هێزە ئەمنییەكانی عێراق پرۆسەیەكی سەربازییان لە پارێزگای كەركوك بۆ راوەدونانی پاشماوەكانی رێكخراوی داعش دەست پێكرد.
بەڕێوەبەرایەتی حەشدی شەعبی لە بەیاننامەیەكدا بڵاویكردووەتەوە، بەرەبەیانی رۆژی یەكشەممە هێزەكانی حەشد و سوپای عێراقی پرۆسەیەكی سەربازییان لە "وادی كور" لە پارێزگای كەركوك دەست پێ كردووە.
ئەوەش هاتووە، پرۆسەكە بۆ پاككردنەوەی ناوچەكە و راوەدونانی پاشماوەكانی رێكخراوی داعشە و تیایدا لیوای 16ی حەشد و سوپا و پۆلیسی فیدراڵی بەشدارن و فڕۆكە جەنگییەكانی سوپا پاڵپشتییان دەكەن.
بەپێی بەیاننامەكە، لە پرۆسەكەدا وادی كور و دەوروبەری بە تەواوەتی كێوماڵ دەكرێن و گرەنتی رێگەگرتن لە دزەكردنی چەكدارانی داعش دەكرێت.