وەکی یا خویایە ئەڤروکە لسەرانسەری جیهانێ، سیستەمێ دیموکراتی دهێتە هژمارتن باشترین وگونجایترین سیستەم ژبو رێڤەبرنا کاروبارێن خەلکی وپاراستنا مافێ هاوەلاتیان وبەشداریکرنا وان دپروسێسا حکومرانیێدا،
پشتی سەرهلدانا بهارا عەرەبی لسالا 2010 ز وبلندکرنا دوریشمێ مللەتی دڤێت رژێمێ ب روخینت وئەنجامدانا هەلبژارتنان ل وەلاتێن تونسێ ومسرێ پارتێن ئیسلامی یێن میانرەو بوون جهێ باوەریا ژمارەکا زور ژ خەلکی وپوستێن بلند دناڤ دەزگەهێن میریدا وەرگرتن ،لسالا 2013 زعبدالفتاح السیسی کودەتا لەشکەری کر لسەر سەروکێ هەلبژارتی موحەمەد مورسی ولدوماهیکێ دزیندانێڤە ژناڤبر، ئەڤا ل وەلاتێ تونس رویدای لرێکەفتی 26/7/2021 ز دەمێ سەروکێ وەلاتی قەیس سەعید بریاردای حکومەت بهێتە هەلوەشاندن وپەرلەمان هاتیە سرکرن،ئەڤ پێنگاڤە نێزیکی پێنگاڤا ل مسرێ هاتیە هاڤێتن دگەل هندەک جیاوازیان،
ئەڤە چەند روژە ئەز ب هویری چاڤدێریا تورێن چڤاکی دکەم،گەلەک کەسێن خوە ب ئازادیخواز ومروڤ دوست ودیموکراتخاز ولیبرال دزانن،بەلێ دێ بینی یێ دژاتیا هەمی تەڤگەر وبزاڤێن ئیسلامی دکەت ئەڤچا چ میانرەو بن یان ژی توندرەو بن !
ئەز لگەل تە مە کەکێ روشنبیر ودیموکراتخاز وسیکولار بلا تە گروپ وپارتێن ئیسلامی یێن توندوتیژیێ پەیرەودکەن وخەلکی دکوژن وسەردبرن وئازادیێن خەلکێ دیتر تێکددەن وبناڤێ خودێ وئیسلامێ وپێغەمبەری سلاڤ لێ بن هەمی کار وکریارێن هوڤانە ودرندانە دکەن دژی خەلکێ سڤیل وبێ تاوان نەڤێن ودژاتیا وان بکەی،بەلێ دەمێ پارتەکێ یان تەڤگرەکێ باوەری ب کارێ سیاسی ومەدەنی وهەلبژارتنان وپێکڤەژیانێ هەبیت وبەشداربیت دحکومەتێدا وجهێ باوەریا خەلکی بیت،نزانم ب چ پیڤەر ومەنتق هەمی لدەڤ جەنابێ تە وەکی ئێک بن !
ئەرێ گەلو یا بەر ئاقلە تو بێژی هیچ جیاوازیەک نینە دناڤبەرا ئوسامە بن لادن وزەواهری وزەرقاوی وئەبو بەکر بەغدادی وراشد غەنوشی ومورسی وقەرزاوی وموحەمەد عاکفیدا ؟
ئەز نابێژم ئیسلامیێن میانرەو هەمی فریشتەنە وگەندەل ودزیکەر دناڤدا نینن وهەمی یێن ژ ئەسمانا هاتین خار،بەلێ ئەز یێ ل وێ باوەریێ ل هەر وەلاتەکێ مسلمانا لدەڤەرا دبێژنێ روژهەلاتا ناڤین هەلبژارتنێن ئازاد وسەربەست بهێنە ئەنجامدان دێ ئیسلامیێن میانرەو دەستهەلاتێ وەرگرن ودێ بن جهێ باوەریا خەلکی،بەلێ دەمێ کودەتا لەشکەری دهێتە ئەنجامدان یان کودەتا سپی دهێتە برێڤەبرن ئەو کێشەکا دیترە،
ئەڤە سەرێ چەندین سالە حزبێن بناڤێ نەتەوایەتیێ یێ حکومرانیێ دکەن وئەڤ وەلاتە وێرانکرن ژ هەمی لایانڤە،هەردەمێ حزبەکا ئیسلامی حکومرانی کر بو دەمێ جار یان پێنچ سالان ئەڤ ئازادیخازە دێ هەمی قەیران وکێشێن دوم درێژ یێن بەری چەندین سالە ئێخن ستویێ ئیسلامیان !
ئەڤچا نزانم هندەک مروڤان نەخوشیا ئیسلاموفوبیا یا هەی وهندەکێن دیتر یا ئیخوانوفوبیا یا هەی،دبیت گەلەک کەسان پێزانینێن راست ودروست لسەر نەبن ودبیت هندەک ژ کەرب وکینێ ژی ڤێ چەندێ بکەن،هیچ جارەکێ کودەتا لەشکەری وپوستەلا لەشکەری باشتر نەبوویە ژ سەروکەکێ مەدەنی وبرێکا سندوقێن هەلبژارتنان هاتی سەر کورسیکا دەستهەلاتێ ...