ساخلەمیا پاریزگەھا دھۆکێ بۆ كوردیو بەحسا کێماسیێن نەخۆشێن تەلاسیمیایێ دکەت و دیاردکەت، رۆژانە ئەو پێدڤی ب خوینێ دبن و دەرمان ژی دکێمن.

دوھی رۆژا نەخۆشیا تەلاسیمیایێ یە، وەزیری ساخلەمیا هەرێما کوردستانێ، د. سامان بەرزنجى داخوازکر هەمى گەنج بەرى ژیانا هەڤژینیێ پێک بینن پشکینینا خوینێ بکەن و بەخشینا خوینێ ژى بەخشینا ژیانێ ب هندەکێن دى ناڤکر.

د. سالم خەلەف، رێڤەبەرێ سەنتەرێ ژین یێ نەخۆشیێن تەلاسیمیایێ ل ساخلەمیا پارێزگەھا دھۆکێ بۆ كوردیو گۆت: دو سەنتەرێن تەلاسیمیایێ ل پارێزگەھا دھۆکێ ھەنە، ئێک ل سەنتەرێ پارێزگەھێ یە و ئێک ژی ل ئاکرێ یە و ئاشکراکر، نوکە ل سەر ئاستێ ھەر دو سەنتەران زێدەتر ژ ھزار و ١٠٠ نەخۆشێن تەلاسیمیایێ ھەنە.

ھەروەسا گۆتژی: بتنێ د ئەڤسالە دا ١٣ حالەتێن نوی ھاتینە تۆمارکرن و ھەیڤانە ئەو پێدڤی ب زێدەتر ژ ٥٠٠ بتلێن خوینێ دبن و ساخلەمیا دهۆکێ و بانکا خوینێ بۆ وان دابین دکەن، لێ ب بەردەوامى ئەو پێدڤى ب خوینێ دبن.

ل دۆر کێماسیێن وان ژی رێڤەبەرێ سەنتەرێ ژین ئاشکراکر: وان پێدڤی ب دەرمانان ھەیە و ب تایبەت ژى دەرمانێن کێمکرنا رێژەیا ئاسنی د ناڤا خوینێ دا.