زانیاری نوێ لەسەر موچە
بەپێی زانیارییەکان ، ئەم هەفتەیە پەرلەمانی کوردستان لەسەر پرسی موچە و داهاتی هەرێم کۆدەبێتەوە و بڕیاریش وایە لایەنی حکومەتیش ئامادەی کۆبوونەوەکەبن.
سه‌رچاوه‌یه‌ك لە پەرلەمانی کوردستان راگەیاند، حکومەتی هەرێم رەزامەندی نیشانداوە ئامادەی کۆبوونەوەکەی پەرلەمان بێت، دەشڵێت، داوایانکردووە وەزیری دارایی و سامانە سروشتییەکان و پلاندانان و سەرۆکی دیوانی ئەنجومەنی وەزیران و سکرتێری ئەنجومەنی وەزیران ئامادەی کۆبوونەوەکەبن.
چەندین جار فراکسیۆنە ئۆپۆزسیۆنەکانی پەرلەمانی کوردستان داوایانکردووە، کە دەبێت کۆبوونەوەیەکی پەرلەمان لەسەر پرسی موچە و داهاتی هەرێم و مامۆستایانی گرێبەست و وانەبێژ ئەنجام بدرێت.
ئەمەش لەکاتێکدایە، موچەی مانگی رابردوو بە لێبڕینی ٢١٪ـەوە دابەشکرا، جگە لەوەی دابەشکردنەکەی دواکەوت و پەرلەمانتارانی پارتی و یەکێتی یەکتریان بە نەگەڕانەوەی داهات بۆ خەزێنەی حکومەت تۆمەتبارکرد.
لە ئێستاشدا سەرەڕای زیادبوونی داهاتی خاڵە سنورییەکان و بەرزبوونەوەی نرخی نەوت و دۆلار، بەڵام هێشتا حکومەتی هەرێم بڕیاری لابردنی لێبڕینی موچەی نەداوە.
ئێن ئاڕ تی
