ساڵیادی 6/2، مەدرەسەی میانڕەوی لە نێوان قبوڵكردن و سەركوتكردندا
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

ساڵیادی 6/2، مەدرەسەی میانڕەوی لە نێوان قبوڵكردن و سەركوتكردندا

دیارە كورد وەك نەتەوەیەكی بێ‌ دەوڵەت هەردەم خەبات و كۆششی زۆری كردوە و لەم پێناوەشدا پەنای بۆ چەندین فیكرو ئایدیالۆژی جیا جیا بردوە،بۆیە ساڵنامەی ئەم نەتەوەیە پڕە لە یادی دامەزراندنی دەیان پارتی جیا جیا، بەتایبەت هەندێك لەم ساڵیادانە نرخ و بەهای زۆریان هەیە و رۆژی هاتنە ئارای رەوتێكە كە كاریگەری زۆریان بووە لە ئێستاو رابردوودا.
لە راستیدا شەشی دوو جیاواز لە ساڵیادی دامەزارندنەكانی تر تایبەتمەندی خۆی هەیە بۆ؟ لەبەر ئەوەی یادی ئیعلانكردنی پارتێكی ئیسڵاح خوازی مەدەنیە،بێ‌ گومان كۆمەڵێك سیما و سیفەتی تایبەت هەن ئەم پارتە لە پارتەكانی تر جیا دەكاتەوە كە مەدەنی بوون و گرێدانی هەردوو چەمكی نەتەوە و ئاین خاڵی درەوشاوەی ئەم رەوتەیە. ئاشكرایە خەڵكانێك بە دەستی ئەنقەست لە ئێستاو رابردوودا زۆر هەوڵیانداوە و دەدەن كە ئەم دوو چەمكە لەیەكتری بتۆرێنن و لە یەكیان بترازێنن،بەڵام نیشاندانی عەمەلی بەیەكەوە بەستنەوەی دوو چەمكەكە جوانترین نمونەی نیشانی دۆست و دوژمن داوە. ئەم ساڵ یادەكە لە دۆخێكی زۆر جیاواز لە ساڵانی رابردوو دەكرێتەوە،چونكە دۆخێك سازاوە یان راستر بڵێن سازێنراوە كە یەكجار زۆر جیاوازە لە ساڵانی رابردوو وەك چی؟
وەك زۆر شت، وەك ئەم رەوشە جیهانی و نێودەوڵەتیە نالەبارەی لە دوای داتاشینی داعش سەری هەڵداوە،وەك ئەو شەڕەی لە پەنای دین دەكرێ‌ و لە هەمانكاتدا دین بەئامانج دەگرێ‌ نەك ئامانجی دین بێ‌،وەك كڵپەی ئەو ئاگرە بڵێسەدارەی بێ‌ تاوانان دەسوتێنێ‌ و بە مەقاشی تاوانباران خۆشدەكرێ‌،وەك ئەو تەڕو وشك بەیەكەوە سوتاندنەی بە دەستی ئەنقەست تێكەڵ و پێكەڵ دەكرێ‌ و زوڵم و ناعەدالەتی و ناحەقی پێ‌ پەردەپۆش دەكرێ‌. ئێستا لە تەواوی دنیا یان بەشی هەرە زۆری دنیا ئارامی و ئۆقرەیی نەماوە و شەڕی ئیرهاب راگەیەنراوە،باشە بەڵام كام ئیرهاب؟ئاخر پێناسەی ئیرهاب چیە؟ كێ‌ لە خۆدەگرێ‌ و شمولی كێ‌ دەكات؟بە كێ‌ دەوترێ‌ ئیرهابی؟ لە راستیدا وەڵامی ئەم پرسیارانە لای هیچ كەس دەست ناكەوێ‌،ئەوەی كە حاشا هەڵنەگرە ئەوەیە هەركەس داوای هەر مافێكی خۆی بكات بەدەر لە شێوازی مامەڵە و تێگەیشتنی لە میكانیزمەكان ئەوە بێ‌ دوو و سێ‌ ئیرهابیە!!! هەموو معارەزەیەك لە جیهانی سێیەم یان راستر بڵێم لە جیهانی بەدناو و بەدبەختی خۆرهەڵاتی ناوەڕاست ئیرهابیە،خوێنی حەڵاڵە گوێ لێگرتنی مەحاڵە.
