پێشكەوتنی كۆمپیوتەرسازی دەگاتە ئاستێكی مەترسیدار
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

پێشكەوتنی كۆمپیوتەرسازی دەگاتە ئاستێكی مەترسیدار

 

 

بۆچی پێشكەوتنی خێرا لە بواری كۆمپیوتەرسازی و زیرەكی دەستكرد بەم زووانە دەگات بە ئاستێكی ترسناك و تۆقێنەر..!

سیستەمە خودكارەكانی زیرەكی دەستكرد دەبنە گەورەترین هەڕەشە لەسەر ژیان لە دوای چەكە ناوكیەكان لە داهاتوێكی نزیكدا...

لە دوای ناوەڕاستی سەدەی بیستەمەوەو بەوردی لە دوای جەنگی جیهانی دووەمەوە تەكنەلۆژیا لەهەموو بوارەكان زۆر بەخێرایی بەرەو پێشەوە دەچێت، بەڵام نزیكەی (25) ساڵ دەبێت ڕەوڕەوەی ئەو پێشكەوتنە بە تایبەتی لەبواری كۆمپیوتەرسازی و زیرەكی دەستكردو پڕۆگڕامسازی ئەوەندە خێرا بووە بەجۆرێك خەریكە دەگات بە ئاستێكی ترسناك.

بۆچی ئەو تەوژمە خێرایەی پێشكەوتن لە بواری زیرەكی دەستكرد ترسناك و تا ڕادەیەكیش تۆقێنەر دەبێت لە داهاتووێكی نزیكدا ..؟

لەوانەیە زۆربەتان ئاگادار نەبن، بەڵام ئێستا بواری جێبەكردنەكانی زیرەكی دەستكرد چۆتە ئاستێكی نوێ، ئەویش هەنگاونانە بەرەو دانان و بەكارهێنانی زیرەكی دەستكرد بەشێوەیەك جگە لەوەی سیستەمەكە خۆی هەموو كارێك دەكات، بەڵام بەتێپەڕبوونی كات هەر خۆی لەخۆیەوە فێردەبێت و وردە وردە زیرەكتر دەبێت بەبێ دەستكاری مرۆڤ، ئەمەش پێی دەووترێت (machine.learning،) لەبەر ئەوەی تا ئێستا هیچ پڕۆتۆكۆڵێكی فەرمی نیە لەنێوان حكومەتەكان و ناوەندە زانستیەكان بە تایبەتی لە ئەمریكا كە تا ئێستا خاوەندارێتی بڕبڕەی پشتی زیرەكی دەستكرد دەكات بۆیە ئەم هەنگاوە دەشێت زۆر ترسناك بێت، چونكە لەم شێوەیە لە دامەزراندن و جێبەجێكردنی زیرەكی دەستكرد هیچ دڵنیاییەك نیە كە یەكەم هەڵەی گەورەو كوشندە ڕوونادات لەلایەن ئەو سیستەمانەی كە بەم ڕێگەیە كاردەكەن، دووەم لە قۆناغێك لە قۆناغەكان كە هێشتا ماوە بگەین پێی لەوانەیە ئەو سیستەمانە لە مرۆڤ زیرەكتربن و بگەن بە ئاستێك لە ژێر كۆنتڕۆلی مرۆڤ دەربچن، هەروەها سێیەم ئەوەی بتوانێت سیستەمێكی بەهێزی لەم شێوەی هاك بكات ئەوا دەبێتە خاوەن توانایەكی زۆر وێرانكەرو ترسناك.

لەوەش ترسناكتر ئەوەیە ئێستا ئەو ڕێگایە لەلایەن هەندێك ووڵاتەوە بەكاردەهێنرێت بۆ پەرەپێدان بە دروستكردنی سیستەمی چەكی زیرەكی خودكار، بۆیە دورنیە لەداهاتوودا شەڕەكانیش بەتەواوی لەلایەن زیرەكی دەستكرد لەڕێگەی ڕۆبۆتەوە ئەنجام بدرێن، بۆ ئێستاش وەكو خەیاڵی زانستیە، بەڵام سیستەمێكی زۆر زیرەك و بەهێزی ئەوها ئەگەر لەدەست دەربچێت لەوانەیە یەكەم كاری لەناوبردنی مرۆڤ بێت ..!

تەنیا بۆ ئەوەی بزانن ئاستی زیرەكی دەستكرد لە ئەمڕۆدا گەیشتوە بە كوێ، دوو نموونەی زۆر سادە دەهێنمەوە كە ئاشكران:

یەكەم: پرۆسێسەری ئایفۆن 12 كە پێی دەووترێت A14.Bionic.chip و ڕووبەرەكەی ئەوەندەی سەری پەنجەیە، بەڵام خێراییەكەی یەكسانە بە خێرایی 11.8 ملیار ترانسیستۆر ئەگەر هەموو ئەو ترانسیستۆرانە بەیەكەوە كار بكەن، بۆ وەبیرهێنانەوەش ترانسیستۆر ئەو پارچە ئەلیكترۆنیە بچووكەیە كە تا ساڵانی هەشتاكان و نەوەتەكانی سەدەی ڕابردوو لە ئامێرە ئەلیكترۆنیەكان بەكاردەهێنرا، بۆ نموونە ڕادیۆیەك تەنیا شەش حەوت تڕانسیستۆری تێدا بوو بۆ ئەوەی كاربكات...!

دووەم: بەشی سەرەوەی وێنەكەی خوارەوە كارتێكی مێمۆریە كە لەسەری پەنجە بچووكترە، بەڵام توانای هەڵگرتنی یەك تێرا بایت لە زانیاری هەیە، ئەمەش واتا (1000) گێگا بایت..!

بێ گومان لەوانەیە پێشكەوتنەكان لە بواری كۆمپیوتەرسازی و زیرەكی دەستكرد لە ئاستێكی زۆر بەرزتریش بێت لەوەی ئێمە ئێستا دەیزانین، لەوانەیە گەلێك داهێنانی تر هەبن لەو بوارە گرنگە نهێنی بن وەكو كۆمپیوتەری كوانتەم و جارێ ئێمە ئاگاداری وردەكاریەكان نەبین...

(لوقمان حەوێز – تێكساس)

 

 

لا يتوفر وصف للصورة.

 

 

هه‌واڵی گرنگ