بەشێك لە پیاوان، بە هۆی چەند گرفێك تووشی میزە چركە دەبن، (د.كاردۆ حەسەن ژاژڵەیی) پسپۆڕی نەخۆشییەكانی گورچیلەو پڕۆستات و میزەڕۆ باس لە هۆكارەكان و چۆنیەتی چارەسەركردنی ئەو گرفتە دەكات بۆ ئەو كەسانەی بەدەست میزەچركەوە دەناڵێنن.

لە سەرەتادا (د. كاردۆ حەسەن ژاژڵەیی) ڕوونیدەكاتەوە كە میزەچركە لەئەنجامی دەرچوونی چەند دڵۆپێك میزە بۆ ناو چوك لە دوای تەواو بوونی میزكردن كە یەكێك لە هۆكارەكانی بریتیە لە لاوازبوونی ماسولكەكانی حەوز كە كۆنتڕۆڵی میزكردن دەكەن، بەجۆرێك كە دوای بەتاڵبوونی میزەڵدان و خاوبوونەوەی ماسولكەكانی میزەڵدان ئەو ماسولكانەی كە وەك سەمام كاردەكەن بۆ ئەوەی هیچ بڕە میزێك دەرنەچێت بۆ ناو چوك ئەوا لەم بارەدا وەك پێویست بەهێزنین و ناتوانن بەتەواوی ڕێگە لەدەرچوونی میز بگرن بۆ ناو چوك.

لە بارەی چارەسەریشییەوە (د. كاردۆ حەسەن ژاژڵەیی) ئاماژە بەوەدەدات كە چەند ڕێگەیەك هەیە بۆ چارەسەر هەرچەندە لەوانەیە وەك پێویست كاریگەر نەبن، بەڵام یارمەتیدەردەبن.

1. دوای تەواو بوونی میزكردن ئەگەر بەدانیشتنانەوە بویت ئەوا پێش هەڵسان بە دەستت لە بەشی بنەوە بۆ پێشەوە چوكت بگوشە بۆ ئەوەی هەرچەند میزێك تیای ماوە بێتە دەرەوە، ئەگەر بە پێوەبوویت چەند جارێك بەهێواشی ڕای بوەشێنەو پاشان بیگوشە بۆ ئەوەی بەتاڵ بێتەوە.

2. بۆ بەهێزكردنی ماسولكەكانی حەوز دەبێت ڕاهێنانیان پێبكەیت، ڕۆژانە چەند جارێك ئەم ڕاهێنانە بكە بەم شێوەیە، ماسولكەكانی دەوری كۆمت كرژ بكەو خاوی بكەرەوە وەك ئەوەی كۆنترۆڵی دەرچوونی با بكەیت لە كۆمەوە، ئەمە دەبێت بۆ ماوەی پێنچ چركە گرژی بكەیت و پاشان خاوی بكەیتەوە (10) جار دووبارەی بكەرەوە بەلایەنی كەمەوە سێ جار لە ڕۆژێكدا.

3. ئەگەر هەربەردەوام بوو دەتوانیت پارچە كلێنسێك بكەیتە ناو شۆرتەكەتەوە بۆ ئەوەی ئەو چەند دڵۆپەی دێنە خوارەوە جلەكان تەڕ نەكات.

4. بەكارهێنانی دەرمان، ئەگەر هەرباش نەبوویت بەبەكارهێنانی شێوازی یەكەم و دووەم ئەوا دەتوانیت سەردانی پزیشك بكەیت، چارەسەرێك هەیە كە خۆی بۆ مەبەسی تر بەكاردەهێنرێت، بەڵام هەندێ لێكۆڵینەوە دەریان خستووە كە یارمەتیدەرە بۆ ئەم حاڵەتەش، ئەو كەسانەی زۆر ئاو دەخۆنەوە ئەوا زۆریش میز دەكەن، هەرچەندە ئاوخواردنەوە باشە، بەڵام ئەگەر زۆریش بوو ئەوا سوودی نابێت بەڵكو تەنها دەبێت بە میزو ناڕەحەتت دەكات.

(د. كاردۆ حەسەن ژاژڵەیی) بە گوێرەی پسپۆڕییەكەی خۆشی لەووی شەرعەوە بۆ نوێژخوێنانی ڕووندەكاتەوە كە ئەوانەی میزەچركەیان هەیەو دەشڵێت: بەپێی هەندێ فەتوا ئەگەر تەنها چەند دڵۆپێك بوو دوای تارات یان دوای دەستنوێژ هەڵگرتن هاتە خوارەوە ئەوا پێویست ناكات دەستنوێژ هەڵبگرێتەوە یان بگەڕێتەوە توالێت جارێكی تر تارات بگریتەوە بەڵكو نوێژەكەت بكەو ئەگەر زانیشت هەموو جارێك زۆر دێتە خوارەوە ئەوا كلێنسێك یان پارچە قوماشێك لەنو جلەكانی ژێرتەوە دابنێ و دوای نوێژەكەت فرێی بدە، ئەم فەتوایە لەسەر ئەو بنەمایە دانراوە كە خوای گەورە بەپێی توانای خۆمان لێپرسینەوەمان لێ دەكات و ئەسڵ لە دیندا ئاسانكارییە، خوای گەورە لەهەموو لایەك خۆش بێت.