وەزیری كشتوكاڵ و دارستانی توركیا ڕایدەگەیەنێـت: لە كۆی ٨٥ ئاگر كە لە ٢٦ پارێزگای توركیا كەوتوونەتەوە ٧٤یان كۆنتڕۆڵكراون.
بەكر پاكدەمیرلی لە هەژمارەی تایبەتی خۆی لە تۆڕی كۆمەڵایەتی تویتەر باسی لەو ئاگرانە كردووە كە لە ٢٨-٣٠ی تەمووز لە دارستانەكانی توركیا كەوتوونەتەوە و نووسیوویەتی: "كارمەندە قارەمانەكان لە زەوی و ئاسمانەوە لە هەوڵی كۆنتڕۆڵكردنی ئاگرەكەدان، سوپاسی پشتیوانییەكانتان دەكەین. لە كۆی ئەو ٨٥ ئاگرەی لە ٢٦ پارێزگا كەوتوونەتەوە تواندراوە ٧٤یان كۆنتڕۆڵ بكرێن".
وەزیری كشتوكاڵ و دارستانی توركیا خشتەیەكیشی بڵاوكردووەتەوە و تیایدا ئەوە دەردەكەوێت كە لە ئادانا دوو، لە ئانتاڵیا سێ، لە مێرسین سێ، لە موغڵا دوو و لە عوسمانییە یەك ئاگر تا ئێستا كۆنتڕۆڵ نەكراون.