بەلگێ تویێ مابوو ئەو ژى وە ئێخست!
كوردی عربي English

هه‌واڵ وه‌رزش وتــار دیدار و چاوپێكه‌وتن فۆتۆگه‌له‌ری ڤیدیۆگه‌له‌ری ده‌رباره‌ی ئێمه‌
x

بەلگێ تویێ مابوو ئەو ژى وە ئێخست!

جاسم محمد شرنەخى

دەمێ هەمى ڕاستیێن مرۆڤى - چ کووم وەکو رژێم و حکومەت یانژى وەکو تاک - خوەیا دبن و لاش ڤاژى دبن تەنها شەرمزاریەک تنێ بمینت، بەلگەکێ تەنگ ل سەربت ژبۆ ستارەکرنێ دبێژنە وێ (ڤەشارتنا ب بەلگێ تویێ)، بنیاتا ڤێ دەستەواژێ ژ چیرۆکا دەیبابێن مە ئادەم وحەوایێ (سلاڤ ل وان بن) هاتیە دەمێ گوهدارى ل فەرمانا خۆدێ نە کرین و ژ دارا قەدەغکرى خوارین، هەر ئێکسەر جلێن وان ژ بەژنان کەفتن وژێ هاتنە ستاندن، و چ ل بەر دەستێن هەر دویا نەما، لەوا بەزین جهێن شەرمێن خوە ب بەلگێن دارا تویێ ڤەشارتن، واتە ئەگەر ئەو بەلگەژى کەفت دێ جەسته ڕویس و چیپلاق وەکى مرۆڤ هاتیە دونیایێ بەرچاڤ بت.

درێژ ناکین دا بهێینە بەحسێ خوە بکین، بەحس ل فهێتى و عەیب و عاران بکین، ل دۆر شکەستنا د بیاڤێن جودا جودایێن ژیارێدا ب پەیڤین: پاشڤەمان، ئیدارەکرنا سەقەت، گەندەڵى و تاڵان، مۆچەخوارن و بڕین و هەژارکرن، دەرمانێن ئکسپایەر، حوکمێ بنەمالان و هێشتا و هێشتا...ئەو هەمى نەبەس بوون، بەلگەکێ بچویکێ بچویکێ تویێ مابوو، یێ دگۆتنێ پەڕاوێزەکا ئازادیا دەربرینا هزرکى و سیاسى و ڕۆژنامەڤانى، ژ حوکمڕانێن مە هەبوون جهێ شەرمێ ل ڤى لایێ لاشێ خوە و ل لایێ دیتر هەوڵ ددان ب بەلگێن تویێ ڤەشێرن، و مستەکا تۆزێ ژى پاڤێژنە چاڤێن خویانیا و دیسان بیانیا ژى، دا بەرێ وان ژ کارەساتێن شەرمزاریێن شەکستنا ڤەگوهێزن، لێ وەسا دیارە زێدەڕەوى و سەرداچوونا کوردى چ سنۆر و توخیب نینن. لەوا ئەو خوەدەرئێخستن و (ئیدداعایا) بێهنفرەهییا ل سەر ئازدایا دەربرینێ ئەوژى بوویە هلم و فڕى، خۆ لبەرگرتنا وێ چەندێ ژى نەما، و دەستێن وان ب ڤەشارتنا ب بەلگێ تویێڤەژى وەستیان، لەوا پەنا برنە سیاسەتا تۆمەتێن بەرهەڤ وکى ئەوا ل چەرخێ بوورى ل سۆڤێتێ و هەتا بگهەیە رژێما دکتاتۆریا بابێ عودەى دهاتە ئەنجامدان؛

دەمێ هەر کەسێ دەڤێ خوە ڤەکربا - نەک ل دەڤ نۆژدارێ ددانا بەلکێ ژبۆ گۆتنا ڕایەکا جودا - ئێکسەر داهێتە ڕاپێچکرن و ل قالبێن خیانەتکارى و سیخورى و تێکدان و تیرۆرێ هێتە دان و داهێڤێژنە پشت هەتاڤێ، ڤێجا هەتا دەمەکێ گێولێ "سەرۆکى" لێ دابا لێبوورینەکا گشتى دەرئێخستبا و بەردانا کەسێن ب سیخورى و نۆکەرى و تێکدانێ هاتینە تۆمەتبارکرن كربيا کەرەم و مننەت ژ دەڤ خوە وەکو "خوداوەند"، زۆر جاران ژى ئەو گرتیێن ساڵۆخەتێن وان بوورین دا دزیندانا تاریدا - ب بڕیارێن "دادگەها شۆرەشێ" - مرن و نە دهاتنە ئازادکرن. ئەوا ئەڤرۆ ل کوردستانێ دهێتە کرن ژهندەک ڕەخانڤە ژ یا ل سەردەستێن ستالین و سەددامى دهاتە کرن زۆر خرابترە ژبەرکو کێمترین تشت دادگەهـ و قەزا پێ نە دهاتە شەرپێزەنکرن بەلکى ئەڤە ئەرکێ "دادگەها شۆرەشێ" یا ناڤ و دەنگێ وێ خرابى چووى بوو بەرۆڤاژى یا ئەڤرۆ ئەم ل کوردستانێ دبینن،

ژ لایەکێ دیترڤە ئەو جۆرە ستەمە ل وى سەر دەمى مودیلەکا ب ڕەواج بوو ب ئەگەرێ پرۆپاکندەیا زەرا سۆشیالزمى، جیهانا وى دەمى زۆر ژ یا ئەڤرۆ جودا بوو، عەولەما ڕاگەهاندنێ نەبوو، هەر وەڵاتەک دونیایەک ڤەدەربوو نە وەکى نها تۆپا ئەردى بوویە گوندەکێ بچویک بوویە تەپەکا شویشەى هەمى ئاکنجیێن هەر چار کنارێن ئەردى شەرمزاریێن هەڤدوو دبینن.

بڕاستى پشتى پەسەندکرنا حوکمى ل سەر هندەک چالاکڤانێن کورد ب تۆهمەتێن نەبەر ئەقل ئەو پچە شەرما مەیا مای ژی هەتكی و ل رۆژا نیڤرۆ تەیسى و ل شەڤ ژى مایە ل بەر ساهى ستێرا و ڕوناهیا هەیڤێ، بڕاستى ئەگەر چارەیەک نەبت چارەنڤێسەکى ئێکجار ڕەش و ئومێدکوژ ل بەراهیا گەلێ مەیە..سەد جاران مخابن

هه‌واڵی گرنگ