لە كاتێكدا تەواوی بیرمەندانی ناوداری ئازادیخواز یەك دەنگن كە ئیرهاب بەشێكی كەمی لە ناخ و شعوری هەندێ‌ كەس و لایەندا بوونی هەیە،بەڵام لە ژوورە تاریكەكان بە بەرنامەی تۆكمە و نەخشە بۆ دارێژراو هەست و نەستی خەڵكانێكی زۆر دەجوڵێنرێ‌ و دەستێكی شاراوە پاڵیان دەنێ‌ بۆ باوەشی ئیرهاب بیرەكان. وابزانم نمونە زیندووەكانی دەوروبەرمان هێندە زۆرن پێویست بە ئاماژە بۆ كردن ناكات،دەی دەتوانین بپرسین باشە بۆ دوای 9 ساڵ شەڕی سوریا یەكلا ناكرێتەوە؟بۆ بەدەستی ئەنقەست رێگادرا هەزار و یەك گروپ و پێڕی جیا جیا و غەریب و عەجیب سەرهەڵ بدات؟ بۆ رێگا درا ئەو وڵاتە ژێرە و ژوور بێ‌ و دیمەنێكی لێدروست بێ‌ كە لە هیچ فلمێكی سینەمایی ترسناكی هۆلیۆدیش بەدی نەكرێ‌؟!!! بۆ بە رۆژی رووناك و لەبەر چاوی هەموو دنیا ئینقیلابی عەسكەری لە میسردەكرێ‌ و حاكمێكی مەدەنی هەڵبژێردراو دەكرێتە زیندان و، جەنەراڵێكی زایەنی ئەمریكی دەكرێ‌ بە سەرۆك؟بۆ شیعە مەزهەبێكی ئەفكار فاشی وەك مالیكی 8دانە ساڵ بە راست و چەپ خەڵكی كوشت و كەس متەقی نەكرد؟هەموو ئەوانە پێمان دەڵێن ئەوانەی تمساح ئاسا بۆ ئازادی و مافی مرۆڤ دەگرین و بە پارەی نەونەتی نەعلەتی ناوچەكە چەك و تەقەمەنیمان پێدەفرۆشن و گیرفانیان گەرم دەكەنەوە، خۆیان دەرهێنەر و سازێنەری ئەفكاری داعشیەت و وەحشیەتن.ئەوە نیە رێگا لە بیری میانڕەوی دەگرن و بە دەستی جەنەڕاڵەكانی وەك سیسی و ئەسەد و هاومەشڕەبەكانیان قەتڵ و عامیان دەكەن و، لە سوچی زیندانەكان دەست بۆ شەرەف و ناموسیان دەبەن و، رۆژانە لە ژێر ئازارو ئەشكەنجە بە سەدان خەڵكی بێ‌ تاوان گیان لەدەست دەدات.زۆر راستە لە كۆنەوە وتویانە دز حەزی لە بازاڕی قەرەباڵغە،چونكە لە بازاڕی ئارام و چۆڵ دزی ناكرێ‌، لە شار و وڵاتی بێ‌ شەڕ و ئاژاوەش ئەوان دەبن بە شێرە بەفرینەی بەر تەنور و خۆیان ناگرن.
كورت و پۆخت قسەی زل و دروشمی بریقەدار بە قەد باڵی مێشولەیەك ئەرزشیان نیە،بەڵكو هەنگاوی عەمەلی حسابە و حساب دەكرێ‌،ئێستا كە هەموو دنیا هات و هاواریەتی و لە داخی ئیرهاب یەخەی خۆیان دادەدڕن، چەندیان ئامادەن دان بەراستیەكاندا بنێن و خۆیان ئیرهاب سازی نەكەن و مەدرەسە و فیكری میانڕەوی قبوڵ دەكەن، بۆ تۆمەتی داتاشراو بۆ خەڵكی دڵسۆز و هەڵگری بیری وەسەتیەت دروست دەكەن،بۆ رێگا نادەن شەڕی ئیرهاب بە فیكر بكرێ‌ نەك بە لولەی تفەنگی ئەوان؟ بۆ لە رێگا حاكمە مل هوڕەكانی ناوچەكە دەنگی ئازادی كپ دەكەن؟ بۆ...بۆ.

هه‌واڵی گرنگ