خاتوینا UNێ ڕاست گۆت، یێ چڤێ ل بن پیێ خوەرا ببڕت دێ ستویێ وێ شکێت یانژی...!
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

خاتوینا UNێ ڕاست گۆت، یێ چڤێ ل بن پیێ خوەرا ببڕت دێ ستویێ وێ شکێت یانژی...!

جاسم محمد شرنەخی

دچیڕۆکێن فلوکلوریدا هاتیە دبێژن کەسەک ل ڕێکا خوە دچوو دیت زەڵامەک یێ ل سەر دارەکێ و یێ چقێ ل بن پیێ خوەڕا دبڕت، گۆتی: برا هوشیاربە ئەو شۆلا تو دکی زۆر تڕسناکە تو دێ ژ وێ بلنداهیێ ب ئاخێ کەڤی، وی دەمی کەسێ دوویێ بەرسڤەکا توندا و گۆتیێ هەرە ل سەر ێکا خوە، تو ژکیڤە دزانی ئەز دێ کەڤم؟! یێ ئێکێ ژێ گۆت: ب کەیفا تەیە، تو نەیێ گۆتنا چاک و خێرێی، ئەز ژتە خرابترم ئەگەر ئەز شیرەتا خوە ل تە دۆبارە بکم! لێ پشتی دوو سێ گاڤا چووی قڕێن ژ دارێ هات و ڕەپو ب ئەردی کەفت و بێ هەوار هەوارێت وی ژ بەر ئێشانا ماسولک و گەهو هەستیێن وی. لێ دسەر حالێ خۆەڕا نە ڕاوەستا گازی کەسێ ڕێڤنک کر گۆتی: ئیللا تو دێ تشتەک دیترژی بێژیە من، گۆتێ چیە؟ خودانێ داڕێ گۆت: مادەم تە زانی ئەز دێ ژوێ بلنداهیێ کەڤم واتە تو عیلمێ غەبیێ دزانی، هەلبەت تو دزانی ئەز دێ کەنکی مرم ژی، ڤێجا نابت تو خوە ب لڤینی هەتا بو من ژڤانێ ئزڕائیلێ یێ کێشانا روحا من دیار نەکی...!!،

چیڕۆک هێشتا یا مای لێ دا زێدەتر دەمێ خواندەڤێ هێژا نە گرم بلا بەس بیت. باوەرکن پڕسا سەرکێشێن مە ژ وێ نەزانێ دار د بن پیێ خوەدا د بڕی گەلەک سەیرتر و دلئێشترە، هەر چەندە ژی دڤیا مەزنێن مە ل سەر داران نە ڕەقسی بان، و کارڕێن ئەنجام خراب و مەترسی و کارەسات نە کربان، لێ سەرەڕای وێ چەندێ ژی ـ هەما کێمترین ژیری و ئاقلێ سیاسی ئەوە گوهێ خوە نە گرن ژ بیرئینان و هوشداریێن ڕاستێن خەلکەکێ دیتر ل وان و ل مە کوردان دکن نەخاسمە ئەگەر ژ هەڤالێن مەیێن شارەزابن. من ژ وان ئاخفتنێن کوربەندا دوهیا ل دستوری هاتینە گۆتن خواندنەک د بەشداریا خاتوو :(جينين هينيس بلاسخارت) کر، من دیت ژبلی وان ڕاستیێن ئاشکەرا یێن بێ خەمی و بێ وژدانی و بێ بەرپڕسیا مەزنە بەر پڕسێن مە تشتەکێ نە دروست نە گۆتیە. گۆتنا بلاسخارتێ یا ژهەمیان پتر چوویە د دفنێن گەلەک بەرپڕسێن نەزانڕا ئەوە: دەمێ گۆتی ئەڤ "ڕەوشا هەرێمێ یا فیدرالی نە مسۆگەرە بو هەوە هەتا هەتا بمینت"، باوەرکن زۆر ڕاستە، گۆتنەکا فەلسەفیا عەرەبیا کویر هەیە دبێژت: "دوام الحالِ من المُحالِ...واته: ئەستەمە و قەت نابت ڕەوشەک وەکی خوە هەتا هەتا بمینیت"،

ژیان هەمی لڤین و گوهۆڕینە یان بەرەڤ پێش یا بەرەڤ پاشڤە و کەفتنێ، مینا پایسکلی کو ب کوردی باب وکالێن مە دگۆتنێ: (کەرێ ئاسنی)، گەر تو ڕاوەستای دڤێت بهێیە خوار یانژی دێ ب ئەردێ کەڤی، واتە ڕاوەستان نینە٫ تەنه د سەرێن بێ مەژیاندا نەبت، یا دیارە هەردوو ڕێکێن پێش و یێن پاش ئەگەرێن خوە هەنە! وگومان نینه هەمی ئەگەرێن کەفتنێ سیاستمەدارێن دەستەهەڵاتدار بەرهەڤکرینە، حورمەتا هۆڵەندیا ژیێ خوە هەمی ب سیاسەتێ ل وەڵاتێ خوە و ل UN ڤە بووراندی (بلاسخارت)ێ ژی ئەو ئەگەرە هەمی دیار کرینە: ژ بێ سیستەمیێ بگرە، ژ دۆبەرەکیا هەردوو زۆنا بگرە، ژ دوو جۆریا پێشمەرگێ ڤێ حزبێ و حزبا دیتر بگرە، ژ خلولاهیا ئابۆری بگرە ئەوێ ل سەر بێ زەلالی و ستەم و چەپکرن و تالانکرنا کوردستانێ هاتیە ئاڤاکرن، دیسان ژ بەرتەنکرنا ئازادیێ بگرە...وهتد یێن بلاسخارتێ خوەیا کرین،

