لەجیهانی سۆشیاڵ میدیا هیچ تاكێكی ئەم كوردستانە دڵنیا نیە كەی ئابڕو و سومعەی دەچێت!!!
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

لەجیهانی سۆشیاڵ میدیا هیچ تاكێكی ئەم كوردستانە دڵنیا نیە كەی ئابڕو و سومعەی دەچێت!!!

مرۆڤ پێك دێت لەسومعەو كەسایەتی، هەر كات كەسایەتی لەكەدار بو كۆتایی بەژیانی مەعنەوی دێت، بەداخەوە ململانێی بەرژەوەندی پۆست و پارە هەمو سنورێكی تێپەڕاندوە، هیچ تاكێكی كورد ئێستا لەهەرێمی كوردستان زامن نیە هەر چركەیەك بیانەوێ‌ لەكەسایەتی بدەن، ئابڕوی ببەن، بەسیخوڕی لەقەڵەم بدەن، بیكەنە سێبەری دەسەڵات، گرتەی ڤیدیۆیی لەڕوی ئەخڵاقیەوە بۆ دروست بكەن، بەپارە خۆرو دزی لەقەڵەم بدە، وینەی بڵاو بكەنەوە و بەڤۆتۆ شۆپ چۆنیان بوێ‌ ئاوا نیشانی بدەن، دیندار بكەنە بێ‌ دین و بێ‌ دین بكەنە مەلائیكەت.

ئۆپۆزسیۆن بكەنە سیبەری دەسەڵات و دەسەڵاتیش بكەنە ئۆپۆزسیۆن، كەسایەتی خاوەن جورئەت و مەبدەئی بەسیخوری بۆ دەسەڵات لەقەڵەم بدەن و شكۆی بشكێنن، بەچەند گرافیك و گرتەیەكی مۆنتاژ كراو لەگەڵ پارەی زۆری دزو گەندەڵەكان سپۆنسەری بۆ بكەن و كۆتایی بەكەسایەتی و سومعەی كەسەكان بهێنن، هۆكارەكەشی بۆ ئەوە دەگەڕێتەوە، لەدونیادا سێ‌ شت وادەكات سومعەی كەسەكان پارێزراو بێت.

یەكەم: دین، بەداخەوە لەكوردستان پێوەری دینی تەنها لەچوارچیوەی تەدەیون كاری پێ‌ دەكرێت، زۆر نەچۆتە نێو هەڵسوكەوت و كردار، بۆیە بەتایبەتی لەململانێی سیاسی و پلەو پۆست هیچ ڕۆڵێكی نەماوە، زۆر كەسایەتیش خاوەن مەبدەئی پۆڵایینبوون بەداخەوە ئێستا بەلایەكدا كەوتوون.

دووەم: ئەخلاق سیاسەت و سۆشیاڵ میدیا لەهەموو بەشەكانی ژیان زیاتر پێویستیان بەئەخلاقە، بەداخەوە ئەمەشیان وەك بواری ناموس تەماشا دەكرێت و لێكدەدرێتەوە، زۆر نەچۆتە نێو قوڵایی كاری ڕاگەیاندن، بۆیە ئەم هەموو بوهات و قسە ناڕاستەی تێكەوتووە.

سێیەم: یاسا: دیارە لە كوردستان یاسا هیچ بوونی نیە، بۆ ئەوانەی دەسەڵاتیان لەدەستە، خۆ بوهتان و تۆمەتیش بەشی زۆری لەلایەن حیزبی دەسەڵاتەوە شۆڕ بۆتەوە بۆ نێو خەڵك، كوا یاساكانی وەزارەتی ڕۆشنبیری و ڕاگەیاندن بۆ ئەم هەموو لادان و بوختان و درۆو لەكەدار كردنەی ماڵ و خێزان و تاكەكانی ئەم كۆمەڵگایە.

چارەسەر چیە؟
ئەم دۆخەی ئێستا ئەوەندە ئاڵۆزە، چونكە دەسەڵات بەشێكە لە تێكدانی سومعەی تاك و كۆمەڵگا و خێزان، چارەسەر زۆر ئەستەمە، بۆیە تەنها ڕێگایەك ئەوەیە ئەوەی بڵاوی دەكەیەوە تەنها بۆ خودا بیكە، خۆت بوهتان بۆ كەس دروست مەكە لەفەیسبوكەكەی خۆت، بەشدار مەبە لە لایەنگیری و تەرەفگیری و گەندەڵ و بێ‌ حورمەتەكان، ئەوكات ئەگەر بوهتانیشت بۆ دروستكرا، خودا دەتپارێزی، بەمەرجێك ئارام بگری و پەنا نەبەیە بەر گەندەڵكاران، بۆ ڕاست كردنەوەی باری لاری خۆت، تەنها پەنا ببە بەر خودا.

هه‌واڵی گرنگ