لەپەروەردەی مرۆڤی مەردا، كۆمەڵگەیەكی جوامێر دروست دەبێت
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

لەپەروەردەی مرۆڤی مەردا، كۆمەڵگەیەكی جوامێر دروست دەبێت

پەروەردە پیشەی مرۆڤی مەرد‌و جوامێرە، مرۆڤی مەردیش خاوەنی بەهاوڕەوشتێكی بەهێزە.
ئەنجامدانی كارێكی دروستە بۆ هۆكارێكی ڕاست‌و تەندروست، جیاوازی نیوان هەڵە‌و ڕاست دەزانێت، هەمیشەش لە هەوڵی ئەنجامدانی كاری دروستدایە، با كەسیش نەیبینێ!
لە ڕاستیدا قسە كردن لەسەر مرۆڤی جوامێر، بەسانایی قسەكردنە لەسەر مەعریفەت‌و زانست، خۆشەویستی، كاركردن‌و ناسینی حەق‌و ڕاستی‌و دادپەروەری‌و كاری چاكە خوازی... لەسەر ئەم بنەمایە بەكورتی مرۆڤی جوامێر و مەرد خاوەنی كۆمەڵێك ڕەوشتی جوڵاوە‌و دروشمی گەڕان‌و تێكۆشان بەدوای سەركەوتنی ئابڕومەندانەیە لە ژیاندا‌و هیوا‌و ئاواتی بەهەشتی نەبڕاوەیە لەگەڵ ڕەحمەتی پەروەردگاردا.
جوانترین‌و نایاب ترین نموونە لەبوندا‌و باشترین پێشەنگ بۆ مرۆڤە مەرد‌و جوامێرەكان، پێغەمبەری خوایە(دروودی خوای لەسەر بێت) وەك نموونە كە پەروەردگار لەوەسفیدا دەفەرموێت: ( وانك لعلي خلق عظيم) سورەالعلم الایە4.
(لقد جا‌وكم رسول من انفسكم عزيز عليه ماعنتم حريص عليكم بالمؤمنين ر‌ووف رحيم) سورە التوبە( 128)
كاتێكیش پرسیار لەخاتوو عائیشەكرا (ر.خ) كرا سەبارەت بە ڕەوشتەكانی ئازیزمان وتی:" كان خلقە القران، ئایا قورئانتان نەخوێندۆتەوە خوای پەروەردگار لەوەسفی دا فەرمویەتی
( وانك لعلي خلق عظيم).
بەچونە خزمەت ژیاننامەی ئازیز ‌و پێشەوامان، دەتوانین بەئاسانی ببینین كە ئەو پێغەمبەرە ڕەحمەت بووە، ئەو مەردایەتی‌و جوامێری تێیدا لە بەرزترین ماناییدا ڕەنگیداوەتەوە، لەگەڵ ئەمانەدا یەكێك لە ڕۆشنبیرە ڕۆژئاواییەكان كتێبێكی لەبارەی 100 مرۆڤی گەورەو كاریگەر لە مێژووی مرۆڤایەتیدا نوسیوە، زۆر بەویژدانەوە باسی پێغەمبەری كردووە‌و محمدی كوڕی عبدالله(د.خ) كە ئەو مرۆڤێكی تایبەت ‌و كامڵە، هەڵیبژاردووەو كردویەتی بەپێشەنگی لیستی كەسایەتیە كاریگەرییەكان، بەهەموو پێوەرێك پێغەمبەر مەردترین كەسە لەسەر ڕووی زەوی، هەر ئەوەش بووە خوای گەورە گێراویەتی بەگەورەترین‌و بەرزترین پێشەنگ بۆ مرۆڤایەتی، بۆیە پێویستە بیكەینە پێشەنگ لەكرداری پەروەردەیی بۆدروست كردنی مرۆڤی جوامێرو مەرد، وەك پەروەردگار دەفەرموێت)لقد كان لكم في رسول الله اسوة حسنة)) سورە الاحزاب(21)
