەرگرت كە لە سەرانسەری جیهاندا بەكاردەهێنران وە دەركەوت (7) لەوانە گەردیلەی پلاستیكیان لێوە دەردەچوو لەكاتی بەكارهێناندا.

هەروەها توێژەران ڕونیانكردەوە، ئەوەی بەرپرسە لە دەرچوونی گەردیلە پلاستیكییەكان، پلەی گەرمی بەرزە؛ بۆیە هەتا پلەی گەرمی بەرزتر بێت ڕێژەی دەردراوی پلاستیكی زیاتر دەبێت.

بۆ خۆپاراستن لەم مەترسیانە توێژەران ئامۆژگاری دایكان دەكەن كە دووربكەونەوە لە ئامادەكردنی خواردن و خواردنەوە گەرمەكان لەناو دەفرو بوتڵی پلاستیكیدا بەڵكو دەتوانن لە شوشە یان هەرجۆرە دەفرێكی تردا ئامادە بكرێن و پاش ساردبوونەوە یان بگوازرێنەوە بۆ ناو بابەتە پلاستیكیەكان، وە بۆ ئامادە كردنی شیری منداڵیش بەهەمان شێوە.

(موحەمەد لادێ - هە‌ولێر)

 

هه‌واڵی گرنگ