كوردیو

 

پارێزگای هەولێر هۆشداری لە بەرزكردنەوەی نرخی نان دەدات و جێگری پارێزگاری هەولێریش رایدەگەیەنێت،"ئەوەی سەرپێچی بکات شوێنەکەی دادەخرێت".

 

هێمن قادر پارێزگاری هەولێر لە لێدوانێكی ڕۆژنامەوانیدا ڕایگەیاندووە،"لە رێگەی لیژنەکانی قایمقامیەت و چاودێریکردنی بازاڕەوە رێگری لە بەرزبوونەوەی نرخی نان دەکەن، لە 10 رۆژی داهاتوودا هەوڵ دەدەن چارەسەری بەرزبوونەوەی نرخی ئارد و کێشەی نانەواخانە و فڕنەکان بکەن".

 

ئاماژەی بەوەشداوە،"لەگەڵ بازرگانەکان کار کراوە بۆئەوەی بڕێکی زۆر ئارد بهێننە نێو شاری هەولێر بۆئەوەی نرخەکەی وەکو جاران دابەزێنینەوە و کاریگەریی نەبێت لەسەر نرخی سەموون و نان لەسەر هاووڵاتییان".

 

ئەوەشی خستووەتەڕوو،"لەگەڵ ئەنجوومەنی نانەواخانەکان و فڕنەکان دانیشتووین و تاوتوێی ئەو بابەتە کراوە، لە 10 رۆژی داهاتوودا هەوڵ دەدەین چارەسەری ئەو بابەتە بکەین و نرخی ئارد دابەزێندرێت، هاوکات هەوڵ دەدەین پێداچوونەوە بە داواکارییەکانی ئەوان بکرێت لە کێشەی کارەبا و غاز و بابەتی پەیوەست بە شارەوانی و هەموو ئەو کێشانەیان بۆ چارەسەر بکرێت".

 

جێگری پارێزگاری هەولێر بۆ روداو ڕاشیگەیاندووە،"ئەوەی سەرپێچی بکات شوێنەکەی دادەخرێت یانیش پێبژاردنی بۆ دەکرێت، ئەوان ئەو نانەواخانە و فڕنانە دەستنیشان دەکەن کە سەرپێچی دەکەن و پابەندی رێنوێنییەکان نابن و دەستبەجێ لە رێگەی قایمقامیەتەوە رێکاری پێویستیان بەرامبەر دەگیرێتەبەر، بە داخستنی شوێنەکانیان یان بە پێبژاردنیان".