ئا لێرەوە باشترین بەرهەم بۆ داهاتوو ئایندەی هەرێمەكەمان (دروستكردنی تاكی جوامێرە) ئەوەش لەپێناو پاراستنی بەرهەمی ڕاستەقینەی مرۆڤایەتی‌و نەتەوەیی، كە منداڵ‌و لاوەكانن، دروستكەری گرنگترین سەرچاوەی گەشەپێدانی گشتی یە بۆ بونیادنانی ئایندەیەكی پرشنگدارو، بڵاوكردنەوەی ڕۆشنبیری‌و ئاشتی‌و ئاسودەیی لە ئیسلامدا.
بەم بۆنەیەوە پێویستیەكی زۆرمان لە گرنگی دان بە پڕۆژەی پەروەردەو فێركردن‌و جێ‌ بەجێ‌ كردنی بەهاباڵاكانی مرۆڤی مەرد‌و، گەشەپێدانی تواناكانی بۆ وەرگرتنی بڕیارە ڕەوشتە بەرز‌و سودمەندەكان لەم پرۆژەدا بەسەدان لە مناڵ‌و لاوەكانمان سودمەند دەبن ئەوەش لە ڕێگەی ڕێكخستن‌و هاوكاری كردن‌و لەگەڵ قوتابخانە‌و دەزگا پەیوەندیدارەكانەوە دەبێت.
هەروەك دەشزانین ئەوشتانەی دەیڵێن‌و دەیكەین دەبێتە بڕیارو بۆچون، چونكە شێوازی ژیانی ئێمە وەستاوە لەسەر چۆنێتی بیروبڕیارەكانمان بە تایبەتی بڕیارە ڕەوشتیەكان كە ئەخوازێ توانا دار بێت لە جیاكاری لە نێوان گریمانەو لە بری یا لەجیاتی بەدیلی شۆڕبوەوە بۆ خزمەتكردنی نیشتیمان‌و هاوڵاتیان‌و بەجێگەیاندنی ئاشتی‌و ئارامی‌و دڵنیایی.
ئەم دیدی پەروەردەییە، ئەخوازێ‌ ڕاهێنانی لەسەر بكرێت بۆ بە جێگەیاندنی كۆمەڵێك بەهای جەوهەری‌و كە پێیان دەوترێت ( پێنج بەها بنچینەیەكە بۆ پاكردنەوەی دەرون) كە ئەمانەن
( ئەمانەت پارێزی، دادپەروەری، هەستی بەرپرسیارێتی، ڕێزگرتن‌و بەزەیی).
ئەم پێنج بنەما پەروەردەییە، دەبنە بناغەی بڕیاری ڕاست‌و دروست بۆ داڕشتنی ژیانێكی جوان‌و چاك، كە تەوەرەی بەشداری ڕاستەقینەیە بۆ دەسەبەركردنی پێشڕەفتی شارستانی‌و نیشتیمانی‌و نەتەوەیی، هەروەك هۆكارێكی پەروەردەیی دروست‌و باشە بۆ بەشداریكردن لە دروستكردنی مرۆڤی جوامێردا.
ئەم بەها باڵایانەش شۆڕبۆتەوە بەسەر سێ‌ هۆكاری زیندوو لەدانی بڕیاردا كە یەكەم: جیاكاری، دووەم: دسپلین كردن، سێ‌ یەم: كاریگەرێتی.
جێگەی باسكردنە كە پڕۆژەی سەركەوتن‌و ناشتن‌و بەجێگەیاندنی بەهای دروستكردنی مرۆڤی جوامێر، كارێكی ئاسان نیە، بەڵكو پێویستی بەهەوڵدان‌و كاری بەردەوام هەیە، هەروەك چۆن سەركەوتن نەوەستاوە تەنها لەسەر زانست‌و زانیاری، بەڵكو پێویستی بەزیندوكردنەوەی ڕۆشنبیری‌و كار‌و كردارە بەڕوح‌و دەرونێكی تەواوەوە.
هەمیشەش ئەوەمان لەبیر نەچێت یەكەم هەنگاو بەرەو ڕێگەی ڕاست‌و دروست بۆ بێداری گەل‌و نەتەوە، لەگەشەپێدانی ڕەوشتێكی بەرزو پاكەوە دەبێت، دەرپەڕاندنی توانا شاراوە چاكەكان لەناخماندا بۆ داهاتویەكی زیاتر پرشنگ دار‌و گەش، ئەوكات سەركەوتن دەبێتە میوانی وڵات‌و هاوڵاتیانمان ئاسودەو بەختەوەر دەبن بەگوێرەو هاوڕێك لەگەڵ ئەو
داخوازییەكە پەروەرێنەری دەیخوازێت لەدروستكراوانی.

هه‌واڵی گرنگ