كوردیو

مەفرەزەکانی بەشی پۆلیسی نەھێشتنی تاوانی سلێمانی - نوسینگەی ڕزگاری، دوو تۆمەتباریان بەبڕیاری دادوەر و بەپێی ماددەی 446 و ماددەی 30ـی تایبەت بەماددە ھۆشبەرەکان دەستگیرکرد.

 

بەرێوەبەرایەتی پۆلیسی پارێزگای سلێمانی بڵاویكردووەتەوە،"دوای ئەوەی مەفرەزەکانی بەشی پۆلیسی نەھێشتنی تاوانی سلێمانی فەرمانێکی دەستگیرکردنی تۆمەتبار (ر، ت، أ لەدایکبووی 1971)یان جێبەجێکرد لەشوێنی نیشتەجێبوونیدا کە داواکراو بوو بەپێی ماددەی 446 لەیاسای سزادان، تۆمەتباری ناوبراو لەگەڵ تۆمەتبارێکی دیکەدا بەناوی (ئ، ع، ح لەدایکبووی 1980) سەرقاڵی کێشانی مادەی ھۆشبەر بون، بۆیە لەلایەن مەفرەزەکەی پۆلیسەوە ھەردو تۆمەتبارەکە دەستگیرکران".

 

ئاماژە بەوەشدراوە،"لەکاتی دەستگیرکردنی تۆمەتبارەکاندا دەستیشیگیرا بەسەر بڕێک ماددەی ھۆشبەردا لەجۆری ھیرۆیین و ئەو ئامێرەی تۆمەتبارەکان ماددەکەیان پێ کێشاوە".

 

هەئوەها هاتووە،" لەئێستادا پەڕاوی لێکۆڵینەوە بۆ ھەردو تۆمەتبار کراوەتەوەو تۆمەتبار (ر، ت، أ) بەبڕیاری بەڕێز دادوەرو بەپێی ماددەکانی 446 و 30 ڕاگیراوە، ھەروەھا تۆمەتبار (ئ، ع، ح) بەبڕیاری بەڕێز دادوەر و بەپێی ماددەی 30ـی تایبەت بەماددە ھۆشبەرەکان ڕاگیراوەو لێکۆڵینەوەکان بەردەوامن".