نەخێر، ئەمە مانگەكەی ئێمە نیە
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

نەخێر، ئەمە مانگەكەی ئێمە نیە

 

 

لەگەڵ ئەوەی شێوەكەی زۆر لە مانگی هەسارەكەمان دەچێت، بەڵام ئەمە وێنەی مانگەكەمان نیە، بەڵكو ئەمە نوێترین وێنەی گەورەترین مانگی هەسارەی موشتەریە كە بە گانیمید (Ganymede) ناسراوە، وێنەكە نوێیە، واتە لە بەرواری (7/6/2021) چركێنراوە لەلایەن مانگی دەستكردی (Juno) كاتێك ئەو ڕۆژە بەلای ئەو مانگەدا تێپەڕی، گانیمید نەوەك تەنیا گەورەترین مانگی هەسارەی موشتەریە، بەڵكو گەورەترین مانگە لەنێو كۆمەڵەی خۆرەكەمان، تیرەكەی (5268) كیلۆمەترەو لە دووری ملیۆنێك و حەفتا هەزار كیلۆمەتر لە خولگەیەگدا بەدەوری هەسارەی موشتەریدا لە ماوەی حەوت ڕۆژدا جارێك سوڕێك تەواو دەكات، هەر بۆ بەراورد تیرەی مانگەكەمان (3474) كیلۆمەترە.

دێوە هەسارەی موشتەری (79) مانگ یان پاشكۆی هەیە، چواریان گەورەن كە بە مانگەكانی گالیلۆ ناسراون، چونكە گالیلۆ كە بۆ یەكەم جار لەمێژوو تەلیسكۆپی دروستكرد یەكەم كەسیش بوو ئەو مانگانەی بینی كاتێك ڕووی تەلیسكۆپەكەی كردە هەسارەی موشتەری، (75) مانگەكەی تری موشتەری بچوكن و تیرەی زۆربەیان لە (10) كیلۆمەتر كەمترە.

مانگی دەستكردی (Juno) هی ئاژانسی ناسایە، لەوەتەی مانگی تەمموزی ساڵی (2016) گەیشتووە بەهەسارەی موشتەری و لەوكاتەوە بەبەردەوامی پشكنین دەكات و بەدەوریدا دەسوڕێتەوە، تا ئێستا گەلێك زانیاری و وێنەی هەسارەكەی ناردۆتەوە، بەڵام ئەمە یەكەم وێنەی مانگی گانیمیدە كە لەو نزیكەوە بیچركێنێت و بینێرێتەوە.

(لوقمان حەوێز – تێكساس)

هه‌واڵی گرنگ