ئایا ڕیخۆڵە تووشی گیران دەبێت ؟؟
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

ئایا ڕیخۆڵە تووشی گیران دەبێت ؟؟

 

 

ریخۆڵەكان پێكهاتەیەكی شێوە لولەیین دەكەوێتە ناو بۆشایی سك، فەرمانێكی زۆر گرنگ جێبەجێ دەكەن، ئەویش بریتیە لە هەڵمژینی تەواوی پێكهاتە خۆراكیەكان، لەدوای خواردن و خواردنەوە، كە بە هۆیەوە مرۆڤ گەشە دەكات و توانای كردنی جوڵەوەو بیركردنەوەی دەبێت، فەرمانێكی تریان بریتیە لە دەركردنە دەرەوەو رزگاركردنی لەش لەو پاشماوە خۆراكیانەی كە ناتواندرێ هەڵمژرێن.

یەكیك لەو ئاریشانەی دووچاری ریخۆڵە دەبێت گیرانی ریخۆڵەیە، كە بەهۆیەوە لەش ناتوانێت خۆی رزگار بكات لە پاشماوە خۆراكیەكان و دەبێتە هۆی پەنگاو خواردنەوەی شلەی ناو ریخۆڵەكان و كەڵەكە بوونی پاشماوەكان.

هۆكارەكانی گیرانی ریخۆڵە بریتیە لە بوونی گرێ، پێكەوەنووسان ، سوڕان، خنكانی فتق، و چوونە ناو یەكتری ریخۆڵەكان، ئەوانە دەبنە هۆی داخستنی بەشێك لە ڕێڕەوی ریخۆڵە، هەندێك جار ئەو هۆكارانە بوونی نیە، بەڵام بەهۆی نەمانی جوڵە لە ریخۆڵەكان بە هۆكاری هەندەك نەخۆشی یان دەرمان، توانای دەركردنە دەرەوەی پاشماوە خۆرەكیەكانی نابێت و دەبێتە هۆی گیرانی ریخۆڵە.

هاوكات نیشانەكانی ریخۆڵە گیران، بریتیە لە هەڵئاوسانی سك ئازاری سك، ڕشانەوەو دەرنەچوونی پاشەڕۆو غازات، ئەو نیشانە هەندێكیان لە سەرەتاو هەندێكیان دوای چەند ڕۆژێك بە دیار دەكەون، ئەگەر زوو چارەسەر نەكرێت، لەوانەیە ماكە ترسناكەكانی گیرانی ریخۆڵە رووبدات، وەكو ڕەشبوون و مردنی ریخۆڵەكان، تەقینی رێخۆڵە، ژەهراوی بوونی خوێن و لە كاركەوتنی گورچیلەكان.

گیرانی ریخۆڵە حالەتێكی كت و پڕەو پێویستی بە چارەسەری هەیە، بەشێكی زۆریان پێویستیان بە نەشتەرگەری دەبێت، كەمێكیشان بە چارەسەری و چاودێری كردن باش دەبن، بەتایبەتی ئەگەر هۆكارەكە نەمانی جوڵەی ریخۆڵەكان بێت، لۆیە هەڕكاتێك هەستت بە بوونی ئەو نیشانانە كرد، سەردانی نەخۆشخانە فریاكەوتنەكان بكە و راوێژ بە پزیشكی نەشتەرگەر بكە.

(د. شێركۆ عەباس نادر – پسپۆڕی نەشتەگەری و نەشتەرگەری بەنازوور)

هه‌واڵی گرنگ