پەیک یا نەتەوەیێن هەڤگرتی ل عێراقێ ڕاگەهاند، ژاپۆنێ دوو ملیۆن دۆلار بۆ پشتەڤانیا هەلبژارتنێن عێراقێ دابینکرینە، بالیۆزێ ژاپۆنێ ژی دبێژیت، هەفکاری دێ بنە سەدەمێ گرنتی کرنا شەفافیەت و باوەریپێکرنێ ل هەلبژارتنان.

 

د ڕاگەهاندنەکێدا جنین پلاسخارت پەیکا نەتەوەیێن هەڤگرتی ل عێراقێ، پپێشوازی کریە ل هەڤکاریەکا دارایی یا ژاپۆنێ ب کوژمێ ٢١٦ ملیۆن یەنێن ژاپۆنی کو لهەمبەر دوو ملیۆن دۆلارێن ئەمریکی نە ئەوژی بۆ پشتەڤانیا وی پرۆژەی کو نەتەوەیێن هەڤگرتی رابەراتیا وی دکەت بۆ پشتەفانیا بنیاتدانانا شیانێن کۆمسیۆنا هەلبژارتنان بۆ ئامادەکاریێن هەلبژارتنێن بەروەخت.

هەڤدەم، سوزوکى کوتارۆ بالیۆزى ژاپۆن ل عێراقێ ڕاگەهاند، هەلبژارتن مەزنترین رێکە بۆ پێشاندانا ئیرادەیا گەلێ عێراقێ و دێ بیتە روانگەیەک بۆ سیاسەتەکا نشتیمانی.

سوزوکى کوتارۆ ئاماژە ب وێیەکێ ژی کریە، دوێ باوەریێ دایە هەڤکاریێن وەلاتێ وی دێ پشکدار بن ل بزاڤێن حکومەتا عێراقێ بۆ گرنتیکرنا شەفافیەت و باوەرپێکرنێ ل هەلبژارتنێن بهێت.

بەریا نها ژی هەر ئێک ژ ئەلمانیا و ئەمریکا و دانیمارک و چەند وەلاتێن دی هەڤکاریێن دارایی پێشکێشکرینە بۆ زێدەکرنا شیانێن چاڤدێریا نەتەوەیێن هەڤگرتی و شیانێن تەکنیکی یێن کۆمسیۆنێ بۆ باش بڕێڤەچوونا هەلبژارتنێن بەروەختێن عێراقێ.

بڕیارە ل مەها تشرینا ئێکی یا ئەڤسالە هەلبژارتنێن عێراقێ بڕێڤەبچن و پەرلەمانێ عێراقێ ژی ئەشکەراکر، کو سێ رۆژان بەری هەلبژارتنان دێ خۆ هەلوەشینیت، د حەفتیا دەربازبووی ژی دا، سەرۆک وەزیرێن عێراقێ و سەرۆکێ ئەمریکا جڤیان و جۆ بایدنی گوت، "لدەف مە گەلەکا گرنگە هەلبژارتنێن عێراقێ ددەمێ خۆدا بهێنە کرن و د دادپەروەرانە بن ل بن چاڤدێریا ناڤدەولەتی دا بن".