پشتی دیارکرنا ڤان ئەگران خاتوینێ هوشیاری ژی دایە مە و مەزنێن مە ژ بۆ چاکسازی و ل خوەزڤڕینێ، لێ مەدیت سێ جۆڕێن ب ناڤ دبێژنێ ئینسان تنگژین و کویفێن تۆڕەیێ ژ وان هات: (مەزنێن خراب، مەللاق، و جۆڕێ سیێ کۆڵەیێن بێ فام)! لێ ئەز بخوە ژڤێ تۆڕەیی و ڕەتکرنێ مەندەهۆش نە بووم، چونکی هەردەم مە دیتیە بەرامبەر هەر کەس و کەسایەتیکا گۆتنەکب چەکێ تەحل ژڕاستیان گۆتبیت سەرکێشێن مە ئەو گۆتنە ب خودانڤە و ب دژواری هاتینه ڕەتکرن. ل ڤێرێ من پێ خوەشە بەحسێ دوو نمونەیان بکم: یێ ئێکێ بەحسێ ڕوناکبیر و ڕەوشەنبیرێ مسریێ مەزن (فەهمی هوێدێ) بهینمە زمان، ئەوێ هەمی دەما پشتەڤانێ نەتەوا کورد و بەرپەڕێن ڕۆژنامە و کوڤارا پڕکری ژ هەڤسۆزی و بەرەڤانی ژ دۆزا کوردی، لێ دەمێ جارەکێ هوشیارکرنەکا دلسۆزانە بۆ سیاسەتمدارێن کورد ل گەل بەغدا دیارکری و گۆتی: "هوشیاربن هوینێن ب ئاگری دلەیزن"، ئێکسەر مەدیت خامەیێن کڕێگرتیێن دەستەهەڵاتێ هێرش برنە سەر، زویرۆ کرن و ب ساڵۆخەتێن پیس و خراب وەسفکرن! و نمۆنەیا دویێ یا ڤەکۆلەر و نڤێسەرێ بەربانگێ ئەمریکی یێ دەمەکێ ماموستا ل زانکۆیا ئەمریکی ل سلێمانیێ(مایکل ڕۆبن)-ه، چەوان وەختێ ڕەخنە ل سەرکردایەتیا کوردی گرتی، ل سالا 2008 بەحسێ هندەک ژ داهاتیێ کوردستانێ ئەوی هاتیە دزین و هنارتن بۆ بانکێن ئەمریکا ـ کو تەنها وی ئاماژە ب دوو ملیار و چوار سەد هزار دۆلاران کر ـ هەر ڕاستەڕاست ئەو ژی کرنە پاتەکێ بێ نڤێژ و خراب، دیسان هەمان تشت هەمبەر وی دووبارەبوو ل دەمێ ڕاپڕسینێ (ریفراندۆما) سالا 2017، چەوان ڕوبنی گۆت: سەرەڕای وێ چەندێ کو هندەک باڵا دەستێن کوردا پاڕەکێ زەبەلاح ل دۆرماندوری کونگرێس و کۆچکا سپی وەکو بەرتیل ڕەشاندینە بهێجەتا کومێن (لوبیکرنێLobbying)‏ لێ هەر ئەو مەزنێن کوردان ڕاستیێن ڕەتکرنا ئەمریکا ژ بۆ دەولەتبوونێ و هەتا ژبۆ ڕاپرسینێ ژ گەلێ کورد د فەشێرن و درەوان لێ دکن،

وی دەمی ئێکسەر ڕاگەهاندنا زەر ئاگرێ ناڤزڕاندنێ دژی ڕوبنێ هەلکر! ب خودێ پشتی زێدەتر ژچوارێک چەرخێ ژیێ خوەیێ سیاسی ئەز گەهشتیمە قەناعەتەکا موکم: ئەگەر ئەڤرۆ ئیسماعیل بێشکچیێ ژی، ئەو زانایێ جڤناکناس و فەیلەسۆف و شۆڕەشگێرێ جوامیرێ تورک، هەڤالێ مە کوردان ودۆزا مە، یێ هەڤدە سال ژ عەمرێ خوە د سەرا مە د زینداننێن زۆرداڕێن تورکانڤە یێ هندی بەرپەڕێن کتێبا خوە: (کوردستان كوڵونیەکا ـ پارچەکا داگیرکریا نێڤ نەتەوەییە) ڕۆژ و مەهێن نەخۆشیان ژ زاڵمێن تورک دیتیە، ئەگەر ڤێ گاڤێ دوو پەیڤێن ڕەخنێ ل مە کوردان یانژی مەزنێن مە کوردان بگرت، ئێکسەر دێ ب دۆژمن و چەپەڵ و مەلعۆن ل قەلەم ددن! ب ڤی ئاوایی ئەم کورد ژ هەمی جیهانێ بێ وەفاترن، ئەم داران د بن پیێن خوەدا دبڕن و گوهێن خوە نا دەنە وان یێن بێژنە مە: وەنە کن هوین دێ کەڤن و دویر نینە چقەکێ تێژ د وەڕاژی بچتن!!

هه‌واڵی گرنگ