ئیسرائیل ئەو تاقەدەوڵەتەی کەلەسەر بناغەی ئاین (جولەکە ) بەپشتیوانی بەریتانیاو ئەمریکاو فەرەنسا لەساڵی ١٩٤٨ لەسەر خاکی داگیرکراوی فەلەستینیەکان دامەزرا، ئەویش لە پاش چەندین هەڵمەتی خوێناوی و قەسابخانە لەدژی ژن و مناڵ و پیری فەلەستینیەکان ، لەلایەن گروپە تیرۆریستیە زایونیستەکانەوە..

 

ئەم دەوڵەتە کەناوەکەشی (ئیسرائیل - یەعقوب) لەسەر بنەمای ئاینی جولەکە دانراوە ، دانیشتوانەکەی لەچەندین نەتەوەو ڕەنگ و ڕەگەزی جیاجیا کە لە (ڕوسیاوە بۆ ئاسیاو ئەفریقاو ئەمریکا) وە هاتون ، پێکهاتوە.. تەنها خاڵێک کە ئەوانی کۆکردۆتەوە جولەکە بوونە ،واتە ئینتیما بۆ ئاینی جولەکە..

 

ڕاستە هەر لەڕۆژی دامەزراندنیەوە ئەم قەوارەیە لەلایەن زلهێزانەوە بەتایبەت ئەمریکاو بەریتانیاوە پشتگیریی دەکرێ و یەکێتی سۆڤیەتی شیوعی جارانیش، یەکەم دەوڵەتی ئەندامی هەمیشەیی ئەنجومەنی ئاسایش بوو ،کە بەڕەسمی دانی بە(ئیسرائیل) دا نا، بەڵام لەڕاستیدا بێ هەڵوێستی و خیانەتی ڕژێمە عەرەبیە کان ، بەتایبەتی میسرو وڵاتانی کەنداو، هۆکاری سەرەکی بەردەوامبوونی ئیسرائیل بوو ، لەسەر جێبەجێکردنی پلانەکانی بۆ بەجوولەکە کردنی شاری (قودس) و شارەکانی دیکەی بەری ڕۆژئاوای ڕوباری ئوردەنیش.

 

ئەم هێرش و پەلامارەنوێیەی حکومەتی ئیسرائیلیش بۆسەر قودس و غەززە ، بەشێکە لەسینارێویەکی نەتەنیاهۆ بۆ داپۆشینی کەیسەکانی گەندەڵی کەلە ناو ئیسرائیلدا لەدژی جوڵێنراوەو مەترسی هەیەبدرێتە دادگاو بەتاوانبار بدرێتە قەڵەم و سزا بدرێت.

 

 

 

«بۆ بیرهێنانەوە» 

 

ئیسرائیل هەرگیز دۆستی کورد نەبووەو ئەگەر لەشەستەکان و حەفتاکانیشدا پاڵپشتی شۆڕشی کوردی کردوە لەباشوری کوردستان ، لەبەرچاوی کاڵی کوردنەبووە و پەیوەندی بەو ململانێیەی نێوان ئیسرائیل و عەرەبەوە هەبووە و ئامانج لاوازکردنی دەوڵەتی ئێراق بووە نەک سەرخستنی شۆڕشی کورد ..

 

هەمولا هەڵوێستی ( هنری کیسنجڕی جولەکە) ی وەزیری دەرەوەی ئەوکاتی ئەمریکامان لەبیرە کە چۆن پاش کۆبوونەوەی لەگەڵ سادات لە ١٩٧٣ ، لەپێناو سەرخستنی پرۆسەی ( ئاشتی عەرەب - ئیسرائیل) لە ئازاری ١٩٧٥ دەسبەرداری کوردو شۆڕشەکەی بوون و پشتیان دالە ئەرز .

 

لەسەردەمی نوێشدا لە ساڵی ١٩٩٩ مۆسادی ئیسرائیلی بوو کەهاوکاری دەزگای هەواڵگری تورکیا ( میت) ی کردو (نەتن یاهۆ) ی سەرەکوەزیرانی ئەوساو ئێستای ئیسرائیل بوو کە بەهاوئاهەنگی (پۆڵند ئەجەوید) ی سەرەکوەزیرانی تورکیا، ( عەبدوڵا ئۆجەلان) ی سەرۆکی پەکەکەیان دەسگیرکردو خستیانە زیندانەوە.

 

سەبارەت بە پاڵپشتی ئیسرائیلیش بۆ ڕیفراندۆمی کوردستان لە ٢٠١٧ لەڕاستیا ئەوەندەی قسەو دەس لەپشتدان بوو ، پشتگیرییەکی ڕاستەقینە نەبوو کە ئەنجام و ڕەنگدانەوەیەکی ئیجابی و جددی هەبێ، ئەوەبوو لە پاش ئەنجامدانی ڕیفراندۆمەکە ، پشتیان لە کوردکردو بەتەنها بەجێیان هێشت بۆ میلیشیا شیعەکان ، کەپەلاماری کوردستانیان داو تێکڕای ناوچە دابڕێنراوەکانیان داگیرکردەوە.